ಫೇಸ್‌ಬುಕ್‌ನಲ್ಲಿ ಟ್ರೆಂಡ್ ಸೃಷ್ಟಿಸಿದ ಹಳೇ ಫೋಟೋಗಳು!

ಬೆಂಗಳೂರು: ಇದ್ದಕ್ಕಿದ್ದಂತೆ ಮೊಬೈಲ್ ನೋಟಿಫಿಕೇಶನ್ ಸದ್ದು ಮಾಡುತ್ತದೆ. ಫೇಸ್‌ಬುಕ್‌ನಲ್ಲಿ ನಿಮ್ಮ ಗೆಳೆಯ ನಿಮ್ಮ ಫೋಟೋಗೆ ನೈಸ್ ಎಂದ ಕಮೆಂಟ್ ಮಾಡಿ ಲೈಕ್ ಮಾಡಿರುವುದಾಗಿ ಅದು ಹೇಳುತ್ತದೆ. ಯಾವ ಫೋಟೋಗೆ ನೈಸ್ ಎಂದಿರಬಹುದು ಎಂದು ತೆರೆದು ನೋಡಿದರೆ, ಅದು 2011ರಲ್ಲಿ ಫೇಸ್‌ಬುಕ್ ಖಾತೆ ತೆರೆದಾಗ ಹಾಕಿದ್ದ ಹಳೇ ಫೋಟೋ.

ಇದು ಕಳೆದ ನಾಲ್ಕು ದಿನಗಳಿಂದ ಫೇಸ್‌ಬುಕ್‌ನಲ್ಲಿ ಸೃಷ್ಟಿಯಾಗಿರುವ ಹೊಸ ಟ್ರೆಂಡ್.. ಗೆಳೆಯ ಗೆಳತಿಯರ ಹಳೇ ಫೋಟೋಗಳನ್ನು ಅವರ ಫೇಸ್‌ಬುಕ್ ಅಲ್ಬಂನಿಂದ ಹುಡುಕಿ ತೆಗೆದು ಅದಕ್ಕೆ ನೈಸ್ ಎಂದು ಕಮೆಂಟ್ ಹಾಕುವುದು ಇಲ್ಲವೇ ಹಾಹಾ ಎಂದು ರಿಯಾಕ್ಟ್ ಮಾಡಿ ಸುಮ್ಮನಿದ್ದುಬಿಡುವುದು. ಆ ಸಂದರ್ಭದಲ್ಲಿ ಅವರ ಖಾತೆಯಲ್ಲಿ ಎಲ್ಲೋ ಮೂಲೆಯಲ್ಲಿದ್ದ ಫೋಟೋ ಒಂದು ಮುಖ್ಯ ಟೈಮ್‌ಲೈನ್ ನ್ಯೂಸ್‌ಫೀಡ್‌ಗೆ ಬರುತ್ತದೆ. ಫೇಸ್‌ಬುಕ್ ಓಪನ್ ಮಾಡುತ್ತಿದ್ದಂತೆ ಅದು ಮತ್ತಷ್ಟು ಜನರಿಗೆ ಗೋಚರಿಸುತ್ತದೆ.

ಮಂಗಳೂರು ಮೂಲದ ಕೆಲವರು ತಮ್ಮ ಗೆಳೆಯರನ್ನು ಗೋಳು ಹೊಯ್ದುಕೊಳ್ಳಲು ಆರಂಭಿಸಿದ ಈ ತಂತ್ರ ಈಗ ಎಲ್ಲೆಡೆ ವೈರಲ್ ಆಗುತ್ತಿದೆ. 2009ರಲ್ಲಿ ಮತ್ತು ಅದರ ನಂತರದಲ್ಲಿ ಫೇಸ್‌ಬುಕ್ ಖಾತೆ ತೆರೆದು ಅದರಲ್ಲಿ ಅಪ್‌ಲೋಡ್ ಮಾಡಿದ್ದ ಫೋಟೋಗಳು ಎಲ್ಲವೂ ಈಗ ಮೇಲೆದ್ದು ಬರುತ್ತಿದೆ. ಜತೆಗೆ ಈ ಟ್ರೆಂಡ್ ಸಾಕಷ್ಟು ಟ್ರೋಲ್‌ಗೂ ಗುರಿಯಾಗುತ್ತಿದೆ. ಗೆಳೆಯರ ಹಳೇ ಫೋಟೋಗಳು ಮತ್ತು 7-8 ವರ್ಷದ ಹಿಂದಿನ ಅವತಾರಗಳನ್ನು ಈಗ ನೋಡಿದರೆ ನಗು ಬರುವ ಜತೆಗೆ, ಆ ವ್ಯಕ್ತಿಗೂ ನಿಜಕ್ಕೂ ನಾನು ಅವಾಗ ಹೀಗೆ ಇದ್ದೆನಾ ಎಂದು ಅನ್ನಿಸುತ್ತಿದೆ.

ಈ ಬಗೆಗಿನ ಜೋಕ್‌ಗಳು ಕೂಡ ಜನಪ್ರಿಯವಾಗುತ್ತಿದ್ದು, ಸದ್ಯಕ್ಕಂತೂ ನಿಲ್ಲುವ ಹಾಗೆ ಕಾಣಿಸುತ್ತಿಲ್ಲ. ಕಳೆದ 2-3 ದಿನಗಳಲ್ಲಂತೂ ಫೇಸ್‌ಬುಕ್‌ನ ಬಳಕೆದಾರರು ಲೈಕ್ ಮತ್ತು ಕಮೆಂಟ್ ನೋಟಿಫೀಕೇಶನ್ ಬಂದಕೂಡಲೇ ಈ ಬಾರಿ ಯಾವ ಫೋಟೋ ಸಿಕ್ಕಿದೆಯೋ ಎಂದು ಗಾಬರಿಪಟ್ಟುಕೊಳ್ಳುವಂತಾಗಿದೆ.

ಹಳೇ ಫೋಟೋಗಳು ಇದ್ದಕ್ಕಿಂತೆ ಮೇಲೆದ್ದು ಬರುತ್ತಿದ್ದಂತೆ ಫೇಸ್‌ಬುಕ್‌ನಲ್ಲಿ ಏನೋ ಸಮಸ್ಯೆಯಾಗಿರಬೇಕು ಎಂದು ಅಂದುಕೊಂಡಿದ್ದ ಬಳಕೆದಾರರು ಪರಿಶೀಲಿಸಿದಾಗ, ಅದು ಗೆಳೆಯರ ಕಿತಾಪತಿ ಎಂದು ಗೊತ್ತಾಗಿದೆ. ಒಟ್ಟಿನಲ್ಲಿ ಹಳೆಯ ಫೋಟೋಗಳು ಕೆಲವರಿಗೆ ಹಳೆ ನೆನಪನ್ನು ತಂದುಕೊಟ್ಟರೆ, ಮತ್ತೆ ಕೆಲವರಿಗೆ ಮಾತ್ರ ತಮ್ಮ ಮಾನ ಎಲ್ಲ ಹರಾಜಾಯಿತು ಎಂದು ಬೊಬ್ಬಿಟ್ಟುಕೊಳ್ಳುವಂತೆ ಮಾಡಿದೆ.

ಕೆಲವು ಸ್ಯಾಂಪಲ್‌ಗಳು ಇಲ್ಲಿವೆ:
ಕೇರಳದಲ್ಲಿ ಬಂದ ನಿಫಾ ವೈರಸ್ ಜೀವ ತೆಗೆಯಿತು, ಆದರೆ ಮಂಗಳೂರಿನ ಹೊಸ ಫೇಸ್‌ಬುಕ್ ವೈರಸ್ ಜನರ ಮರ್ಯಾದೆ ತೆಗೆಯುತ್ತಿದೆ.


ಡಿಎಸ್‌ಎಲ್‌ಆರ್‌ನಲ್ಲಿ ಫೋಟೋ ತೆಗೆದು ಶೋಕಿ ಮಾಡಿದವರ ಹಣೆಬರಹ ಈಗ ಫೇಸ್‌ಬುಕ್‌ನಲ್ಲಿ ಹೊರಬರುತ್ತಿದೆ.


ನಿಮ್ಮ ಹಳೇ ಫೋಟೋಗಳನ್ನು ನೋಡಿದ ಮೇಲೂ ಆಕೆ ನಿಮಗೆ ಮೆಸೇಜ್ ಮಾಡುತ್ತಿದ್ದಾಳೆ ಎಂದಾದರೆ ಆಕೆಯನ್ನು ಮದುವೆಯಾಗಿ..


ಸತ್ಯ ಹೇಳುತ್ತೇನೆ ಲೀಲಕ್ಕ, ನಾನು ಈ ಮೂರು ದಿನದಲ್ಲಿ ನಕ್ಕಷ್ಟು ನನ್ನ ಜೀವನದಲ್ಲೇ ನಕ್ಕಿಲ್ಲ..