ಮಲ್ಟಿಪ್ಲೆಕ್ಸ್‌ಗಳಲ್ಲಿ ತಿಂಡಿ ತಿನಿಸು ದರ ದುಬಾರಿ: ಹೈಕೋರ್ಟ್‌ನಲ್ಲಿ ಪಿಐಎಲ್‌

ಬೆಂಗಳೂರು: ಮಲ್ಟಿಪ್ಲೆಕ್ಸ್‌ ಚಿತ್ರಮಂದಿರಗಳಲ್ಲಿ ತಿಂಡಿ ತಿನಿಸುಗಳಿಗೆ ದುಬಾರಿ ದರ ವಿಧಿಸುವುದನ್ನು ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆ ಹೂಡಲಾಗಿದೆ.

ನೆಲಮಂಗಲದ ವಾಸಿ ಆದಿನಾರಾಯಣಶೆಟ್ಟಿ ಸಲ್ಲಿಸಿರುವ ಅರ್ಜಿ ಸೋಮವಾರ ಸಿಜೆ ದಿನೇಶ್‌ ಮಹೇಶ್ವರಿ ನೇತೃತ್ವದ ಹೈಕೋರ್ಟ್‌ ವಿಭಾಗೀಯ ಪೀಠದಲ್ಲಿ ವಿಚಾರಣೆಗೆ ಬಂದಿತು.

ಅರ್ಜಿದಾರರ ಪರ ವಾದಿಸಿದ ವಕೀಲ ಸುನೀಲ್‌ ಕುಮಾರ್‌ '' ಮಲ್ಟಿಪ್ಲೆಕ್ಸ್‌ ಚಿತ್ರಮಂದಿರಗಳಲ್ಲಿ ತಿಂಡಿ ತಿನಿಸು, ಪಾನಿಯಾಗಳಿಗೆ ನಿಗದಿಗಿಂತಲೂ ಹೆಚ್ಚು ದರ ವಸೂಲಿ ಮಾಡುತ್ತಿದ್ದಾರೆ. ಹೊರಗಿನ ತಿಂಡಿ ತಿನಿಸುಗಳನ್ನು ಒಯ್ಯಲು ಬಿಡುವುದಿಲ್ಲ. ನಿಗದಿತ ದರಕ್ಕಿಂತ ಹತ್ತುಪಟ್ಟು ಅಧಿಕ ಚಾರ್ಜ್‌ ಮಾಡಲಾಗುತ್ತಿದೆ. ಜೊತೆಗೆ ಅಲ್ಲಿ ಸಿಗುವುದೆಲ್ಲವೋ ಜಂಕ್‌ ಫುಡ್‌, ಬೇರೆ ಆಹಾರ ಆಯ್ಕೆಗೆ ಅವಕಾಶವಿರುವುದಿಲ್ಲ ''ಎಂದರು.

ದರ ನಿಯಂತ್ರಣಕ್ಕೆ ಸೂಚನೆ ನೀಡಬೇಕು, ಇಲ್ಲವೇ ಹೊರಗಿನ ತಿಂಡಿ ತಿನಿಸುಗಳನ್ನು ಒಳಗೆ ತೆಗೆದುಕೊಂಡು ಹೋಗಲು ನಿರ್ದೇಶನ ನೀಡಬೇಕು ಎಂದು ಅವರು ಮನವಿ ಮಾಡಿದರು. ಅದಕ್ಕೆ ನ್ಯಾಯಪೀಠ ಅರ್ಜಿದಾರರಿಗೆ, ಮಲ್ಟಿಪ್ಲೆಕ್ಸ್‌ಗಳ ಈ ದರ ನಿಯಂತ್ರಣ ಬಗ್ಗೆ ನಿಗಾ ವಹಿಸುವ ಪ್ರಾಧಿಕಾರದ ಹೆಸರನ್ನು ಸೂಚಿಸುವಂತೆ ಸೂಚನೆ ನೀಡಿ ವಿಚಾರಣೆಯನ್ನು ಅ.10ಕ್ಕೆ ವಿಚಾರಣೆ ಮುಂದೂಡಿತು.

ವಿಚಾರಣೆ ವೇಳೆ ನ್ಯಾಯಪೀಠ,'' ಪಾನ್‌ ಶಾಪ್‌ ಮತ್ತು ರಸ್ತೆ ಬದಿ ತರಕಾರಿಕೊಳ್ಳುವ ಉದಾಹರಣೆ ನೀಡಿ, ಪಾನ್‌ ಶಾಪ್‌ನಲ್ಲಿ ಆತ ಎಷ್ಟು ಕೇಳಿದರೂ ಕೊಡ್ತೀರಿ, ಆದರೆ ರಸ್ತೆ ಬದಿ ತರಕಾರಿ ಕೊಳ್ಳುವಾಗ ಆತನ ಬಳಿ ಚೌಕಾಸಿ ಮಾಡುತ್ತಿರೀ, ಹಾಗೇಯೇ ಅಗತ್ಯವಿರುವವರು ಮಲ್ಟಿಪ್ಲೆಕ್ಸ್‌ಗೆ ಹೋಗುತ್ತಾರೆ, ಬೇಕಾದವರು ತಿನಿಸು ಖರೀದಿಸುತ್ತಾರೆ, ಬೇಡವಾದವರು ಖರೀದಿಸುವಿದಿಲ್ಲ. ಅಗತ್ಯವಿದೆ ಎಂದರೆ ಹೆಚ್ಚು ವ್ಯಯ ಮಾಡಲೇಬೇಕಾಗುತ್ತದೆ ''ಎಂದು ಸೂಚ್ಯವಾಗಿ ಹೇಳಿತು.