ರೆಸಾರ್ಟ್‌ನಲ್ಲಿ ಬರ ಅಧ್ಯಯನ: ಊಟ, ವಸತಿಗೆ 2.66 ಲಕ್ಷ ರೂ.!

ಮೈಸೂರು: ಬರಗಾಲದಿಂದ ತತ್ತರಿಸಿರುವ ರಾಜ್ಯದಲ್ಲಿ ಅಧಿಕಾರಿಗಳು ಕಬಿನಿ ಜಂಗಲ್‌ ಲಾಡ್ಜ್‌ನಲ್ಲಿ ನಡೆಸಿದ್ದ ಬರ ಅಧ್ಯಯನ ಹಾಗೂ ಕಾರ್ಯಾಗಾರಕ್ಕೆ ಊಟ ಹಾಗೂ ವಸತಿಗೆ ಸರಕಾರದಿಂದ 2.66 ಲಕ್ಷ ರೂ.ಗಳನ್ನು ವೆಚ್ಚ ಮಾಡಿರುವುದು ಬಹಿರಂಗವಾಗಿದೆ.

ಬರ ಅಧ್ಯಯನ ನೆಪದಲ್ಲಿ ಅಧಿಕಾರಿಗಳ ರೆಸಾರ್ಟ್ ಸಭೆ ಬಗ್ಗೆ ಜ.25 ರಂದು ವಿಜಯ ಕರ್ನಾಟಕ 'ಜಂಗಲ್‌ ಲಾಡ್ಜ್‌ನಲ್ಲಿ ಬರ ಅಧ್ಯಯನ' ಎಂಬ ವಿಶೇಷ ವರದಿ ಪ್ರಕಟಿಸಿತ್ತು. ಗ್ರಾಮೀಣಾಭಿವೃದ್ಧಿ ಹಾಗೂ ಪಂಚಾಯತ್‌ ರಾಜ್‌ ಸಚಿವ ಕೃಷ್ಣ ಭೈರೇಗೌಡ ಅವರ ಅಧ್ಯಕ್ಷತೆಯಲ್ಲಿಯೇ ನಡೆದ ಈ ಐಷಾರಾಮಿ ಸಭೆಯ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಆಕ್ರೋಶ ವ್ಯಕ್ತವಾಗಿತ್ತು.

ಉತ್ತರ ಕರ್ನಾಟಕ ಹೋರಾಟ ಸಮಿತಿಯ ರಾಜ್ಯಾಧ್ಯಕ್ಷ ಭೀಮಪ್ಪ ಗುಂಡಪ್ಪ ಗಡಾದ ಅವರು ಮಾಹಿತಿ ಹಕ್ಕಿನಡಿ 'ರೆಸಾರ್ಟ್ಸ್ ಬರ ಅಧ್ಯಯನ' ಸಭೆಯ ಕುರಿತು ಮಾಹಿತಿ ಪಡೆದಿದ್ದು, ಅದರಿಂದ ಸಭೆಯ ಖರ್ಚಿನ ವಿವರ ಬೆಳಕಿಗೆ ಬಂದಿದೆ.

''ಜ. 24ರಂದು ಕಬಿನಿ ಜಂಗಲ್‌ ಲಾಡ್ಜ್‌ನಲ್ಲಿ ಒಂದು ದಿನದ ಕಾರ್ಯಾಗಾರ ನಡೆಸಲಾಗಿದೆ. ಇದರಲ್ಲಿ ರಾಜ್ಯದ 30 ಜಿಲ್ಲೆಗಳ ಜಿ.ಪಂ. ಸಿಇಒಗಳು ಭಾಗವಹಿಸಿದ್ದರು. ಇವರ ವಸತಿ ಹಾಗೂ ಊಟೋಪಚಾರಕ್ಕೆ 2,66,461 ರೂ.ಗಳನ್ನು ಅಬ್ದುಲ್‌ ನಜೀರ್‌ ಸಾಬ್‌ ರಾಜ್ಯ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಸಂಸ್ಥೆಯ ಆರ್‌ಜಿಎಸ್‌ಎ ಅನುದಾನದಿಂದ ಭರಿಸಲಾಗುವುದು,'' ಎಂದು ಗ್ರಾಮೀಣಾಭಿವೃದ್ಧಿ ಇಲಾಖೆ ಸಾರ್ವಜನಿಕ ಸಂಪರ್ಕಾಧಿಕಾರಿ ಮಾಹಿತಿ ನೀಡಿದ್ದಾರೆ.

ಜ. 23ರಂದು ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಮೊದಲ ದಿನ ಸಭೆ ನಡೆದಿದ್ದು, ಮರುದಿನ ಅಧಿಕಾರಿಗಳು ಜಂಗಲ್‌ ಲಾಡ್ಜ್‌ಗೆ ತೆರಳಿದ್ದರು. ಜ. 25ರ ಬೆಳಗ್ಗೆ 7ರಿಂದ 9ರವರೆಗೆ ಅಲ್ಲಿ ಸಫಾರಿ ನಡೆಸಿದ ಅಧಿಕಾರಿಗಳು ಬಳಿಕ ಕಾರ್ಯಾಗಾರದಲ್ಲಿ ಭಾಗವಹಿಸಿದ್ದರು.