ಅಖಾಡಕ್ಕಿಳಿದ ಸೈಬರ್‌ ಖದೀಮರು!

ಬೆಂಗಳೂರು: ಒಂದು ಕಡೆ ಐಎಂಎನಲ್ಲಿ ಹಣ ಹೂಡಿಕೆ ಮಾಡಿ ವಂಚನೆಗೆ ಒಳಗಾದ ಹೂಡಿಕೆದಾರರು ಕಣ್ಣೀರಿನಲ್ಲಿ ಕೈ ತೊಳೆಯುತ್ತಿದ್ದರೆ, ಮತ್ತೊಂದು ಕಡೆ ಸೈಬರ್‌ ಖದೀಮರು ಇದೇ ಸಂದರ್ಭವನ್ನು ದುರುಪಯೋಗಪಡಿಸಿಕೊಂಡು ಕಳ್ಳತನಕ್ಕೆ ಇಳಿದಿದ್ದಾರೆ.

ತಮ್ಮನ್ನು ತಾವು ಐಎಂಎ ಕಂಪನಿಯವರು ಎಂದು ಹೇಳಿಕೊಂಡು ಹೂಡಿಕೆದಾರರ ಮೊಬೈಲ್‌ಗೆ ಕರೆ ಮಾಡುತ್ತಿರುವ ಖದೀಮರು 'ನಿಮ್ಮ ಖಾತೆಗೆ ಹಣ ವರ್ಗಾವಣೆ ಮಾಡುತ್ತಿದ್ದೇವೆ. ನಿಮ್ಮ ಬ್ಯಾಂಕ್‌ ಖಾತೆ ನಂಬರ್‌ ಅದರ ಪಾಸ್‌ವರ್ಡ್‌, ಎಟಿಎಂ ಕಾರ್ಡ್‌ ನಂಬರ್‌, ಅದರ ಸಿವಿವಿ, ಪಾಸ್‌ವರ್ಡ್‌ ಇತ್ಯಾದಿಗಳನ್ನು ನೀಡಿ' ಎಂದು ಕೇಳಿ ಮಾಹಿತಿ ಪಡೆದುಕೊಳ್ಳುತ್ತಿರುವ ಬಗ್ಗೆ ಹಲವಾರು ಮಂದಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಏನು ಎಚ್ಚರಿಕೆ?: ಸಾರ್ವಜನಿಕರು ಮತ್ತು ಹೂಡಿಕೆದಾರರು ಐಎಂಎ ಹೆಸರಿನಲ್ಲಿ ಬರುವ ಕರೆಗಳಿಗೆ ಕಿವಿಗೊಡಬಾರದು. ಈ ರೀತಿ ಯಾವುದೇ ಕರೆಗಳು ಬಂದರೆ ಆ ಬಗ್ಗೆ ತಕ್ಷಣ ಸಮೀಪದ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಬೇಕು. ಯಾರೇ ಕರೆ ಮಾಡಿದರೂ ಬ್ಯಾಂಕ್‌ನ ವಿವರಗಳನ್ನು ನೀಡಬಾರದು. ಈ ರೀತಿ ಕರೆಗಳ ಮೂಲಕ ಬ್ಯಾಂಕ್‌ನ ವಿವರ ಪಡೆದು ಖಾತೆಯಲ್ಲಿರುವ ಹಣವನ್ನೂ ಲಪಟಾಯಿಸುವ ಸಲುವಾಗಿಯೇ ಸೈಬರ್‌ ಖದೀಮರು ಇಂಥಾ ಕೃತ್ಯಗಳಿಗೆ ಇಳಿದಿರುವ ಸಾಧ್ಯತೆಗಳಿವೆ ಎಂದು ಪೋಲಿಸ್‌ ಇಲಾಖೆ ಎಚ್ಚರಿಕೆ ನೀಡಿದೆ