ಬೆಂಗಳೂರು: ಸಣ್ಣ ರೈತರು ಕೀಟನಾಶಕಗಳ ಸಿಂಪಡನೆಗೆ ಡ್ರೋನ್‌ ಬಳಸಬೇಕು ಎಂದ ತಜ್ಞ ಕೋಟ ನಾರಾಯಣರಾವ್, ಉಪಯೋಗವೇನು?

ಬೆಂಗಳೂರು: ಭಾರತದಂತಹ ಕೃಷಿ ಆಧಾರಿತ ದೇಶದಲ್ಲಿ ಸಣ್ಣ ಹಿಡುವಳಿದಾರರು ಕೂಡ ಡ್ರೋನ್‌ ತಂತ್ರಜ್ಞಾನವನ್ನು ಪರಿಣಾಮಕಾರಿಯಾಗಿ ಬಳಸುವಂತಾಗಬೇಕು ಎಂದು ತಜ್ಞ ಕೋಟ ನಾರಾಯಣರಾವ್‌ ಅಭಿಪ್ರಾಯಪಟ್ಟರು. ಬೆಂಗಳೂರು ತಂತ್ರಜ್ಞಾನ ಮೇಳ (ಬಿಟಿಎಸ್‌-2020)ದ ಭಾಗವಾಗಿ ನಡೆದ ವರ್ಚುಯಲ್‌ ಸಂವಾದದಲ್ಲಿ ಆರೋಗ್ಯ, ಕೃಷಿ ಮತ್ತು ವಿಪತ್ತುಗಳ ನಿರ್ವಹಣೆಯಲ್ಲಿ ಡ್ರೋನ್‌ ಮತ್ತು ರೋಬೋಟ್‌ಗಳು ವಹಿಸುತ್ತಿರುವ ನಿರ್ಣಾಯಕ ಪಾತ್ರಗಳ ಕುರಿತು ಮಾತನಾಡಿದ ಅವರು, ''ಇತ್ತೀಚಿನ ವರ್ಷಗಳಲ್ಲಿಡ್ರೋನ್‌ ತಂತ್ರಜ್ಞಾನದಲ್ಲಿಸಾಕಷ್ಟು ಹೊಸ ಆವಿಷ್ಕಾರಗಳಾಗಿವೆ. ಇದರಿಂದಾಗಿ ರೈತರು ದೊಡ್ಡ ಪ್ರಮಾಣದಲ್ಲಿಯೇ ಡ್ರೋನ್‌ ಬಳಕೆ ಮಾಡಲು ಸಾಧ್ಯವಾಗುತ್ತಿದೆ.

ಆದರೆ, ಎರಡು-ಮೂರು ಎಕರೆ ಜಮೀನು ಹೊಂದಿರುವ ರೈತರು ಅಗತ್ಯಕ್ಕೆ ತಕ್ಕಂತೆ ಬಳಸುವಂತಹ ತಂತ್ರಜ್ಞಾನ ಅಭಿವೃದ್ಧಿಯಾಗಬೇಕು,'' ಎಂದರು. ರೈತರು ಕೀಟನಾಶಕಗಳನ್ನು ಸಿಂಪಡಣೆ ಮಾಡಲು ಅನುಕೂಲವಾಗುವಂತೆ ಡ್ರೋನ್‌ಗಳನ್ನು ತಯಾರಿಸಲಾಗಿದೆ. ನೋಝಲ್‌ ತಂತ್ರಜ್ಞಾನ ಸಾಕಷ್ಟು ಸುಧಾರಣೆ ಕಂಡಿದ್ದು, ಕೀಟನಾಶಕದ ಹನಿಗಳು ಹೊಲದ ನಿರ್ದಿಷ್ಟ ಜಾಗದಲ್ಲಿಯೇ ಬೀಳುವ ಹಾಗೆ ಮಾಡಿದರೆ ಸಣ್ಣ ಹಿಡುವಳಿದಾರರಿಗೆ ಹೆಚ್ಚಿನ ಅನುಕೂಲವಾಗುವುದರಲ್ಲಿಅನುಮಾನವಿಲ್ಲ'' ಎಂದರು.

ಬೆಂಗಳೂರಿನಲ್ಲಿ ಡ್ರೋನ್‌ಗೆ ಸಂಬಂಧಿಸಿದ ಹಲವು ನವೋದ್ಯಮಗಳು ಹುಟ್ಟಿಕೊಂಡಿವೆ. ಹಾಗಾಗಿ, ಡ್ರೋನ್‌ಗಳನ್ನು ಕೈಗೆಟಕುವ ಬೆಲೆಯಲ್ಲಿ ದೊರೆಯುವಂತೆ ಮಾಡುವ ದೊಡ್ಡ ಸವಾಲು ನಮ್ಮ ಮುಂದಿದೆ ಎಂದು ನಾರಾಯಣರಾವ್‌ ತಿಳಿಸಿದರು. ಕಳೆದ ಹತ್ತು ವರ್ಷಗಳ ಅವಧಿಯಲ್ಲಿ ದೇಶದಲ್ಲಿ ನೀರಿನ ಲಭ್ಯತೆ ಶೇ.80ರಷ್ಟು ಕಡಿಮೆಯಾಗಿದೆ.

ಕರ್ನಾಟಕದಲ್ಲಿ ಈ ಪ್ರಮಾಣ ಶೇ.40ರಷ್ಟಿದೆ. ಈ ಅವಧಿಯಲ್ಲಿ ಕೃಷಿ ಭೂಮಿಯೂ ಕಡಿಮೆಯಾಗುತ್ತ ಸಾಗಿದೆ. ಹಾಗಾಗಿ, ನಮ್ಮ ರೈತರನ್ನು ಹೆಚ್ಚು ತಂತ್ರಜ್ಞಾನದ ಕಡೆಗೆ ಸೆಳೆಯುವಂತೆ ಮಾಡಬೇಕು. ಈ ನಿಟ್ಟಿನಲ್ಲಿ ಡ್ರೋನ್‌ಗಳು ರೈತರ ಪಾಲಿಗೆ ಅದೃಷ್ಟದ ಬಾಗಿಲನ್ನು ತೆರೆಯಬೇಕು ಎಂದು ರಾವ್‌ ಆಶಿಸಿದರು.