ಕಾಂಗ್ರೆಸ್‌ಗೆ ಶಿಸ್ತಿನ ಚೌಕಟ್ಟು, ಪಕ್ಷದ ಸಭೆ, ಸಮಾರಂಭಗಳಲ್ಲಿ ಅಳವಡಿಸಲು ಚಿಂತನೆ

ಬೆಂಗಳೂರು: ಕಾಂಗ್ರೆಸ್ ಪಕ್ಷಕ್ಕೆ ಶಿಸ್ತಿನ ಚೌಕಟ್ಟನ್ನು ರೂಪಿಸಲು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ ಶಿವಕುಮಾರ್ ಮುಂದಾಗಿದ್ದಾರೆ. ಪಕ್ಷ ಸಂಘಟನೆಯ ಹಿನ್ನೆಲೆಯಲ್ಲಿ ನಡೆಯಲಿರುವ ವಿಭಾಗವಾರು ಸಭೆಗಳಲ್ಲಿ ಇದನ್ನು ಅಳವಡಿಸುವ ಮೂಲಕ ಪಕ್ಷಕ್ಕೆ ಹೊಸ ಸ್ವರೂಪ ನೀಡಲು ಮುಂದಾಗಿದ್ದಾರೆ.

ಮಾಸ್‌ ಬೇಸ್ ಆಗಿರುವ ಪಕ್ಷವನ್ನು ಕೇಡರ್‌ ಬೇಸ್‌ ಆಗಿ ಪರಿವರ್ತನೆ ಮಾಡುವ ಕೆಲಸ ಈಗಾಗಲೇ ನಡೆಯುತ್ತಿದೆ. ಉಡುಪಿ ಜಿಲ್ಲೆಯ ಕಾಪು ಹಾಗೂ ಬೆಳಗಾವಿ ಜಿಲ್ಲೆಯಲ್ಲಿ ಪಕ್ಷದ ಕಾರ್ಯಕರ್ತರಿಗೆ ಸೈದ್ಧಾಂತಿಕ ತರಗತಿಗಳು ನಡೆಯುತ್ತಿವೆ.

ಬಿಜೆಪಿ ಮಾದರಿಯಲ್ಲಿ ‘ಕೇಡರ್‌’ ಮೊರೆ ಹೋದ ಕಾಂಗ್ರೆಸ್‌, ಸತೀಶ್ ಜಾರಕಿಹೊಳಿಗೆ ಸಂಘಟನೆ ಹೊಣೆ?

ಇದರ ಮುಂದುವರಿದ ಭಾಗವಾಗಿ ಪಕ್ಷದ ಸಭೆಗಳಲ್ಲಿ ಶಿಸ್ತಿನ ಚೌಕಟ್ಟನ್ನು ರೂಪಿಸುವ ಪ್ರುಯತ್ನಕ್ಕೆ ಡಿಕೆಶಿ ಕೈಹಾಕಿದ್ದಾರೆ. ಅದರಂತೆ ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳದಲ್ಲಿ ಬುಧವಾರ ನಡೆದಿದ್ದ ಮೊದಲ ವಿಭಾಗವಾರು ಸಭೆಯಲ್ಲಿ ಈ ಪ್ರಯೋಗ ನಡೆದಿದೆ.

ಸಂಘದ ಹಿನ್ನೆಲೆ ಹೊಂದಿರುವ ಬಿಜೆಪಿ ಪಕ್ಷದಲ್ಲಿ ಶಿಸ್ತಿಗೆ ಹೆಚ್ಚಿನ ಆದ್ಯತೆ ಇದೆ. ಪಕ್ಷದ ಸಭೆ ಸಮಾರಂಭಗಳಲ್ಲಿ ಶಿಸ್ತು ಪಾಲನೆಗೆ ಒತ್ತು ನೀಡಲಾಗುತ್ತದೆ. ಆದರೆ ಕಾಂಗ್ರೆಸ್ ಪಕ್ಷದಲ್ಲಿ ಈ ಪರಿಪಾಠ ತೀರಾ ಇಲ್ಲ. ಪಕ್ಷದ ಪತ್ರಿಕಾಗೋಷ್ಠಿಯಿಂದ ಹಿಡಿದು ಸಭೆ ಸಮಾರಂಭಗಳಲ್ಲಿ ಅಶಿಸ್ತಿನ ವರ್ತನೆ ಸಹಜ ಎಂಬಂತೆ ಇರುತ್ತದೆ.

ಆದರೆ ಬುಧವಾರದ ಸಭೆಯನ್ನು ಬಹಳ ಭಿನ್ನವಾಗಿ ನಡೆಸಲಾಗಿತ್ತು. ಸದಾ ನಾಯಕರಿಂದ ತುಂಬಿರುವ ವೇದಿಕೆಯಲ್ಲಿ ಭಾಷಣಕಾರರು ಅವರ ಸರದಿ ಬಂದಾಗ ಮಾತ್ರ ಹೋಗಲು ಅವಕಾಶ ನೀಡಲಾಯಿತು. ಉಳಿದಂತೆ ಅವರೆಲ್ಲಾ ಸಭಾಂಗಣದಲ್ಲೇ ಕುಳಿತುಕೊಳ್ಳಬೇಕಾಗಿತ್ತು.

ಮೊಬೈಲ್ ಬಳಕೆ ಹಾಗೂ ಆಶಿಸ್ತು ತೋರಿದವರಿಗೆ ಕೆಪಿಸಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್ ಎಚ್ಚರಿಕೆ ನೀಡುತ್ತಿದ್ದರು. ಅಲ್ಲದೆ ಭಾಷಣದ ಆರಂಭದಲ್ಲಿ ಯಾರೂ ನಾಯಕರ ಹೆಸರನ್ನು ಉಲ್ಲೇಖಿಸಬೇಕಿರಲಿಲ್ಲ. ಹೀಗೆ ಎಐಸಿಸಿ ಅನುಮತಿಯೊಂದಿಗೆ ಶಿಸ್ತನ್ನು ಸಭೆಯಲ್ಲಿ ರೂಪಿಸಲಾಗಿತ್ತು. ಮುಂದಿನ ದಿನಗಳಲ್ಲಿ ಪಕ್ಷದ ಇತರ ಸಭೆ ಸಮಾರಂಭಗಳಲ್ಲಿ ಇದೇ ಮಾದರಿಯನ್ನು ಅನುಸರಿಸಲು ಕೆಪಿಸಿಸಿ ನಿರ್ಧರಿಸಿದೆ.