ದೇಶದಲ್ಲಿ ಅತ್ಯಧಿಕ ಪೇಟೆಂಟ್ ಹೊಂದಿರುವುದು ವಿದೇಶಿ ಸಂಸ್ಥೆಗಳು

ಬೆಂಗಳೂರು: ಉತ್ಪನ್ನ ಮತ್ತು ಅನ್ವೇಷಣೆಗೆ ಸಂಬಂಧಿಸಿ ದೇಶದಲ್ಲಿ ಪೇಟೆಂಟ್ ಪಡೆದುಕೊಂಡಿರುವ ಸಂಸ್ಥೆಗಳ ಪೈಕಿ ವಿದೇಶಿ ಸಂಸ್ಥೆಗಳೇ ಅತ್ಯಧಿಕ ಸಂಖ್ಯೆಯಲ್ಲಿವೆ. ಜತೆಗೆ ಅಮೆರಿಕ ಮೂಲದ ಕ್ವಾಲ್‌ಕೊಮ್ ಸಂಸ್ಥೆಯೊಂದೇ 2016-17ನೇ ಸಾಲಿನಲ್ಲಿ ಒಟ್ಟು 1,840 ಪೇಟೆಂಟ್‌ಗಳಿಗೆ ಅರ್ಜಿ ಸಲ್ಲಿಸಿದೆ.

ದೇಶದ ಎಲ್ಲ ಪ್ರಯೋಗಾಲಯಗಳು ಸಲ್ಲಿಸಿದ ಒಟ್ಟು ಪೇಟೆಂಟ್‌ಗಳ ಸಂಖ್ಯೆ 781 ಮಾತ್ರ ಆಗಿದ್ದು, ವಿದೇಶಿ ಸಂಸ್ಥೆಯೊಂದೇ ಭಾರತದಲ್ಲಿ ಅತ್ಯಧಿಕ ಸಂಖ್ಯೆಯ ಪೇಟೆಂಟ್‌ಗಳನ್ನು ಹೊಂದುತ್ತಿದೆ ಎಂದು ವರದಿ ಹೇಳಿದೆ.

ದೇಶದಲ್ಲಿ ಡಿಆರ್‌ಡಿಒ 50, ಐಐಎಸ್‌ಸಿ 40, ಸಿಎಸ್‌ಐಆರ್ 38, ಎನ್‌ಐಟಿ 31, ಐಐಟಿ 23 ಮತ್ತು ಇಸ್ರೋ 6 ಪ್ರಯೋಗಾಲಯ ಮತ್ತು ಅನ್ವೇಷಣಾ ಕೇಂದ್ರಗಳನ್ನು ಹೊಂದಿದೆ. ಆದರೆ ಈ ಎಲ್ಲ ಸಂಸ್ಥೆಗಳು ಪೇಟೆಂಟ್‌ಗಾಗಿ ಸಲ್ಲಿಸಿದ ಅರ್ಜಿಗಳ ಸಂಖ್ಯೆ 781 ಎಂದು ಕಂಟ್ರೋಲರ್ ಜನರಲ್ ಆಫ್ ಪೇಟೆಂಟ್‌, ಡಿಸೈನ್ ಮತ್ತು ಟ್ರೇಡ್‌ಮಾರ್ಕ್‌ ವರದಿ ಹೇಳಿದೆ.

ಪೇಟೆಂಟ್‌ಗೆ ಸಂಬಂಧಿಸಿ ಅರ್ಜಿ ಸಲ್ಲಿಸುವುದು ಮತ್ತುಅದರ ಪ್ರಕ್ರಿಯೆಗಳನ್ನು ಪೂರೈಸುವಲ್ಲಿ ಭಾರತ ಹಿಂದುಳಿದಿದ್ದು, ಪೇಟೆಂಟ್ ಬಗೆಗಿನ ನಿರಾಸಕ್ತಿ ಮತ್ತು ಅದರ ಪ್ರಾಮುಖ್ಯತೆಯ ಅರಿವಿಲ್ಲದಿರುವುದನ್ನು ಬಳಸಿಕೊಂಡ ವಿದೇಶಿ ಕಂಪನಿಗಳು ಅವಕಾಶ ಬಳಸಿಕೊಂಡು, ದೇಶದಲ್ಲಿನ ಅವುಗಳ ಶಾಖೆಗಳಲ್ಲಿ ತಯಾರಿಸಿದ ಉತ್ಪನ್ನ ಮತ್ತು ಅನ್ವೇಷಣೆಗಳನ್ನು ತಮ್ಮ ಸಂಸ್ಥೆಯ ಹೆಸರಿನಲ್ಲಿ ನೋಂದಣಿ ಮಾಡಿಕೊಳ್ಳುತ್ತಿವೆ.

ಪೇಟೆಂಟ್‌ನಲ್ಲಿ ವಿದೇಶಿಗರ ಕಾರುಬಾರು

ದೇಶದಲ್ಲಿ 2016-17ನೇ ಸಾಲಿನಲ್ಲಿ ಒಟ್ಟು 45,444 ಪೇಟೆಂಟ್ ಅರ್ಜಿ ಸಲ್ಲಿಕೆಯಾಗಿದ್ದು, ಅವುಗಳ ಪೈಕಿ ಶೇ. 71 ವಿದೇಶಿ ಸಂಸ್ಥೆಗಳು ಸಲ್ಲಿಸಿರುವ ಅರ್ಜಿಗಳಾಗಿವೆ. ಉಳಿದ ಶೇ. 29 ಭಾರತೀಯರು ಸಲ್ಲಿಸಿದ್ದಾಗಿದೆ.

ಕ್ವಾಲ್‌ಕಾಮ್ ಒಂದೇ 1,840 ಪೇಟೆಂಟ್ ಅರ್ಜಿ ಸಲ್ಲಿಸಿದ್ದು, ಸ್ಯಾಮ್‌ಸಂಗ್ (ಕೊರಿಯಾ) 706, ಹುವೈ(ಚೀನಾ) 625, ಮೈಕ್ರೋಸಾಫ್ಟ್‌ (ಅಮೆರಿಕ) 589, ಫಿಲಿಪ್ಸ್ (ನೆದರ್ಲೆಂಡ್‌) 557, ಜಿಇ (ಅಮೆರಿಕ) 520 ಅರ್ಜಿ ಸಲ್ಲಿಸಿವೆ.