ಸರಕಾರಿ ನೌಕರರ ಪರಿಷ್ಕೃತ ವೇತನ ಈ ತಿಂಗಳು ಕೈಗೆ

ಬೆಂಗಳೂರು: ಆರನೇ ವೇತನ ಆಯೋಗದ ಶಿಫಾರಸಿನಂತೆ ರಾಜ್ಯ ಸರಕಾರಿ ನೌಕರರಿಗೆ ಈ ಜುಲೈ ವೇತನದಲ್ಲಿ ಶೇ.30 ಏರಿಕೆಯೊಂದಿಗೆ ಪರಿಷ್ಕೃತ ಸಂಬಳ ಸಿಗುವುದು ಖಾತರಿಯಾಗಿದೆ.

ವೇತನ ಆಯೋಗದ ಶಿಫಾರಸುಗಳನ್ನು ಒಪ್ಪಿ ಹಿಂದಿನ ಸರಕಾರ ತರಾತುರಿಯಲ್ಲಿ ಕಳೆದ ಮಾ.1ರಂದೇ ಆದೇಶ ಹೊರಡಿಸಿತ್ತು. ಆದರೆ, ಮಾದರಿ ನೀತಿ ಸಂಹಿತೆ ಜಾರಿಯಾದ ಕಾರಣ ಚುನಾವಣಾ ಆಯೋಗದ ಅನುಮತಿ ನೀಡಿಕೆ ಹಾಗೂ ಪರಿಷ್ಕೃತ ವೇತನವನ್ನು ಎಚ್‌ಆರ್‌ಎಂಎಸ್‌ ತಂತ್ರಾಂಶಕ್ಕೆ ಜೋಡಣೆಯಲ್ಲಿ ವಿಳಂಬವಾಗಿತ್ತು. ಹೀಗಾಗಿ, ಸರಕಾರಿ ಆದೇಶ ಹೊರಬಿದ್ದರೂ ಪರಿಷ್ಕೃತ ವೇತನದ ಮೊತ್ತ ಮಾತ್ರ ನೌಕರರ ಕೈಸೇರಿರಲಿಲ್ಲ.

ಇದೀಗ, ಪರಿಷ್ಕೃತ ವೇತನ ಪಾವತಿಗೆ ಸಂಬಂಧಿಸಿದಂತೆ ಎಚ್‌ಆರ್‌ಎಂಎಸ್‌ ತಂತ್ರಾಂಶಕ್ಕೆ ಜೋಡಣೆ ಪ್ರಕ್ರಿಯೆ ಮುಗಿದಿದ್ದು, ಜುಲೈನಲ್ಲಿ ಪಾವತಿಯಾಗುವ ಈ ತಿಂಗಳ ವೇತನದಲ್ಲಿ ಸರಕಾರಿ ನೌಕರರಿಗೆ ಪರಿಷ್ಕೃತ ವೇತನ ಸಿಗಲಿದೆ. ಈ ಸಂಬಂಧ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಅಪರ ಮುಖ್ಯ ಕಾರ್ಯದರ್ಶಿ ರಾಜೀವ್‌ ಚಾವ್ಲಾ ಸುತ್ತೋಲೆ ಹೊರಡಿಸಿದ್ದಾರೆ.