ಸಭಾಪತಿ ರಾಜೀನಾಮೆ ನೀಡಲಿ, ಕಾಂಗ್ರೆಸ್‌ ಸದಸ್ಯರು ಸಂಯಮ ತೋರಲಿ: ಯಡಿಯೂರಪ್ಪ

ಬೆಂಗಳೂರು: ವಿಧಾನ ಪರಿಷತ್‌ನಲ್ಲಿ ಕಾಂಗ್ರೆಸ್‌ ಸದಸ್ಯರು ನಡೆದುಕೊಂಡಿರುವ ರೀತಿ ಪ್ರಜಾಪ್ರಭುತ್ವಕ್ಕೆ ಶೋಭೆ ತರುವುದಿಲ್ಲ. ಬಹುಮತ ಇಲ್ಲದೇ ಇರುವುದರಿಂದ ಸಭಾಪತಿ ಈಗಲಾದರೂ ರಾಜೀನಾಮೆ ನೀಡಲಿ ಎಂದು ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ಹೇಳಿದ್ದಾರೆ.

''ಉಪ ಸಭಾಪತಿ ಅವರು ಬಂದು ಪೀಠದಲ್ಲಿ ಕುಳಿತುಕೊಳ್ಳುತ್ತಾರೆ ಎಂದು ಸೋಮವಾರವೇ ತಿಳಿಸಲಾಗಿತ್ತು. ಅದರಂತೆ ಅವರು ಬಂದು ಕುಳಿತು ಅವಿಶ್ವಾಸ ನಿರ್ಣಯ ಮಂಡಿಸುತ್ತಿದ್ದರು. ಆಮೇಲೆ ನಿರ್ಣಯದ ಪರ ಬಹುಮತವಿಲ್ಲ ಎಂದಾದರೆ ಸಭಾಪತಿಗಳೇ ಮುಂದುವರಿಯಬಹುದಿತ್ತು. ಬೆಲ್‌ ಹೊಡೆದ ಮೇಲೆ ಬಂದರೋ ಅಥವಾ ಬೆಲ್‌ ನಿಂತ ಮೇಲೆ ಬಂದರೋ ಎನ್ನುವುದು ಮುಖ್ಯವಲ್ಲ. ಇಲ್ಲಿ ಬಹುಮತಕ್ಕೆ ಪ್ರಾಶಸ್ತ್ಯ. ಕಾಂಗ್ರೆಸ್‌ನವರು ಇದನ್ನು ಅರ್ಥ ಮಾಡಿಕೊಳ್ಳಬೇಕು. ಬಹುಮತವಿದೆಯಾ ಎನ್ನುವುದನ್ನು ಕಾಂಗ್ರೆಸ್‌ನವರು ಹೇಳಲಿ'' ಎಂದು ಸವಾಲೆಸೆದರು.

''ಉಪ ಸಭಾಪತಿ ಕತ್ತು ಹಿಡಿದು ಎಳೆದು ಅಪಮಾನ ಮಾಡಿರುವುದು ದೇಶದ ಇತಿಹಾಸದಲ್ಲಿ ಎಂದೂ ನಡೆದಿರಲಿಲ್ಲ. ಇದು ಕಾಂಗ್ರೆಸ್‌ನ ಸಂಸ್ಕೃತಿಯನ್ನು ತೋರಿಸುತ್ತದೆ. ಈಗಲಾದರೂ ಸಭಾಪತಿ ಅವರಿಗೆ ರಾಜೀನಾಮೆ ಬಿಸಾಕಲು ಕಾಂಗ್ರೆಸ್‌ನವರು ಹೇಳಲಿ. ಈ ಮೂಲಕ ಸಭಾಪತಿ ಸ್ಥಾನಕ್ಕೆ ಗೌರವ ತರುವ ಕೆಲಸ ಮಾಡಲಿ'' ಎಂದು ಬಿಎಸ್‌ ಯಡಿಯೂರಪ್ಪ ಬುದ್ಧಿವಾದ ಹೇಳಿದ್ದಾರೆ.