ಫೊನಿ ಚಂಡಮಾರುತ: ರಾಜಧಾನಿಯಲ್ಲಿ ಹೆಚ್ಚಾದ ತಾಪಮಾನ

ಬೆಂಗಳೂರು: ಫೊನಿ ಚಂಡಮಾರುತದ ಬಳಿಕ ಬೆಂಗಳೂರು ನಗರದಲ್ಲಿ ತೇವಾಂಶ ಕೊರತೆಯಾಗಿದೆ. ಇದರಿಂದಾಗಿ ಒಂದೇ ದಿನದಲ್ಲಿ ಗರಿಷ್ಠ ತಾಪಮಾನ ಎರಡು ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಿದೆ.

ಮಳೆ ನಿಂತ ನಂತರ ತಾಪಮಾನ 33 ಡಿಗ್ರಿ ಸೆಲ್ಸಿಯಸ್‌ನಲ್ಲಿ ಮುಂದುವರಿದಿತ್ತು. ಭಾನುವಾರ ನಗರದ ಕೇಂದ್ರಭಾಗದಲ್ಲಿ ಎರಡು ಡಿಗ್ರಿ ಏರಿಕೆಯಾಗಿ 35.5 ಡಿಗ್ರಿ ಸೆಲ್ಸಿಯಸ್‌ ತಾಪಮಾನ ದಾಖಲಾಗಿದೆ. ಇದರಿಂದ ಏಪ್ರಿಲ್‌ ಆರಂಭದಲ್ಲಿ ಕಾಣಿಸಿಕೊಂಡಿದ್ದ ಸೆಕೆ ಮೇ ಆರಂಭದಲ್ಲೂ ಕಂಡುಬಂದಿದೆ. ಮಳೆ ಬಂದ ಬಳಿಕ ಮೋಡಗಳು ದೂರ ಸರಿದು ತೇವಾಂಶ ಕೊರತೆಯಾಗಿರುವುದರಿಂದ ಈ ರೀತಿ ತಾಪಮಾನದಲ್ಲಿ ಏರಿಕೆಯಾಗಿ ಸೆಕೆಯ ಕಿರಿಕಿರಿ ಉಂಟಾಗುತ್ತಿದೆ. ಉತ್ತರ ಒಳನಾಡಿನಲ್ಲಿ ಅಲ್ಲಲ್ಲಿ ಬಿಸಿಗಾಳಿ ಬೀಸುತ್ತಿರುವುದು ಕೂಡ ಸೆಕೆ ಏರಿಕೆಗೆ ಒಂದು ಕಾರಣ. ಆಂಧ್ರಪ್ರದೇಶ ಹಾಗೂ ತೆಲಂಗಾಣದಲ್ಲಿ ಈಗಾಗಲೇ ಬಿಸಿಗಾಳಿ ಇದೆ. ಇದು ರಾಜ್ಯದ ಗಡಿಭಾಗದ ಜಿಲ್ಲೆಗಳಿಗೂ ವ್ಯಾಪಿಸಿದೆ. ರಾಜ್ಯದ ಒಳಗೆ ಬಿಸಿಗಾಳಿ ಬಂದಿರುವುದರ ಪರಿಣಾಮವಾಗಿ ಬೇರೆ ಭಾಗಗಳಲ್ಲೂ ಸೆಲೆ ಏರಿಕೆಯಾಗಿದೆ.