ಬೆಂಗಳೂರು: ಕಾಮೆಡ್-ಕೆ ಅಡಿಯಲ್ಲಿ ಬರುವ ಖಾಸಗಿ ಎಂಜಿನಿಯರಿಂಗ್ ಕಾಲೇಜುಗಳಲ್ಲಿ ಖಾಲಿ ಇರುವ ಎಂಜಿನಿಯರಿಂಗ್ ಸೀಟುಗಳನ್ನು ತಿಂಗಳಾಂತ್ಯದಲ್ಲಿ(ಇನ್ನುಳಿದ ಮೂರು ದಿನಗಳಲ್ಲಿ) ಭರ್ತಿ ಮಾಡಲಾಗುವುದು.
ಈ ಕುರಿತ ಮೆಮೋವನ್ನು ಕಾಮೆಡ್-ಕೆ ಶುಕ್ರವಾರ ಹೈಕೋರ್ಟ್ ಮುಂದೆ ಸಲ್ಲಿಸಿದೆ. ಕಾಮೆಡ್-ಕೆ ತಾನು ಪ್ರವೇಶ ನಿಗಾ ಸಮಿತಿಗೆ ಖಾಲಿ ಸೀಟು ಹಾಗೂ ವಿದ್ಯಾರ್ಥಿಗಳು ವಾಪಸ್ ನೀಡಿರುವ (ಸರಂಡರ್ಡ್) ಸೀಟುಗಳ ಭರ್ತಿ ಬಗ್ಗೆ ಕಳುಹಿಸಿರುವ ಪತ್ರವನ್ನೂ ಸಹ ಮೆಮೋದಲ್ಲಿ ಸೇರಿಸಲಾಗಿದೆ.
ಆ ಮೆಮೋವನ್ನು ಪರಿಗಣಿಸಿದ ನ್ಯಾ.ಎಚ್.ಜಿ.ರಮೇಶ್ ಅವರಿದ್ದ ಹೈಕೋರ್ಟ್ನ ವಿಭಾಗೀಯಪೀಠ ನಿವೃತ್ತ ನ್ಯಾಯಮೂರ್ತಿ ಆನಂದ್ ಬೈರಾರೆಡ್ಡಿ ನೇತೃತ್ವದ ಪ್ರವೇಶ ನಿಗಾ ಸಮಿತಿ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿದೆ.
''ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ವೈದ್ಯ ಮತ್ತು ದಂತ ವೈದ್ಯ ಕೋರ್ಸ್ಗಳ ಕೌನ್ಸೆಲಿಂಗ್ ನಡೆಸುತ್ತಿರುವುದು ವಿಳಂಬವಾಗುತ್ತಿರುವ ಹಿನ್ನೆಲೆಯಲ್ಲಿ ಖಾಲಿ ಇರುವ ಸೀಟುಗಳನ್ನು ಭರ್ತಿ ಕಾರ್ಯವೂ ತಡವಾಗುತ್ತಿದೆ. ಈ ತಿಂಗಳಲ್ಲಿ ಇನ್ನು ಮೂರು ದಿನ ಬಾಕಿ ಇದ್ದು,ಅಷ್ಟರಲ್ಲಿ ಖಾಲಿ ಇರುವ ಹಾಗೂ ವಾಪಸ್ ನೀಡಿರುವ ಎಲ್ಲ ಸೀಟುಗಳನ್ನು ಭರ್ತಿ ಮಾಡಿಕೊಳ್ಳಲಾಗುವುದು''ಎಂದು ಕಾಮೆಡ್-ಕೆ ಹೈಕೋರ್ಟ್ಗೆ ಹೇಳಿದೆ.
ಮೊದಲ ಸುತ್ತಿನಲ್ಲಿ 14,578 ಅರ್ಹ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಲಾಗಿತ್ತು. ಅವರಲ್ಲಿ 10,689 ಅಭ್ಯರ್ಥಿಗಳಿಗೆ ಸೀಟು ಹಂಚಿಕೆ ಮಾಡಲಾಗಿತ್ತು, ಅವರಲ್ಲಿ ಕೇವಲ 900 ಮಂದಿ ಸೀಟುಗಳನ್ನು ಒಪ್ಪಿಕೊಂಡಿದ್ದಾರೆ. ಎರಡನೇ ಸುತ್ತಿನಲ್ಲಿ 7665 ಸೀಟು ಹಂಚಿಕೆ ಮಾಡಲಾಗಿತ್ತು ಮತ್ತು 3884 ಮಂದಿ ಸೀಟುಗಳನ್ನು ಸ್ವೀಕರಿಸಿದ್ದಾರೆ ಎಂದೂ ಕಾಮೆಡ್ -ಕೆ ಮೆಮೋದಲ್ಲಿ ತಿಳಿಸಿದೆ.