ರಾಜ್ಯದಲ್ಲಿ ಮತ್ತೆ ಕಾಣಿಸಿಕೊಂಡಿದೆ ಎಚ್‌1ಎನ್‌1, 40 ಪ್ರಕರಣ ಬೆಳಕಿಗೆ!

ಬೆಂಗಳೂರು: ರಾಜ್ಯದಲ್ಲಿ ಮತ್ತೆ ಎಚ್‌1ಎನ್‌1 (ಹಂದಿ ಜ್ವರ)ಸೋಂಕು ಹರಡಲು ಆರಂಭವಾಗಿದ್ದು, ಇದುವರೆಗೆ 40 ಪ್ರಕರಣಗಳು ವರದಿಯಾಗಿವೆ.

ಕೆಲ ತಿಂಗಳ ಹಿಂದಷ್ಟೆ ಡೆಂಗೆ ರೋಗ ಜನರಲ್ಲಿಆತಂಕ ಹುಟ್ಟುಹಾಕಿತ್ತು. ಈಗ ಎಚ್‌1ಎನ್‌1 ಸೋಂಕು ವೇಗವಾಗಿ ಹರಡುತ್ತಿದೆ. 2019 ರಲ್ಲಿ ಎಚ್‌1ಎನ್‌1 ನಿಂದ 96 ಮಂದಿ ಸಾವಿಗೀಡಾಗಿದ್ದು, 2 ಸಾವಿರಕ್ಕೂ ಹೆಚ್ಚು ಮಂದಿ ಕಾಯಿಲೆಗೊಳಗಾಗಿ ಬಳಲಿದ್ದರು. ನಂತರದ ದಿನಗಳಲ್ಲಿ ರೋಗ ನಿಯಂತ್ರಣ ಕ್ರಮಗಳನ್ನು ಕೈಗೊಂಡಿದ್ದರಿಂದ ಸೋಂಕು ಕಡಿಮೆಯಾಗಿತ್ತು. ಆದರೆ ಈ ವರ್ಷದ ಆರಂಭದಿಂದ ಮತ್ತೆ ಕಾಯಿಲೆ ಕಾಣಿಸಿಕೊಂಡಿದೆ.

ಉಡುಪಿಯಲ್ಲಿ 7, ದಕ್ಷಿಣ ಕನ್ನಡದಲ್ಲಿ 3, ದಾವಣಗೆರೆಯಲ್ಲಿ 3, ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ 2 ಪ್ರಕರಣಗಳು ಕಂಡುಬಂದಿವೆ. ರಾಜಧಾನಿ ಬೆಂಗಳೂರಿನಲ್ಲಿ 24 ಪ್ರಕರಣಗಳು ಕಂಡುಬಂದಿದ್ದು, ಬೇರೆ ಪ್ರದೇಶಗಳಿಗೆ ಹೋಲಿಸಿದರೆ ನಗರದಲ್ಲೇ ಅತಿ ವೇಗವಾಗಿ ಸೋಂಕು ಹರಡುತ್ತಿದೆ.