ಚಿಕ್ಕಬಾಣಾವರದ ಮನೆಯಲ್ಲಿ ಸ್ಫೋಟಕಕ್ಕೆ ಬಳಸುವ ಸಾಮಗ್ರಿಗಳ ವಶ

ಬೆಂಗಳೂರು: ಸ್ಫೋಟಕಗಳಿಗೆ ಬಳಸುವ ಅಪಾರ ಪ್ರಮಾಣದ ಕಚ್ಚಾ ವಸ್ತುಗಳು ಮತ್ತು ಅರೆಬರೆ ಕಚ್ಚಾ ಬಾಂಬ್‌ಗಳನ್ನು ಹೆಸರಘಟ್ಟ ರಸ್ತೆಯ ಚಿಕ್ಕಬಾಣಾವರದ ಮನೆಯೊಂದರಿಂದ ರಾಷ್ಟ್ರೀಯ ತನಿಖಾದಳ (ಎನ್‌ಐಎ) ಕೋಲ್ಕೊತ್ತಾ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆನ್ನಲಾಗಿದೆ.

ಜೂ.25 ರಂದು ದೊಡ್ಡಬಳ್ಳಾಪುರದಲ್ಲಿ ಬಂಧಿತನಾಗಿದ್ದ ಜೆಎಂಬಿ ಉಗ್ರ ಹಬೀಬುರ್‌ ರೆಹಮಾನ್‌ ನೀಡಿದ ಮಾಹಿತಿ ಆಧರಿಸಿ ಆ ಮನೆ ಪರಿಶೀಲಿಸಿದಾಗ ಬ್ಯಾಗ್‌ ಮತ್ತು ಚೀಲಗಳಲ್ಲಿ ತುಂಬಿ ಮೂಲೆಗೆ ಎಸೆದಿದ್ದ ಕಚ್ಚಾ ವಸ್ತುಗಳು ಪತ್ತೆಯಾಗಿವೆ ಎಂದು ತಿಳಿದು ಬಂದಿದೆ.
ಎಲ್ಲರೂ ಪರಾರಿ: ಬಾಂಗ್ಲಾ ಮೂಲದ ಜಮಾತ್‌ ಉಲ್‌ ಮುಜಾಹಿದ್ದೀನ್‌ ಉಗ್ರ ಸಂಘಟನೆ ಸದಸ್ಯರಾಗಿರುವ ಎಂಟತ್ತು ಉಗ್ರರ ತಂಡ ಚಿಕ್ಕಬಾಣಾವರ ಸುತ್ತ್ತ ರೂಂ ಮಾಡಿಕೊಂಡು ಆಶ್ರಯ ಪಡೆದಿದ್ದಲ್ಲದೆ ಬಾಂಬ್‌ ಮತ್ತು ಸ್ಫೋಟಕಗಳನ್ನು ಸಿದ್ಧಪಡಿಸುತ್ತಿತ್ತು ಎನ್ನುವ ಮಾಹಿತಿಯನ್ನು ಹಬೀಬುರ್‌ ಬಹಿರಂಗಪಡಿಸಿದ್ದನು. ಈ ಹಿಂದೆ ರಾಮನಗರದಲ್ಲಿ ಕಾರ್ಯಾಚರಣೆ ನಡೆಸಿದ್ದ ಎನ್‌ಐಎ ಅಧಿಕಾರಿಗಳು ಹಬೀಬುರ್‌ನ ಸಹಚರನೊಬ್ಬನನ್ನು ಬಂಧಿಸಿ ದಿಲ್ಲಿಗೆ ಕರೆದೊಯ್ದಿದ್ದರು. ಆ ವೇಳೆ ಚಿಕ್ಕಬಾಣಾವಾರದ ರೂಮಿನಲ್ಲಿ ನೆಲೆಸಿದ್ದ ಸಹಚರರೆಲ್ಲಾ ಪರಾರಿಯಾಗಿದ್ದಾರೆಂಬ ಮಾಹಿತಿಯೂ ಲಭ್ಯವಾಗಿದೆ.

ಹೆಸರಘಟ್ಟ ಸುತ್ತಲ್ಲಿನ ಪ್ರದೇಶದಲ್ಲಿ ಹಬೀಬುರ್‌ ಮತ್ತು ಸ್ನೇಹಿತರು ಬಳಸಿದ್ದ ಹಲವಾರು ಮನೆಗಳನ್ನು ಶೋಧಿಸಿದಾಗ ಒಂದು ಮನೆಯ ಬಾಡಿಗೆದಾರರು ಬಿಸಾಡಿದ್ದ ಕಸವನ್ನು ಮನೆಯ ಮಾಲೀಕನೇ ಬ್ಯಾಗ್‌ಗಳಲ್ಲಿ ತುಂಬಿಟ್ಟಿದ್ದರು. ಅದರಲ್ಲಿ ಸ್ಫೋಟಕಗಳ ಕಚ್ಚಾ ಸಾಮಗ್ರಿಗಳು ಮತ್ತು ಕೆಲವು ಪುಡಿಗಳು ಸಿಕ್ಕಿವೆ ಎನ್ನಲಾಗುತ್ತಿದೆ. ಆದರೆ ಎನ್‌ಐಎ ಅಧಿಕಾರಿಗಳಾಗಲೀ, ರಾಜ್ಯ ಆಂತರಿಕ ಭದ್ರತಾ ವಿಭಾಗದ ಅಧಿಕಾರಿಗಳಾಗಲೀ ಈ ಸಂಗತಿಯನ್ನು ಇದುವರೆಗೂ ಖಚಿತಪಡಿಸಿಲ್ಲ.