ಇಂದು ಡಿಕೆಶಿ ಜಾಮೀನು ಅರ್ಜಿ ವಿಚಾರಣೆ

ಹೊಸದಿಲ್ಲಿ: ಅಕ್ರಮ ಹಣ ವರ್ಗಾವಣೆ ಆರೋಪದಡಿ ತಿಹಾರ್‌ ಜೈಲುಪಾಲಾಗಿರುವ ಡಿ.ಕೆ. ಶಿವಕುಮಾರ್‌ ಜಾಮೀನು ಅರ್ಜಿ ವಿಚಾರಣೆಯನ್ನು ದಿಲ್ಲಿಯ ರೋಸ್‌ ಅವೆನ್ಯೂ ವಿಶೇಷ ನ್ಯಾಯಾಲಯ ಶನಿವಾರ ನಡೆಸಲಿದೆ.

ಇ.ಡಿ ಪರ ಹೆಚ್ಚುವರಿ ಸಾಲಿಸಿಟರ್‌ ಜನರಲ್‌ ಕೆ.ಎಂ. ನಟರಾಜ್‌, ಡಿಕೆಶಿ ಪರ ಹಿರಿಯ ವಕೀಲ ಅಭಿಷೇಕ್‌ ಮನು ಸಿಂಘ್ವಿ ವಾದ- ಪ್ರತಿವಾದ ಮುಂದುವರಿಸಲಿದ್ದಾರೆ.

ಗುರುವಾರ ಎರಡು ಗಂಟೆಗಳ ಕಾಲ ಕೆ.ಎಂ. ನಟರಾಜ್‌ ವಾದ ಮಂಡಿಸಿ, ''ಈ ಪ್ರಕರಣ ಘೋಷಿತ ಅಪರಾಧವಾಗಿದ್ದು ಜಾಮೀನು ಅರ್ಜಿಯನ್ನು ತಿರಸ್ಕರಿಸಬೇಕು,'' ಎಂದು ಒತ್ತಾಯಿಸಿದ್ದರು. ಇದಕ್ಕೆ ಪ್ರತ್ಯುತ್ತರಿಸಲು 2ಗಂಟೆಗೂ ಹೆಚ್ಚು ಕಾಲಾವಕಾಶ ಬೇಕೆಂದು ಸಿಂಘ್ವಿ ಮನವಿ ಮಾಡಿದ ಹಿನ್ನೆಲೆಯಲ್ಲಿವಿಚಾರಣೆಯು ಶನಿವಾರಕ್ಕೆ ಮುಂದೂಡಲಾಗಿತ್ತು.

ಡಿಕೆಶಿ ಭೇಟಿಯಾದ ಡಿಕೆಸು

ಕಳೆದ ಎರಡು ದಿನಗಳಿಂದ ತಿಹಾರ್‌ ಜೈಲಿನ ಬ್ಯಾರಕ್‌ ನಂ.7ರಲ್ಲಿರುವ ಮಾಜಿ ಸಚಿವ ಡಿಕೆಶಿ ಅವರನ್ನು ಸಹೋದರ ಡಿ.ಕೆ ಸುರೇಶ್‌ ಶುಕ್ರವಾರ ಭೇಟಿಯಾಗಿ ಚರ್ಚಿಸಿದರು. ಗುರುವಾರ ಕೋರ್ಟ್‌ ಹಾಲ್‌ನಲ್ಲಿನಡೆದ ವಾದ, ಪ್ರತಿವಾದಗಳ ವಿಷಯವನ್ನು ಡಿಕೆಸಿ ಜತೆ ಹಂಚಿಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ.