ಸಿದ್ದು ವಿರುದ್ಧ ಸೋನಿಯಾಗೆ ದೂರಿದ ಎಚ್‌ಡಿಡಿ

ಬೆಂಗಳೂರು : ದೋಸ್ತಿ ಸರಕಾರದ ಪತನ ನಿಶ್ಚಿತವಾಗುತ್ತಿದ್ದಂತೆ ಕಾಂಗ್ರೆಸ್‌ ವರಿಷ್ಠೆ ಸೋನಿಯಾ ಗಾಂಧಿ ಅವರಿಗೆ ಕರೆ ಮಾಡಿದ ಜೆಡಿಎಸ್‌ ವರಿಷ್ಠ ಎಚ್‌.ಡಿ.ದೇವೇಗೌಡರು ಮಾಜಿ ಸಿಎಂ ಸಿದ್ದರಾಮಯ್ಯ ವಿರುದ್ಧ ದೂರಿದ್ದಾರೆ.

ಸಿದ್ದು ಅಸಹಾಕಾರದ ಬಗ್ಗೆ ಲೋಕಸಭೆ ಚುನಾವಣೆ ಸಂದರ್ಭದಲ್ಲೆ ಕಾಂಗ್ರೆಸ್‌ ವರಿಷ್ಠರಿಗೆ ಗೌಡರು ಪತ್ರ ಬರೆದಿದ್ದರು. ಚುನಾವಣೆ ಬಳಿಕವೂ ರಾಹುಲ್‌ ಗಾಂಧಿ ಅವರನ್ನು ಭೇಟಿಯಾಗಿ ಸಿದ್ದು ವಿರುದ್ಧ ದೂರು ನೀಡಿದ್ದರು. ಸೋನಿಯಾ ಅವರನ್ನು ಸಂಪರ್ಕಿಸಿ ಈ ಎಲ್ಲ ಸಂಗತಿ ನೆನಪಿಸಿದ ಗೌಡರು ತಮ್ಮ ಸಲಹೆಯನ್ನು ಗಂಭೀರವಾಗಿ ಪರಿಗಣಿಸಲಿಲ್ಲ. ಹಾಗಾಗಿ ಇಂಥ ಪರಿಸ್ಥಿತಿ ನಿರ್ಮಾಣವಾಯಿತು ಎಂದರೆನ್ನಲಾಗಿದೆ.

ರಾಜೀನಾಮೆ ಕೊಟ್ಟಿರುವ ಶಾಸಕರಲ್ಲಿ ಹೆಚ್ಚಿನವರು ಸಿದ್ದು ಬೆಂಬಲಿಗರು. ಇದರಿಂದಲೇ ಸಿದ್ದು ಮನಸ್ಸಿನಲ್ಲಿ ಏನಿದೆಯೆಂದು ಅರ್ಥವಾಗುತ್ತದೆ. ಸಿದ್ದು ನಡೆಯಿಂದ ಕಾಂಗ್ರೆಸ್‌ಗೂ ಹಾನಿಯಾಗಲಿದೆ ಎಂದೂ ಗೌಡರು ಪ್ರಸ್ತಾಪಿಸಿರುವುದಾಗಿ ತಿಳಿದು ಬಂದಿದೆ.