ಕಾರವಾರ: ನೀರು ಪಾಲಾಗಿದ್ದವರಲ್ಲಿ ಮತ್ತೆ ಮೂವರ ಶವ ಪತ್ತೆ

ಕಾರವಾರ: ಚೆಂಡಿಯಾ ನಾಗರಮಡಿ ಫಾಲ್ಸ್ ನಲ್ಲಿ ಪ್ರವಾಸಕ್ಕೆ ಬಂದು ನೀರುಪಾಲಾಗಿದ್ದವರಲ್ಲಿ ಮೂವರ ಮೃತದೇಹಗಳು ಸೋಮವಾರ ಪತ್ತೆಯಾಗಿವೆ.

ಮಡಗಾಂವ್ ರಾಯ್ ಗ್ರಾಮದ ಆರುಮಂದಿ ನೀರುಪಾಲಾಗಿದ್ದು, ಮಹಿಳೆಯರಿಬ್ಬರ ದೇಹ ಮಾತ್ರ ನಿನ್ನೆ ಪತ್ತೆಯಾಗಿತ್ತು. ರೇಣುಕಾ ಎಂಬವರಿಗೆ ಶೋಧ ಕಾರ್ಯ ಮುಂದುವರೆದಿದೆ.

ಇತ್ತೀಚೆಗೆ ಬಿದ್ದ ಭಾರಿ ಮಳೆಯಿಂದಾಗಿ ನಾಗರಮಡಿ ಫಾಲ್ಸ್‌ನಲ್ಲಿ ಭಾರಿ ನೀರು ಹರಿದು ಬಂದಿತ್ತು. ಇಲ್ಲಿ ಇಳಿಯಬಾರದು ಎಂದು ಸೂಚನೆ ನೀಡಿದ್ದರೂ ಪ್ರವಾಸಿಗರು ಇದನ್ನು ಲೆಕ್ಕಿಸದೇ ನೀರಿಗೆ ಇಳಿದಿದ್ದಾರೆ ಎಂದು ತಿಳಿದುಬಂದಿದೆ.

ಜಲಪಾತದ ಪ್ರವಾಹದಲ್ಲಿ ಗೋವಾದ ಮಡಗಾಂವ್ ಮೂಲದ ಆರು ಪ್ರವಾಸಿಗರು ಕೊಚ್ಚಿ ಹೋಗಿದ್ದರು. ಈ ಪೈಕಿ ಪ್ರೆಸಿಲ್ಲಾ ಹಾಗೂ ಫಿಯಾನ ಎಂಬುವವರ ಮೃತದೇಹ ಭಾನುವಾರ ಸಂಜೆ ದೊರೆತಿತ್ತು. ಬಳಿಕ ರಾತ್ರಿ ಕಾರ್ಯಾಚರಣೆ ಸ್ಥಗಿತಗೊಳಿಸಲಾಗಿತ್ತು. ಸೋಮವಾರ ಬೆಳಗ್ಗೆ ೬ ಗಂಟೆಯಿಂದಲೇ ನಾಪತ್ತೆಯಾದವರ ಹುಡುಕಾಟ ಆರಂಭಿಸಲಾಗಿದ್ದು ಸಿದ್ದು ಚೆರಿ, ಸಂದೀಪ ಗಾವಡೆ ಹಾಗೂ ಮಾರ್ಸಲಿನಾ ಎಂಬುವವರ ಶವಗಳು ದೊರೆತಿವೆ.