ಬಿಜೆಪಿಯಿಂದ ಹೆಲಿಕಾಪ್ಟರ್‌ ಬಳಕೆ: ಠೇವಣಿ ಹಣ ಇರಿಸಲು ಆದೇಶ

ಬೆಂಗಳೂರು : ಹೆಲಿಕಾಪ್ಟರ್‌ ಬಳಕೆ ಸಂಬಂಧ ಬಾಕಿ ಹಣ ಪಾವತಿಸಲು ಎರಡು ವಾರಗಳಲ್ಲಿ 20 ಲಕ್ಷ ರೂ. ಮೊತ್ತವನ್ನು ಠೇವಣಿ ಇರಿಸುವಂತೆ ಬಿಜೆಪಿಗೆ ಹೈಕೋರ್ಟ್‌ ಆದೇಶಿಸಿದೆ.

ರಾಜ್ಯ ಬಿಜೆಪಿ ಘಟಕದ ಕಾರ್ಯದರ್ಶಿ ದಾಖಲಿಸಿದ್ದ ರಿಟ್‌ ಅರ್ಜಿಯನ್ನು ವಿಚಾರಣೆ ನಡೆಸಿದ ನ್ಯಾ.ಕೃಷ್ಣ ದೀಕ್ಷಿತ್‌ ಅವರಿದ್ದ ಏಕಸದಸ್ಯ ನ್ಯಾಯಪೀಠವು ಬುಧವಾರ ಆದೇಶ ಮಾಡಿದೆ.

ದಿಲ್ಲಿಯ ಒಎಸ್‌ಎಸ್‌ ಏರ್‌ ಮ್ಯಾನೇಜ್‌ಮೆಂಟ್‌ ಪ್ರೈ.ಲಿ. ಕಂಪನಿಯು ತನ್ನ ಹೆಲಿಕಾಪ್ಟರ್‌ ಹಾಗೂ ವಿಮಾನ ಸೇವೆಯನ್ನು 2014ರಲ್ಲಿ ಬಿಜೆಪಿ ಪಕ್ಷಕ್ಕೆ ನೀಡಿತ್ತು. ಹಣ ಪಾವತಿ ವಿಚಾರದಲ್ಲಿ ಐದು ವರ್ಷದಿಂದ ತಗಾದೆ ಇತ್ತು. ಈ ಸಿವಿಲ್‌ ದಾವೆಯನ್ನು ಒಂದು ವರ್ಷದೊಳಗೆ ವಿಲೇವಾರಿ ಮಾಡುವಂತೆ ಅಧೀನ ನ್ಯಾಯಾಲಯಕ್ಕೆ ನ್ಯಾಯಪೀಠವು ನಿರ್ದೇಶನವನ್ನು ನೀಡಿದೆ.