ಕರ್ನಾಟಕ ಚುನಾವಣೆ 2018 ಹ್ಯಾಷ್ ಟ್ಯಾಗ್‌ ಬಳಸಿ ಮಾಂಸ ದಂಧೆ

ಬೆಂಗಳೂರು: ರಾಜ್ಯ ವಿಧಾನಸಭೆ ಚುನಾವಣೆ ಸೇರಿದಂತೆ ಪ್ರಚಲಿತ ವಿದ್ಯಮಾನಗಳ ಹ್ಯಾಷ್ ಟ್ಯಾಗ್‌ಗಳನ್ನು ಬಳಸಿಕೊಂಡ ತಲೆಹಿಡುಕರು, ರಾಜಧಾನಿ ಬೆಂಗಳೂರಿನಲ್ಲಿ ಮಾಂಸ ದಂಧೆಗೆ ಗ್ರಾಹಕರನ್ನು ಸೆಳೆಯುತ್ತಿರುವ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.

ಟಾಪ್ ಟ್ರೆಂಡಿಂಗ್‌ನಲ್ಲಿರುವ #KarnatakaElectrion2018, #SupremeCourt, #InteractWithModiinUK, #ElectionCommission, and #VivoIPL ಹ್ಯಾಷ್ ಟ್ಯಾಗ್‌ಗಳನ್ನು ಪಿಂಪ್‌ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾನೆ.

ಮತ್ತೂ ಆಘಾತಕಾರಿ ಸಂಗತಿ ಏನೆಂಜರೆ, ಈ ಪಿಂಪ್‌ ದಂಧೆಗೆ ಬಳಸಿಕೊಳ್ಳುತ್ತಿರುವ ಚಿತ್ರಗಳೆಲ್ಲ ವೇಶ್ಯೆಯರದಲ್ಲ. ಪ್ರತಿಷ್ಠಿತ ಚಿತ್ರನಟಿಯರು ಹಾಗೂ ಮಾಡೆಲ್‌ಗಳಾದ ರಾಕುಲ್ ಪ್ರೀತ್ ಸಿಂಗ್, ಪ್ರಿಯಾ ಮಣಿ, ಲಕ್ಷ್ಮೀ ರೈ, ಶ್ವೇತಾ ಬಸು ಪ್ರಸಾದ್ ಸೇರಿದಂತೆ ಹಲವರ ಭಾವಚಿತ್ರಗಳು ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ.

ವಿಜಯ ಕರ್ನಾಟಕದ ಸೋದರ ಪತ್ರಿಕೆ ಬೆಂಗಳೂರು ಮಿರರ್ ಈ ವಿಷಯವನ್ನು ಬಹಿರಂಗಗೊಳಿಸಿದ್ದು, ಆಸಕ್ತಿದಾಯಕ ವಿಷಯವೇನೆಂದರೆ, ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಕರ್ನಾಟಕ ವಿಧಾನಸಭೆ ಚುನಾವಣೆಗೆ ಸಂಬಂಧಿಸಿದ ಟ್ವಿಟರ್‌ ನಿರ್ವಾಹಕರಿಗೂ ದಂಧೆಕೋರ ಟ್ವೀಟ್‌ನ್ನು ಟ್ಯಾಗ್ ಮಾಡುತ್ತಿದ್ದಾನೆ. ಚುನಾವಣೆಯಿಂದ ಈತನಿಗಾಗಬೇಕಾದ್ದೇನೂ ಇಲ್ಲ, ಆದರೆ ತನ್ನ ಜಾಲಕ್ಕೆ ಸಹಾಯಕಾರಿಯಾಗಲೆಂದು ಟ್ರೆಂಡಿಂಗ್‌ನಲ್ಲಿರುವ ಹ್ಯಾಶ್ ಟ್ಯಾಗ್‌ಗಳನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾನೆ. ಕಳೆದ ಆ ತಿಂಗಳಿಂದ ಆತ ಈ ಕೃತ್ಯದಲ್ಲಿ ತೊಡಗಿದ್ದು ಇಲ್ಲಿಯವರೆಗೆ ಪೊಲೀಸರ ಬಲೆಗೆ ಬಿದ್ದಿಲ್ಲ.

ದಂಧೆಕೋರನನ್ನು ಬೆಂಗಳೂರು ಮಿರರ್ ಸಂಪರ್ಕಿಸಿದ್ದು ಹೀಗೆ

ಬೆಂಗಳೂರು ಮಿರರ್ ಲಭ್ಯವಿರುವ ದೂರವಾಣಿ ಸಂಖ್ಯೆಗೆ ಕರೆ ಮಾಡಿ ಸಂಪರ್ಕಿಸಿದಾಗ ದಂಧೆಕೋರ ತನ್ನ ಹೆಸರು ಹಾಗೂ ವಿಳಾಸ ತಿಳಿಸಲು ನಿರಾಕರಿಸಿದ್ದಾನೆ.

ಬೆಂ.ಮಿ: ಕರ್ನಾಟಕ ಚುನಾವಣೆ 2018ರ ಟ್ವೀಟ್‌ಗಳನ್ನು ಓದುವಾಗ ನಿಮ್ಮ ದೂರವಾಣಿ ಸಂಖ್ಯೆ ಲಭ್ಯವಾಗಿದೆ. ನಿಮ್ಮ ಸೇವೆಯ ಬಗ್ಗೆ ತಿಳಿದುಕೊಳ್ಳಬೇಕು.

ವ್ಯಕ್ತಿ: ನೀವು ತಂಬಾ ಅದೃಷ್ಟವಂತರು

ಬೆಂ.ಮಿ: ಯಾಕೆ?

ವ್ಯಕ್ತಿ: ನೀವು ಚುನಾವಣೆಗೆ ಸಂಬಂಧಿಸಿದ ವಿಷಯವನ್ನು ಹುಡುಕಿದ್ದೀರಾ. ಆದರೆ, ನಿಮಗೆ ಯುವತಿ ಸಿಕ್ಕಿದ್ದಾಳೆ.

(ಬೆಂ.ಮಿ: ನಿಮ್ಮ ಸೇವೆ, ಸ್ಥಳ ಹಾಗೂ ದರ ಕಳಿಸುವಂತೆ ಕೇಳಿದಾಗ)

ವ್ಯಕ್ತಿ: ವಾಟ್ಸಪ್‌ನಲ್ಲೊಂದು ಸಂದೇಶ ಕಳುಹಿಸಿ. ನಾನು ಮಾಹಿತಿ ಕಳುಹಿಸುತ್ತೇನೆ.

(ಬೆಂಗಳೂರು ಮಿರರ್ ವಾಟ್ಸಪ್‌ ಮೂಲಕ ಸಂದೇಶ ಕಳುಹಿಸಿದಾಗ ದಂಧೆಕೋರ 18 ಯುವತಿಯರ ಫೋಟೋಗಳನ್ನು ಕಳುಹಿಸಿದ್ದ. ಇದರಲ್ಲಿ ಬಹುತೇಕರು ಮಾಡೆಲ್‌ಗಳು)

ಬೆಂ.ಮಿ: ಸ್ಥಳ ಹಾಗೂ ದರ

ವ್ಯಕ್ತಿ: ನಿಮಗೆ ಬೇಕಾದ ಕಡೆ ಸೇವೆ ನೀಡುತ್ತೇವೆ.