2019ರ ಸಾರ್ವತ್ರಿಕ ಚುನಾವಣೆ ತನಕ ಮಾತಿಗಿರಲಿ ಬಿಗಿ ರೇಖೆ: ಅನಂತಕುಮಾರ್‌

ಬೆಂಗಳೂರು: ಲೋಕಸಭಾ ಚುನಾವಣೆ ಮುಕ್ತಾಯಗೊಳ್ಳುವವರೆಗೆ ಕೆಲವರು ತಮ್ಮ ಮಾತುಗಳಿಗೆ ಗಡಿರೇಖೆ ಹಾಕಿಕೊಳ್ಳಬೇಕು ಎಂದು ಕೇಂದ್ರ ಸಂಸದೀಯ ವ್ಯವಹಾರ ಹಾಗೂ ರಸಗೊಬ್ಬರ ಖಾತೆ ಸಚಿವ ಅನಂತಕುಮಾರ ಬಿಜೆಪಿ ನಾಯಕರಿಗೆ ಸೂಚನೆ ನೀಡಿದ್ದಾರೆ.

ಬಿಜೆಪಿ ಕಾರ್ಯಕಾರಿಣಿ ಸಮಾರೋಪದಲ್ಲಿ ಮಾತನಾಡಿದ ಅವರು ಈ ವಿಷಯ ತಿಳಿಸಿದ್ದು, ಕೇಂದ್ರ ಕೌಶಲ್ಯಾಭಿವೃದ್ಧಿ ಸಚಿವ ಅನಂತಕುಮಾರ್‌ ಹೆಗಡೆ ಅವರನ್ನು ಉದ್ದೇಶಿಸಿ ಪರೋಕ್ಷವಾಗಿ ಈ ಹೇಳಿಕೆ ನೀಡಿದ್ದಾರೆ ಎಂಬ ಮಾತುಗಳು ಬಿಜೆಪಿ ವಲಯದಲ್ಲಿ ಕೇಳಿ ಬಂದಿದೆ.

''ಹಳ್ಳಿ ಕಡೆ ದನ ಮೇಯಿಸಲು ಕರೆದೊಯ್ಯುವಾಗ ಕೆಲವು ದನಗಳ ಬಾಯಿಗೆ ಬುಟ್ಟಿ ಕಟ್ಟುತ್ತಾರೆ. ಎಲ್ಲೆಂದರೆಲ್ಲಿ ಬಾಯಿ ಹಾಕುತ್ತವೆ ಎಂಬ ಕಾರಣಕ್ಕೆ ಈ ರೀತಿ ಮಾಡುತ್ತಾರೆ. ಆದರೆ ಹಿಂಡಿನಲ್ಲಿ ಇರುವ ದನಗಳೆಲ್ಲವೂ ಈ ರೀತಿ ಮಾಡುವುದಿಲ್ಲ. ಅದೇ ರೀತಿ ರಾಜಕೀಯದಲ್ಲೂ ಕೆಲವರು ಇರುತ್ತಾರೆ. ತಮಗೆ ಬೇಕಾಗಿದ್ದನ್ನು ಸಮಾಜದ ಮೇಲೆ ಹೇರುವುದಕ್ಕೆ ಮುಂದಾಗುತ್ತಾರೆ. ನಮ್ಮ ಪಕ್ಷದಲ್ಲೂ ಅಂಥವರಿದ್ದಾರೆ. ಚುನಾವಣೆ ಮುಗಿಯುವವರೆಗಾದರೂ ಅಂಥವರು ಗಡಿರೇಖೆ ಹಾಕಿಕೊಳ್ಳಬೇಕು,'' ಎಂದು ಯಾರ ಹೆಸರನ್ನೂ ಹೇಳದೇ ಎಚ್ಚರಿಕೆ ನೀಡಿದ್ದಾರೆ.