ಹೋಟೆಲ್‌ನಲ್ಲೇ ಶಾಸಕರನ್ನು ಭೇಟಿ ಮಾಡಿದ ಕುಟುಂಬವರ್ಗ

ಬೆಂಗಳೂರು: ಚುನಾವಣೆ ಗೆದ್ದ ಮರುಕ್ಷಣವೇ ನಾಯಕರ ಕಟ್ಟಪ್ಪಣೆಯಂತೆ 'ಸುರಕ್ಷಿತ ಕೋಟೆ' ಸೇರಿಕೊಂಡಿದ್ದ ಶಾಸಕರಿಗೆ ಶನಿವಾರ ರಾತ್ರಿಯಿಂದ ನೆಮ್ಮದಿ ಸಿಕ್ಕಿದೆ. ಹೋಟೆಲ್‌ ವಾಸ್ತವ್ಯದಲ್ಲೇ ಉಳಿದಿರುವ ಶಾಸಕರನ್ನು ಅವರ ಕುಟುಂಬ ವರ್ಗದವರು ಭಾನುವಾರ ಭೇಟಿ ಮಾಡಿದರು.

ಬಿಜೆಪಿಯ 'ಆಪರೇಷನ್‌ ಕಮಲ'ದ ಭೀತಿಯಿಂದ ಕಾಂಗ್ರೆಸ್‌, ಜೆಡಿಎಸ್‌ ತಮ್ಮ ಶಾಸಕರನ್ನು ಹಿಡಿದಿಟ್ಟುಕೊಂಡಿದ್ದರು. ಶನಿವಾರ ಯಡಿಯೂರಪ್ಪ ವಿಶ್ವಾಸಮತಕ್ಕೆ ಸೋಲಾದರೂ, ನೂತನ ಸರಕಾರದ ಪದಗ್ರಹಣದ ವರೆಗೆ ಶಾಸಕರನ್ನು ಒಟ್ಟಿಗೇ ಉಳಿಸಿಕೊಳ್ಳಲಾಗುತ್ತಿದೆ. ಹೀಗಾಗಿ, ಹಲವು ಶಾಸಕರ ಸಂಬಂಧಿಕರು ಹೋಟೆಲ್‌ಗೇ ಆಗಮಿಸಿ ಭೇಟಿ ಮಾಡಿದರು. ಕುಟುಂಬದಿಂದ ದೂರ ಉಳಿದಿದ್ದ ಶಾಸಕರು ತಾವು ತಂಗಿರುವ ಹೋಟೆಲ್‌ನಲ್ಲಿ ಅವರೊಟ್ಟಿಗೆ ಊಟ ಮಾಡಿ ಸಮಯ ಕಳೆದರು.