ಗಣೇಶ್‌ಗೆ ಶಿಕ್ಷೆಯಾಗಲೇಬೇಕು: ವಿಶ್ವನಾಥ್‌

ಬೆಂಗಳೂರು ರೆಸಾರ್ಟ್‌ನಲ್ಲಿ ಕಾಂಗ್ರೆಸ್‌ ಶಾಸಕರ ಹೊಡೆದಾಟ ಪ್ರಕರಣದ ಬಗ್ಗೆ ಜೆಡಿಎಸ್‌ ರಾಜ್ಯಾಧ್ಯಕ್ಷ ಎಚ್‌.ವಿಶ್ವನಾಥ್‌ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, ಈ ಪ್ರಕರಣದಿಂದಾಗಿ ಕರ್ನಾಟಕವೂ ಬಿಹಾರ ಆಗುತ್ತಿದೆಯಾ ಎಂಬ ಅನುಮಾನ ಮೂಡಿಸಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪಕ್ಷದ ಕಚೇರಿಯಲ್ಲಿ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು ''ಜನಪ್ರತಿನಿಧಿಗಳು ಹೊಡೆದಾಡುವ ಮಟ್ಟಕ್ಕೆ ಹೋಗಿದ್ದಾರೆಂದರೆ ತೀವ್ರ ಆಘಾತವಾಗುತ್ತದೆ. ಈ ಪ್ರಕರಣದಿಂದ ಸರಕಾರದ ಪಾಲುದಾರ ಪಕ್ಷವಾದ ಜೆಡಿಎಸ್‌ಗೂ ತೀವ್ರ ಮುಜುಗರವಾಗಿದೆ. ತಪ್ಪು ಮಾಡಿರುವ ಶಾಸಕ ಗಣೇಶ್‌ಗೆ ಶಿಕ್ಷೆ ಆಗಲೇಬೇಕು'' ಎಂದು ಆಗ್ರಹಿಸಿದರು.

'' ಶಾಸಕ ಆನಂದ್‌ ಸಿಂಗ್‌ ಮೇಲೆ ಹಲ್ಲೆ ಮಾಡಿರುವ ಕಂಪ್ಲಿ ಶಾಸಕ ಜೆ.ಎನ್‌.ಗಣೇಶ್‌ ವಿರುದ್ಧ ಕಾನೂನು ಕ್ರಮ ಆಗಬೇಕು. ಪ್ರಕರಣದ ತನಿಖೆಗೆ ಡಿಸಿಎಂ ನೇತೃತ್ವದಲ್ಲಿ ಸಮಿತಿ ರಚನೆಯಾಗಿದೆ. ಗಣೇಶ್‌ ಬಂಧನಕ್ಕೆ 3 ಪೊಲೀಸ್‌ ತಂಡಗಳೂ ರಚನೆಯಾಗಿವೆ. ಹೀಗಾಗಿ, ತಪ್ಪು ಮಾಡಿದವರಿಗೆ ಶಿಕ್ಷೆಯಾಗುತ್ತದೆ ಎಂಬ ವಿಶ್ವಾಸವಿದೆ. ದೇಶದಲ್ಲಿ ಕಾನೂನಿಗಿಂತ ದೊಡ್ಡವರು ಯಾರೂ ಇಲ್ಲ. ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರನ್ನೇ ಬಂಧಿಸಲಾಗಿತ್ತು. ಹೀಗಾಗಿ, ಶಾಸಕ ಗಣೇಶ್‌ ಇನ್ಯಾವ ಲೆಕ್ಕ'' ಎಂದು ಪ್ರಶ್ನಿಸಿದರು.