ಪತಿ ಕಳೆದುಕೊಂಡ ಮಹಿಳೆಗೆ ಧೈರ್ಯ ತುಂಬಿದ ಸಿಎಂ ಕುಮಾರಸ್ವಾಮಿ

ಬೆಂಗಳೂರು: ಪತಿಯನ್ನು ಕಳೆದುಕೊಂಡು ಅತಂತ್ರವಾಗಿರುವ ಮಹಿಳೆಯೊಬ್ಬರಿಗೆ ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಅವರು ನೆರವು ನೀಡಿ ಸ್ಥೈರ್ಯ ತುಂಬಿದ ಮಾನವೀಯ ಘಟನೆ ಸೋಮವಾರ ನಡೆಯಿತು.

ಚನ್ನಪಟ್ಟಣ ತಾಲೂಕಿನ ಗೃಹಿಣಿ ಶಿಲ್ಪಶ್ರೀ ಅವರು ಸಿಎಂ ಗೃಹ ಕಚೇರಿ 'ಕೃಷ್ಣಾ' ಕುಮಾರಸ್ವಾಮಿ ಅವರನ್ನು ಭೇಟಿ ಮಾಡಿ ತಮ್ಮ ಸಂಕಷ್ಟವನ್ನು ಮನದಟ್ಟು ಮಾಡಿಕೊಟ್ಟರು. ''ಕಾರು ಚಾಲಕರಾಗಿದ್ದ ಪತಿ ನಾಗರಾಜು ಕಳೆದ ಆ.27 ರಂದು ಶಿವಮೊಗ್ಗಕ್ಕೆ ಬಾಡಿಗೆಗೆಂದು ತೆರಳಿದ್ದವರು ನಾಪತ್ತೆಯಾಗಿದ್ದರು. ಅವರು ಕೊಲೆಯಾಗಿರುವ ಸೆ.6 ರಂದು ಪೊಲೀಸರು ಮಾಹಿತಿ ನೀಡಿದರು. ಕುಟುಂಬದ ಆಸರೆಯಾಗಿದ್ದ ಪತಿ ಕಳೆದುಕೊಂಡು ಎರಡು ಮಕ್ಕಳ ವಿದ್ಯಾಭ್ಯಾಸ ಮತ್ತು ನಿರ್ವಹಣೆ ಮಾಡುವುದು ಹೇಗೆಂದು ದಿಕ್ಕು ತೋಚದಂತಾಗಿದೆ'' ಎಂದು ಶಿಲ್ಪಶ್ರೀ ಅಳಲು ತೋಡಿಕೊಂಡರು.

ಮಹಿಳೆಗೆ ಸಿಎಂ ಎರಡು ಲಕ್ಷ ರೂ. ಆರ್ಥಿಕ ನೆರವು ನೀಡಿದರು ಮತ್ತು ರಾಮನಗರ ಜಿಲ್ಲಾಧಿಕಾರಿಯೊಂದಿಗೆ ದೂರವಾಣಿಯಲ್ಲಿ ಮಾತನಾಡಿ, ಶಿಲ್ಪಶ್ರೀ ಅವರ ಇಬ್ಬರು ಮಕ್ಕಳಿಗೂ ವಸತಿ ಶಾಲೆಯಲ್ಲಿ ಪ್ರವೇಶ ದೊರಕಿಸಿಕೊಡುವಂತೆ ಸೂಚನೆ ನೀಡಿದರು.

ಇದೇ ಸಂದರ್ಭದಲ್ಲಿ ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿರುವ ಬಾಲಕ ರೋಹಿತ್‌ ಎಂಬಾತನಿಗೆ ವೈದ್ಯಕೀಯ ಚಿಕಿತ್ಸೆ ಕೊಡಿಸಲು ಸಿಎಂ ಪರಿಹಾರ ನಿಧಿಯಿಂದ 5 ಲಕ್ಷ ರೂ. ಚೆಕ್‌ ಅನ್ನು ಬಾಲಕನ ಪೋಷಕರಿಗೆ ಸಿಎಂ ನೀಡಿದರು.