ವಿಶ್ವಾಸದ ಮಾತು ಹೇಗಿರಬೇಕು ಗೊತ್ತೆ ?

ಬೆಂಗಳೂರು: ವಿಶ್ವಾಸಮತ ಯಾಚನೆ ಸಂದರ್ಭದಲ್ಲಿ ಬಳಸುವ ಭಾಷೆ ಬಗ್ಗೆ ಎಚ್ಚರವಿರಲಿ ಎಂದು ಸದನದ ಸದಸ್ಯರಿಗೆ ಸ್ಪೀಕರ್‌ ಕೆ.ಆರ್‌.ರಮೇಶ್‌ ಕುಮಾರ್‌ ಕಿವಿಮಾತು ಹೇಳಿದ್ದಾರೆ.

ಬಹುಮತ ಸಾಬೀತಿಗೆ ದಿನಾಂಕ ನಿಗದಿ ಪಡಿಸಿದ ಬಳಿಕ ಮಾತನಾಡಿದ ಅವರು, ''ಈ ಚದುರಂಗದಾಟದಲ್ಲಿ ಯಾರ ಸೋಲು, ಗೆಲುವು ನನಗೆ ಮುಖ್ಯವಲ್ಲ. ಆದರೆ, ಭಾಷೆ ಬಳಕೆಯ ಬಗ್ಗೆ ಎಚ್ಚರವಿರಬೇಕು. ಅನೇಕ ಮಹಾನುಭಾವರು ಈ ಸದನದಲ್ಲಿ ಹೇಗೆ ನಡೆದುಕೊಂಡು ಗೌರವ ತಂದಿದ್ದಾರೆ ಎಂಬ ಅರಿವು ಇಟ್ಟುಕೊಂಡಿರಬೇಕು,'' ಎಂದರು.

''ಇಲ್ಲಿ ಫುಟ್‌ಬಾಲ್‌ ಆಡುವುದು ಬೇಡ. ಈ ಸ್ಥಾನದಲ್ಲಿ ಕುಳಿತುಕೊಂಡು ಎಲ್ಲದಕ್ಕೂ ಉತ್ತರಿಸುವುದು ಕಷ್ಟ. ಹಾಗಾಗಿ ನಾನು ಅಸಹಾಯಕ. ಅದರರ್ಥ ನಾನು ಮೂಕನೆಂದು ಭಾವಿಸುವುದು ಬೇಡ. ನಿಮ್ಮ ಎಲ್ಲ ಪ್ರಶ್ನೆಗಳಿಗೂ ಉತ್ತರಿಸುವ ಸಾಮರ್ಥ್ಯ‌ ನನಗಿದೆ. ಇಲ್ಲಿದ್ದುಕೊಂಡು ಹಾಗೆ ನಡೆದುಕೊಳ್ಳಲಾಗುವುದಿಲ್ಲ. ಈ ಸೂಕ್ಷ್ಮವನ್ನೂ ಅರ್ಥ ಮಾಡಿಕೊಂಡು ಸಹಕರಿಸಬೇಕು,'' ಎಂದು ಹೇಳಿದರು.