ಚುನಾವಣೆಗೆ ಸ್ಪರ್ಧಿಸದಂತೆ ಗೌರಿಶಂಕರ್‌ಗೆ ಬೆದರಿಕೆ ಪತ್ರ

ತುಮಕೂರು: ತುಮಕೂರು ಗ್ರಾಮಾಂತರ ಕ್ಷೇತ್ರದ ಜೆಡಿಎಸ್‌ ಅಭ್ಯರ್ಥಿ, ಮಾಜಿ ಶಾಸಕ ಡಿ.ಸಿ.ಗೌರಿಶಂಕರ್‌ ನಿವಾಸದ ಎದುರು ವಾಮಾಚಾರ ನಡೆಸಿದ್ದು ಪತ್ರ ಮೂಲಕ ಕೊಲೆ ಬೆದರಿಕೆ ಹಾಕಿರುವ ಘಟನೆ ನಡೆದಿದೆ.

ಬೆಂಗಳೂರಿನ ನಾಗರಬಾವಿಯಲ್ಲಿರುವ ಗೌರಿಶಂಕರ್‌ ನಿವಾಸದ ಎದುರು ಶುಕ್ರವಾರ ವಾಮಾಚಾರ ನಡೆಸಿರುವ ವಸ್ತುಗಳು ಪತ್ತೆಯಾಗಿವೆ. ಅಡಕೆ ತಟ್ಟೆಯಲ್ಲಿ ಅನ್ನ, ಕುಂಕುಮ ಹಾಕಿ ಮನೆ ಮುಂದೆ ತಂದಿಡಲಾಗಿದೆ. ಜೊತೆಗೆ ಬೆದರಿಕೆ ಪತ್ರ ಹಾಗೂ ಹರಿತವಾದ ಚಾಕುವೊಂದನ್ನು ಇಡಲಾಗಿದೆ.

ಪತ್ರದಲ್ಲೇನಿದೆ?: ಮೂರು ಪುಟದ ಬೆದರಿಕೆ ಪತ್ರದಲ್ಲಿ ''ನೀನು ನಾಮಪತ್ರ ಸಲ್ಲಿಸಬೇಡ. ಸಲ್ಲಿಸಿದರೆ ನಿನ್ನ, ಹೆಂಡತಿ, ಮಕ್ಕಳನ್ನು ಸುಮ್ಮನೆ ಬಿಡುವುದಿಲ್ಲ. ಭಿಕ್ಷೆ ಬೇಡಿಕೊಂಡು ಅಲೆಯುವಂತೆ ಮಾಡುತ್ತೇನೆ,'' ಎಂದು ಎಚ್ಚರಿಸಲಾಗಿದೆ.

ದೂರು ದಾಖಲು: ಘಟನೆ ನಡೆದ ವೇಳೆ ತುಮಕೂರಿನಲ್ಲಿದ್ದ ಡಿ.ಸಿ.ಗೌರಿಶಂಕರ್‌, ತಕ್ಷಣ ಈ ಬಗ್ಗೆ ಬೆಂಗಳೂರಿನ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳೀಯ ವಿಜಯನಗರ ಠಾಣೆ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪರಿಶೀಲಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.