ಸುಪ್ರೀಂ ಆದೇಶಕ್ಕೆ ಸಡ್ಡು: ಅವಧಿಗೆ ಮುನ್ನವೇ ಪಟಾಕಿ ಸದ್ದು

ಬೆಂಗಳೂರು: ದೀಪಾವಳಿ ಸಂದರ್ಭದಲ್ಲಿ ಪಟಾಕಿ ಸಿಡಿಸಲು ಸುಪ್ರೀಂ ಕೋರ್ಟ್‌ ನಿಗದಿಪಡಿಸಿದ್ದ ಗಡುವಿಗೆ ನಾಗರಿಕರು ಹೆಚ್ಚು ಗಮನ ಕೊಟ್ಟಿಲ್ಲ ಎಂದು ಕಂಡುಬಂದಿದೆ.

ರಾಜ್ಯದ ಬಹುತೇಕ ಕಡೆಗಳಲ್ಲಿ ಬುಧವಾರ ಪಟಾಕಿಯ ಸದ್ದು ಕೇಳಿಬಂದಿತ್ತು.

ಸಂಜೆಯಾಗುತ್ತಲೇ ಪಟಾಕಿ ಅಬ್ಬರ ಜೋರಾಗಿ ಕಂಡುಬಂದಿತು. ರಾತ್ರಿ 8 ಗಂಟೆ ಬಳಿಕ ಪಟಾಕಿ ಸಿಡಿಸಬೇಕು ಎಂಬ ಆದೇಶವಿದ್ದರೂ ಜನರು ಆದೇಶಕ್ಕೆ ಕ್ಯಾರೇ ಎನ್ನಲಿಲ್ಲ. ಸಂಜೆ ಅಂಗಡಿ, ಮಳಿಗೆಗಳಲ್ಲಿ ಲಕ್ಷ್ಮಿ ಪೂಜೆ ಮುಗಿಸಿದ ವರ್ತಕರು ನೇರವಾಗಿ ರಸ್ತೆಗೆ ಬಂದು ಪಟಾಕಿ ಸಿಡಿಸುವುದರಲ್ಲಿ ನಿರತರಾದದ್ದು ಕಂಡುಬಂದಿತು.

ಸಂಜೆ 8 ಗಂಟೆಗೆ ಮುಂಚಿತವಾಗಿಯೇ ಪಟಾಕಿ ಅಬ್ಬರ ಕಂಡುಬಂದಿತು. ರಾತ್ರಿ 8 ರಿಂದ 10 ಗಂಟೆ ಒಳಗಾಗಿ ಪಟಾಕಿ ಸಿಡಿಸಬೇಕು ಎಂಬ ಸುಪ್ರೀಂ ಆದೇಶವನ್ನು ಜನರು ಪಾಲಿಸುವಂತೆ ಕ್ರಮ ಕೈಗೊಳ್ಳವ ಬಗ್ಗೆ ಹಾಗೂ ಆ ಕುರಿತು ಜನಜಾಗೃತಿ ಮೂಡಿಸುವ ಬಗ್ಗೆ ಪೊಲೀಸ್ ಇಲಾಖೆ ಯಾವುದೇ ಆಸಕ್ತಿ ಹಾಗೂ ಕ್ರಮ ವಹಿಸಿರಲಿಲ್ಲ.

ಹೀಗಾಗಿ ಸಾರ್ವಜನಿಕರು ಕೂಡ ನ್ಯಾಯಾಲಯದ ಆದೇಶಕ್ಕೆ ಸಡ್ಡು ಹೊಡೆದು ಪಟಾಕಿ ಸಿಡಿಸುವ ಮೂಲಕ ದೀಪಾವಳಿ ಆಚರಿಸಿದರು.