ಆಡಿಯೊ ತನಿಖೆಗೆ ಆತುರವಿಲ್ಲ: ಸಿಎಂ ಕುಮಾರಸ್ವಾಮಿ

ಬೆಂಗಳೂರು: 'ಆಪರೇಷನ್‌ ಕಮಲ ಆಡಿಯೊ' ಪ್ರಕರಣದ ತನಿಖೆ ವಿಚಾರದಲ್ಲಿ ನನಗೆ ಯಾವುದೇ ಆತುರ ಇಲ್ಲ ಎಂದು ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಹೇಳಿದ್ದಾರೆ.

ಪ್ರಕರಣದ ಬಗ್ಗೆ ವಿಶೇಷ ತಂಡದಿಂದ (ಎಸ್‌ಐಟಿ) ತನಿಖೆ ನಡೆಸುವ ತೀರ್ಮಾನ ಘೋಷಣೆಯಾಗಿ ವಾರ ಕಳೆದರೂ ಎಸ್‌ಐಟಿ ರಚನೆಯಾಗದ ಬಗ್ಗೆ ಸುದ್ದಿಗಾರರ ಪ್ರಶ್ನೆಗೆ ಸಿಎಂ ಈ ಪ್ರತಿಕ್ರಿಯೆ ನೀಡಿದರು.

''ಆಡಿಯೊ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸ್ಪೀಕರ್‌ ಕೆ.ಆರ್‌.ರಮೇಶ್‌ಕುಮಾರ್‌ ಆರೋಪಮುಕ್ತರಾಗಿದ್ದಾರೆ. ಮೈತ್ರಿ ಸರಕಾರ ಪತನಕ್ಕೆ ಬಿಜೆಪಿಯವರು ಆಡಳಿತ ಪಕ್ಷದ ಶಾಸಕರಿಗೆ ಏನೇನು ಆಮಿಷವೊಡ್ಡಿದ್ದಾರೆ ಎಂಬ ವಿಚಾರಗಳ ಬಗ್ಗೆ ಸಮಗ್ರವಾಗಿ ತನಿಖೆ ಆಗಬೇಕಿದೆ. ಯಾರನ್ನೋ ಹೆದರಿಸಲು ಅಲ್ಲ, ವಿಧಾನಸಭೆಯಲ್ಲಿ ಚರ್ಚೆಯಾದಂತೆ ವ್ಯವಸ್ಥೆ ಸರಿಮಾಡಲು ಏನೆಲ್ಲಾ ಕ್ರಮ ಆಗಬೇಕೋ ಅದನ್ನು ಮಾಡಬೇಕಿದೆ. ಹೀಗಾಗಿ, ತನಿಖೆ ವಿಚಾರದಲ್ಲಿ ಆತುರದ ಅಗತ್ಯವಿಲ್ಲ'' ಎಂದು ಪ್ರತಿಪಾದಿಸಿದರು.