ಸಾವಿರ ಆಂಗ್ಲ ಮಾಧ್ಯಮ ತರಗತಿಗಳ ಪ್ರಾರಂಭಕ್ಕೆ ಚಾಲನೆ

ಬೆಂಗಳೂರು: ರಾಜ್ಯಾದ್ಯಂತ 2019-20ನೇ ಶೈಕ್ಷಣಿಕ ವರ್ಷದಿಂದ ಸರಕಾರಿ ಪ್ರಾಥಮಿಕ ಶಾಲೆಗಳಲ್ಲಿ 'ಒಂದು ಸಾವಿರ ಆಂಗ್ಲ ಮಾಧ್ಯಮ' ತರಗತಿಗಳನ್ನು ಪ್ರಾರಂಭಿಸುವ ಪ್ರಕ್ರಿಯೆಗೆ ಸರಕಾರ ಚಾಲನೆ ನೀಡಿದೆ. ಪ್ರಸ್ತುತ 947 ಇಂಗ್ಲಿಷ್‌ ಮಾಧ್ಯಮ ಶಾಲೆಗಳ ಪ್ರಾರಂಭಕ್ಕೆ ಸಂಬಂಧಿಸಿದಂತೆ ಜಿಲ್ಲಾವಾರು ಪಟ್ಟಿ ಬಿಡುಗಡೆ ಮಾಡಿದೆ.

ಶಿಕ್ಷಣ ಗುಣಮಟ್ಟ ಸುಧಾರಣೆಯಡಿ ಈ ಶಾಲೆಗಳನ್ನು ಪ್ರಾರಂಭಿಸಲು ಸರಕಾರ ಮುಂದಾಗಿದೆ. ಬೆಂಗಳೂರು ನಗರ ಜಿಲ್ಲೆಯಲ್ಲಿ ಅತಿಹೆಚ್ಚು ಅಂದರೆ, 122 ಮತ್ತು ಕೊಡಗಿನಲ್ಲಿ ಕೇವಲ 7 ಇಂಗ್ಲಿಷ್‌ ಮಾಧ್ಯಮ ಶಾಲೆಗಳನ್ನು ಪ್ರಾರಂಭಿಸಲು ಕ್ರಮ ಕೈಗೊಂಡಿದೆ.

ಸರಕಾರದ ಈ ನಿರ್ಧಾರಕ್ಕೆ ಸಾಹಿತಿಗಳು ಮತ್ತು ಕನ್ನಡಪರ ಹೋರಾಟಗಾರರಿಂದ ತೀವ್ರ ವಿರೋಧ ವ್ಯಕ್ತವಾಗಿತ್ತು. ಇಂಗ್ಲಿಷ್‌ ಮಾಧ್ಯಮ ಶಾಲೆಗಳ ಪ್ರಾರಂಭದಿಂದ ಕನ್ನಡ ಶಾಲೆಗಳು ಶಾಶ್ವತವಾಗಿ ಬಾಗಿಲು ಮುಚ್ಚಲಿವೆ ಎಂಬ ಕೂಗು ಕೇಳಿ ಬಂದಿತ್ತು. ಕನ್ನಡ ಶಾಲೆಗಳನ್ನು ಉಳಿಸಿಕೊಳ್ಳುವ ಸಲುವಾಗಿ ಸರಕಾರ ಇಂಗ್ಲಿಷ್‌ ಮಾಧ್ಯಮ ಶಾಲೆಗಳನ್ನು ಪ್ರಾರಂಭಿಸುವ ನಿರ್ಧಾರದಿಂದ ಹಿಂದೆ ಸರಿಯುವಂತೆ ಆಗ್ರಹಿಸಿದ್ದರು.

ಬಾಗಲಕೋಟ-28

ಬಳ್ಳಾರಿ-38

ಬೆಳಗಾವಿ-33

ಬೆಳಗಾವಿ,ಚಿಕ್ಕೋಡಿ- 38

ಬೆಂಗ್ರಾಮಾಂತರ-15

ಬೀದರ್‌-25

ಚಾಮರಾಜನಗರ-16

ಚಿಕ್ಕಬಳ್ಳಾಪುರ-19

ಚಿಕ್ಕಮಗಳೂರು-19

ಚಿತ್ರದುರ್ಗ- 22

ದಕ್ಷಿಣ ಕನ್ನಡ- 41

ದಾವಣಗೆರೆ-31

ಧಾರವಾಡ-27

ಗದಗ-16

ಹಾಸನ-28

ಹಾವೇರಿ-23

ಕಲಬುರಗಿ-38

ಕೋಲಾರ-23

ಕೊಪ್ಪಳ- 19

ಮಂಡ್ಯ- 27

ಮೈಸೂರು- 44

ರಾಯಚೂರು- 30

ರಾಮನಗರ-16

ಶಿವಮೊಗ್ಗ -28

ತುಮಕೂರು-25
ಮಧುಗಿರಿ- 17

ಉಡುಪಿ- 20

ಉತ್ತರ ಕನ್ನಡ-12

ಸಿರಸಿ- 12

ವಿಜಯಪುರ- 37

ಯಾದಗಿರಿ-19

ಸಂಪನ್ಮೂಲ ವ್ಯಕ್ತಿಗಳಿಗೆ ತರಬೇತಿ:

ಇಂಗ್ಲಿಷ್‌ ಶಾಲೆಗಳನ್ನು ಪ್ರಾರಂಭಿಸುವ ಸಂಬಂಧ ಎಂಆರ್‌ಪಿ (ಮಾಸ್ಟರ್‌ ರಿಸೋರ್ಸ್‌ ಪರ್ಸನ್‌) ಸಂಪನ್ಮೂಲ ವ್ಯಕ್ತಿಗಳಿಗೆ ಮೇ 2ರಿಂದ ಒಟ್ಟು 10 ದಿನಗಳ ಕಾಲ 'ಇಂಗ್ಲಿಷ್‌ ತರಬೇತಿ' ಕಾರ್ಯಾಗಾರವನ್ನು ರಾಜ್ಯ ಶಿಕ್ಷಣ ಸಂಶೋಧನೆ ಮತ್ತು ತರಬೇತಿ ಇಲಾಖೆ ಹಮ್ಮಿಕೊಂಡಿದೆ.