ಬೆಂಗಳೂರು: ಕೇಂದ್ರ ಸರಕಾರ ಸಿದ್ಧಪಡಿಸಿ ಕಳುಹಿಸುವ ಮಾರ್ಗಸೂಚಿ ಆಧರಿಸಿ ಮುಂಬರುವ ದಿನಗಳಲ್ಲಿ ಇನ್ನಷ್ಟು ಬಿಗಿಯಾಗಿ ಲಾಕ್‌ಡೌನ್‌ ಜಾರಿಗೆ ರಾಜ್ಯ ಸರಕಾರ ನಿರ್ಧರಿಸಿದೆ. ಈ ಹಿನ್ನೆಲೆಯಲ್ಲಿ ಸಿಎಂ ಯಡಿಯೂರಪ್ಪ ನೇತೃತ್ವದಲ್ಲಿ ಬುಧವಾರ ಮಹತ್ವದ ಸಭೆ ನಡೆಯಲಿದೆ.
ಪ್ರಧಾನಿ ನರೇಂದ್ರ ಮೋದಿ ರಾಷ್ಟ್ರವನ್ನುದ್ದೇಶಿಸಿ ಭಾಷಣ ಮಾಡಿದ ಬಳಿಕ ಸುದ್ದಿಗಾರರ ಜತೆ ಮಾತನಾಡಿದ ಸಿಎಂ ಯಡಿಯೂರಪ್ಪ ಈ ವಿಚಾರ ತಿಳಿಸಿದ್ದಾರೆ.

"ಮೇ 3ರ ಬಳಿಕ ರಾಜ್ಯದಲ್ಲಿ ಎಂದಿನಂತೆ ಜನಜೀವನ ಸಹಜವಾಗಿ ನಡೆಯಬೇಕಿದ್ದರೆ, ಈ ಅವಧಿಯಲ್ಲಿ ಜನರು ಯಾವ ರೀತಿ ವರ್ತಿಸುತ್ತಾರೆ ಎಂಬುದು ಮುಖ್ಯ. ರಾಜ್ಯದಲ್ಲಿ ಲಾಕ್‌ಡೌನ್‌ ವಿಸ್ತರಣೆ ಮಾಡಬೇಕೆಂಬ ಉದ್ದೇಶವನ್ನು ನಾವೂ ಹೊಂದಿದ್ದೆವು. ಆದರೆ ಪ್ರಧಾನಿ ಸೂಚನೆಗಾಗಿ ಕಾಯುತ್ತಿದ್ದೆವು. ಹಾಟ್‌ಸ್ಪಾಟ್‌ಗಳಲ್ಲಿ ಇನ್ನು ಮುಂದೆ ಮತ್ತಷ್ಟು ಬಿಗಿ ಕ್ರಮ ಜಾರಿಯಾಗುತ್ತದೆ,’’ ಎಂದು ಹೇಳಿದರು.

‘‘ರಾಜ್ಯದಲ್ಲಿ ಇದುವರೆಗೆ 57,633 ವಾಹನ ಸೀಜ್‌ ಮಾಡಲಾಗಿದೆ. 4,169 ಜನರನ್ನು ಬಂಧಿಸಲಾಗಿದೆ. 2,171 ಎಫ್‌ಐಆರ್‌ ದಾಖಲಾಗಿದ್ದು, 95 ಲಕ್ಷ ರೂ. ದಂಡ ವಸೂಲಿ ಮಾಡಿದ್ದೇವೆ," ಎಂದು ಹೇಳಿದರು.

ಸೋಂಕು ಹೆಚ್ಚುತ್ತಿರುವ ಜಿಲ್ಲೆಗೆ ಎಡಿಜಿಪಿಗಳ ನೇಮಕ, ಲಾಕ್‌ಡೌನ್‌ ಉಲ್ಲಂಘಿಸಿದರೆ ಕಾನೂನು ಕ್ರಮ

ಮದ್ಯ ಅನುಮಾನ

"ಮದ್ಯ ಮಾರಾಟಕ್ಕೆ ಅವಕಾಶ ನೀಡಲಾಗುತ್ತದೆಯೇ? ಎಂಬ ಪ್ರಶ್ನೆಗೆ ಸ್ಪಷ್ಟ ಉತ್ತರ ನೀಡದ ಅವರು, ಮಾರ್ಗಸೂಚಿ ಆಧರಿಸಿ ಕ್ರಮ ತೆಗೆದುಕೊಳ್ಳಲಾಗುವುದು," ಎಂದರು.