40 ಮಂದಿ ಪ್ರಾಣ ಉಳಿಸಿ ಜೀವ ತ್ಯಜಿಸಿದ ಚಾಲಕ

ಕೋಲಾರ: ರಾಜ್ಯ ರಸ್ತೆ ಸಾರಿಗೆ ಬಸ್‌ನ ಚಾಲಕರೊಬ್ಬರು ತೀವ್ರ ಹೃದಯಾಘಾತವಾದರೂ, ಚಲಿಸುತ್ತಿದ್ದ ಬಸ್‌ ಅನ್ನು ಸುರಕ್ಷಿತವಾಗಿ ನಿಲ್ಲಿಸಿ, ಪ್ರಾಣಬಿಟ್ಟ ಮನಕಲಕುವ ಘಟನೆ ಕೋಲಾರದ ನರಸಾಪುರ ಸಮೀಪ ಬುಧವಾರ ನಡೆದಿದೆ.

ಬಸ್‌ ಚಾಲಕನ ಸಮಯೋಚಿತ ಕೆಲಸದಿಂದ 40 ಮಂದಿ ಪ್ರಯಾಣಿಕರ ಪ್ರಾಣ ಉಳಿದಿದೆ. ಬೆಂಗಳೂರಿನ ಕೇಂದ್ರೀಯ ವಿಭಾಗದ 4ನೇ ಘಟಕದ ಐರಾವತ ಬಸ್‌ ಚಾಲಕ ಎಂ.ಜಯಶೀಲನ್‌ ಮೃತಪಟ್ಟ ಚಾಲಕ.

ಬೆಂಗಳೂರಿನಿಂದ ಚೆನ್ನೈಗೆ ಹೊರಟಿದ್ದ ಐರಾವತ ಬಸ್‌ ಚಾಲಕ ಜಯಶೀಲನ್‌ ಅವರಿಗೆ ಕೋಲಾರ ತಾಲೂಕಿನ ನರಸಾಪುರದ ಕಾಮತ್‌ ಉಪಾಹಾರದ ಬಳಿ ತೀವ್ರ ಹೃದಯಾಘಾತವಾಗಿದೆ. ನೋವನ್ನು ನುಂಗಿಕೊಂಡು ವೇಗದಲ್ಲಿದ್ದ ಬಸ್‌ ಅನ್ನು ನಿಲ್ಲಿಸಿದ ಬಳಿಕವೇ ಜಯಶೀಲನ್‌ ಪ್ರಾಣ ಬಿಟ್ಟಿದ್ದಾರೆ. ತನ್ನ ಪ್ರಾಣ ಅಪಾಯದಲ್ಲಿದ್ದ ಸಂದರ್ಭದಲ್ಲೂ ಜಯಶೀಲನ್‌ ಅವರು ತೋರಿದ ಕರ್ತವ್ಯಪ್ರಜ್ಞೆಯಿಂದ ಬಸ್‌ನಲ್ಲಿದ್ದ ಅಷ್ಟೂ ಪ್ರಯಾಣಿಕರ ಜೀವ ಉಳಿಯಿತು. ಘಟನೆ ಬಳಿಕ ಮತ್ತೊಂದು ಬಸ್‌ನಲ್ಲಿ ಪ್ರಯಾಣಿಕರನ್ನು ಕಳುಹಿಸಿಕೊಡಲಾಯಿತು. ವೇಮಗಲ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.