ಸೋಫಾ ಖರೀದಿಯ ಸೋಗಿನಲ್ಲಿ ವಂಚನೆ, ಪೇಟಿಎಂ ನಿಂದ 48 ಸಾವಿರ ರೂ. ಡ್ರಾ!

ಬೆಂಗಳೂರು: ಒಎಲ್‌ಎಕ್ಸ್‌ನಲ್ಲಿಮಾರಾಟಕ್ಕಿಟ್ಟಿದ್ದ ಸೋಫಾ ಖರೀದಿ ಸೋಗಿನಲ್ಲಿಕರೆ ಮಾಡಿದ ವಂಚಕ, ನಗರದ ವ್ಯಕ್ತಿಯೊಬ್ಬರ ಪೇಟಿಎಂ ಖಾತೆಯಿಂದ 48 ಸಾವಿರ ರೂ. ದೋಚಿದ್ದಾರೆ.

ಕುಟುಂಬದೊಂದಿಗೆ ವಾಸವಿರುವ 29 ವರ್ಷದ ವ್ಯಕ್ತಿ, ತಮ್ಮ ಮನೆಯ ಸೋಫಾವನ್ನು ಮಾರಾಟ ಮಾಡಲು ಫೋಟೋ ತೆಗೆದು ಒಎಲ್‌ಎಕ್ಸ್‌ನಲ್ಲಿ ಹಾಕಿದ್ದರು. ಅದನ್ನು ಗಮನಿಸಿ ಕರೆ ಮಾಡಿ ಮಾತನಾಡಿದ ಶ್ರೀಕಾಂತ ವರ್ಮಾ ಎಂಬಾತ, ''ನೀವು ನೀಡಿರುವ ಜಾಹೀರಾತು ನೋಡಿದ್ದೇನೆ. ಸೋಫಾ ಇಷ್ಟವಾಗಿದ್ದು ಖರೀದಿ ಮಾಡುತ್ತೇನೆ. ನನ್ನ ಸಂಬಂಧಿಕರು ಬಂದು ಅದನ್ನು ತೆಗೆದುಕೊಂಡು ಹೋಗುತ್ತಾರೆ. ಖರೀದಿಗಾಗಿ ಪೇಟಿಎಂ ಮೂಲಕ 19 ಸಾವಿರ ರೂ. ಕಳುಹಿಸುತ್ತೇನೆ'' ಎಂದು ಹೇಳಿದ್ದ.

''ಮೊಬೈಲ್‌ಗೆ ಒಂದು ಬಾರ್‌ಕೋಡ್‌ ಕಳುಹಿಸಿದ ವ್ಯಕ್ತಿ, ಅದನ್ನು ಪೇಟಿಎಂ ಮೂಲಕ ಸ್ಕ್ಯಾ‌ನ್‌ ಮಾಡಿಕೊಂಡು ಹಣ ಸ್ವೀಕರಿಸಿ ಎಂದು ಹೇಳಿದ. ಅದರಂತೆ ನಾನು ಸ್ಕ್ಯಾ‌ನ್‌ ಮಾಡಿದಾಗ ಮೂರು ಹಂತಗಳಲ್ಲಿ 48 ಸಾವಿರ ರೂ. ಕಡಿತಗೊಂಡಿದ್ದು, ಸಂದೇಶ ಬಂತು. ನಂತರವೇ ಶ್ರೀಕಾಂತ್‌ ಶರ್ಮಾ ಎಂಬಾತ ಮೋಸ ಮಾಡಿರುವುದು ಗೊತ್ತಾಯಿತು. ಬಳಿಕ ಠಾಣೆಗೆ ತೆರಳಿ ದೂರು ನೀಡಿದ್ದೇನೆ'' ಎಂದು ವಂಚನೆಗೊಳಗಾದವರು ತಿಳಿಸಿದ್ದಾರೆ. ಚೆನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.