ಕುಕ್ಕರ್‌ ವಿಷಲ್‌ ನುಂಗಿ ಮಗು ಸಾವು

ಮದ್ದೂರು: ಕುಕ್ಕರ್‌ನ ವಿಷಲ್‌ ನುಂಗಿ ಒಂದೂವರೆ ವರ್ಷದ ಮಗು ಮೃತಪಟ್ಟಿದೆ. ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕಿನ ನಗರಕೆರೆ ಗ್ರಾಮದ ಮರಿಲಿಂಗೇಗೌಡ ಮತ್ತು ರೂಪ ದಂಪತಿಯ ಪುತ್ರ ಭುವನ್‌ಗೌಡ ಮೃತ ಮಗು.

ಮರಿಲಿಂಗೇಗೌಡರು ಕುಂದಾಪುರದಲ್ಲಿ ಕಂದಾಯ ಇಲಾಖೆಯಲ್ಲಿ ಉದ್ಯೋಗಿಯಾಗಿದ್ದು, ಪತ್ನಿಯೂ ಅಲ್ಲೇ ಇದ್ದಾರೆ. ಮಗುವನ್ನು ಅಜ್ಜನ ಮನೆಯಲ್ಲಿ ಬಿಟ್ಟಿದ್ದರು. ಶನಿವಾರ ರಾತ್ರಿ ಮನೆಯಲ್ಲಿ ಆಟವಾಡುತ್ತಿದ್ದಾಗ ಅಡುಗೆ ಮನೆಗೆ ತೆರಳಿದ ಮಗು, ಕುಕ್ಕರ್‌ನ ವಿಷಲ್‌ ಬಾಯಿಗೆ ಹಾಕಿಕೊಂಡು ನುಂಗಿದೆ. ಬಳಿಕ ಮಗುವಿನ ಚೀರಾಟ ಕೇಳಿದ ಅಜ್ಜಿ ತಕ್ಷ ಣ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ಕೊಂಡೊಯ್ದರು. ಆದರೆ ಅಷ್ಟರಲ್ಲಾಗಲೇ ಮಗು ಪ್ರಾಣ ಕಳೆದುಕೊಂಡಿತ್ತು. ಪೋಷಕರ ಹಾಗೂ ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿತ್ತು. ನೆರೆಹೊರೆಯವರು, ಸ್ಥಳೀಯರು ಮಗುವಿನ ಮೃತದೇಹ ವೀಕ್ಷಿಸಿ ಕಣ್ಣೀರು ಸುರಿಸುತ್ತಿದ್ದ ದೃಶ್ಯ ಮನ ಕಲಕುವಂತಿತ್ತು.