ಅನುದಾನ ಹಂಚಿಕೆ ಪುನರ್‌ ಪರಿಶೀಲಿಸುವಂತೆ ಕಲಾ ಸಂಘಗಳ ಒತ್ತಾಯ

ಬೆಂಗಳೂರು: ರಂಗಭೂಮಿ ಮತ್ತು ಸಾಂಸ್ಕೃತಿಕ ಕಲಾ ಸಂಸ್ಥೆಗಳಿಗೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯು ಹಂಚಿಕೆ ಮಾಡಿರುವ ಅನುದಾನದಲ್ಲಿ ತಾರತಮ್ಯ ಮಾಡಲಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಕಲಾವಿದರು, ಅನ್ಯಾಯ ಆಗಿರುವ ಕಲಾ ಸಂಸ್ಥೆಗಳಿಗೆ ಅನುದಾನ ಹಂಚಿಕೆ ಮಾಡಬೇಕು ಎಂದು ಒತ್ತಾಯಿಸಿವೆ.

''ದಶಕಗಳಿಂದಲೂ ಮುನ್ನೆಡೆಸಿಕೊಂಡು ಬರುತ್ತಿರುವ ಸಂಸ್ಥೆಗಳು ಒಳ್ಳೆಯ ಕಾರ್ಯಕ್ರಮಗಳನ್ನು ಮಾಡಿವೆ. ಆನ್‌ಲೈನ್‌ ಅರ್ಜಿ ಸಲ್ಲಿಕೆ ವೇಳೆ ಆದ ಸಣ್ಣ ತಪ್ಪುಗಳನ್ನು ಸರಿಪಡಿಸಿಕೊಳ್ಳುವಂತೆ ಸೂಚಿಸುವುದು ಬಿಟ್ಟು, ಅನುದಾನವನ್ನೇ ಕಡಿತ ಮಾಡಿರುವುದು ಅಕ್ಷಮ್ಯ,'' ಎಂದು ಕರ್ನಾಟಕ ನಾಟಕ ಅಕಾಡೆಮಿ ಅಧ್ಯಕ್ಷ ಜೆ. ಲೋಕೇಶ್‌ ಆರೋಪಿಸಿದ್ದಾರೆ.

ವೆಬ್‌ಸೈಟ್‌ನಲ್ಲಿ ಯಾಕೆ ಪ್ರಕಟಿಸಿಲ್ಲ

ಅನುದಾನಕ್ಕೆ ಆಯ್ಕೆಯಾದ ಸಂಸ್ಥೆಗಳು ಮತ್ತು ಹಣದ ಕುರಿತ ಮಾಹಿತಿ ಪಟ್ಟಿಯನ್ನು ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿಲ್ಲ. ಇದರಿಂದ ಸಾಕಷ್ಟು ಕಲಾ ಸಂಸ್ಥೆಗಳು ಮತ್ತು ಕಲಾವಿದರಿಗೆ, ತಮಗೆ ಅನುದಾನ ಬಂದಿದೆಯೋ ಇಲ್ಲವೋ, ಬಂದಿದ್ದರೆ ಎಷ್ಟು ಬಂದಿದೆ ಎಂಬುದು ತಿಳಿದಿಲ್ಲ. ಹೀಗಾಗಿ ಅನುದಾನಕ್ಕೆ ಆಯ್ಕೆ ಮಾಡಿದ ಸಂಸ್ಥೆಗಳ ಪಟ್ಟಿಯನ್ನು ವೆಬ್‌ಸೈಟ್‌ನಲ್ಲಿ ಪ್ರಕಟಿಸುವಂತೆ ಒತ್ತಾಯ ವ್ಯಕ್ತವಾಗಿದೆ.

''15 ವರ್ಷಗಳ ಹಿಂದೆ ಸಂಸ್ಥೆಗಳು ನಡೆಸುವ ಕಲಾ ಕಾರ್ಯಕ್ರಮಗಳನ್ನು ವೀಕ್ಷಿಸಿ, ಗುಣಮಟ್ಟ ಪರಿಶೀಲಿಸಲು ಸಿಬ್ಬಂದಿ ಕಳುಹಿಸುತ್ತಿದ್ದರು. ಆದರೆ ಈಗ ಅಂತಹ ವ್ಯವಸ್ಥೆಗಳು ಇಲ್ಲ. ಇದರಿಂದ ಸಾಕಷ್ಟು ಅವ್ಯವಸ್ಥೆಗಳಾಗುತ್ತಿವೆ. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯೇ ಕಲಾವಿದರನ್ನು ಕಲಾವಿದರಂತೆ ಕಾಣದೆ, ಬ್ಯುಸಿನೆಸ್‌ ಮೆನ್‌ಗಳನ್ನಾಗಿಸುತ್ತಿದೆ. ಇದರಿಂದ ಬೇಸತ್ತು ಹೋಗಿದ್ದೇನೆ,'' ಎನ್ನುತ್ತಾರೆ ಉಪಾಸನಾ ಸಂಸ್ಥೆಯ ಉಪಾಸನಾ ಮೋಹನ್‌.

ಆಫ್‌ಲೈನ್‌ ವ್ಯವಸ್ಥೆಯೇ ಉತ್ತಮ

''ಕಲಾಸಂಸ್ಥೆಗಳ ಅನುದಾನಕ್ಕಾಗಿ ಆನ್‌ಲೈನ್‌ನಲ್ಲಿ ಅರ್ಜಿಗಳನ್ನು ಆಹ್ವಾನಿಸುತ್ತಿರುವುದು ಕೆಲವು ತಾಂತ್ರಿಕ ದೋಷಗಳಿಂದ ಕೂಡಿದೆ. ಹೀಗಾಗಿ ಆಫ್‌ಲೈನ್‌ ವ್ಯವಸ್ಥೆಯನ್ನೇ ಮುಂದುವರಿಸುವುದು ಉತ್ತಮ. ಜತೆಗೆ ಅನುದಾನವನ್ನು ಡಿಸೆಂಬರ್‌ ಒಳಗೆ ಬಿಡುಗಡೆ ಮಾಡುವಂತಿರಬೇಕು. ಆರ್ಥಿಕ ವರ್ಷದ ಕೊನೆಯಲ್ಲಿ ಅನುದಾನ ಸಿಗುತ್ತದೆಯೆಂದರೆ ಫೆಬ್ರವರಿ-ಮಾರ್ಚ್‌ನಲ್ಲಿ ತರಾತುರಿಯಾಗಿ ಕಾರ್ಯಕ್ರಮಗಳನ್ನು ಮಾಡಬೇಕಾಗುತ್ತದೆ,'' ಎನ್ನುತ್ತಾರೆ ಹೆಸರು ಹೇಳಲಿಚ್ಛಿಸದ ಕಲಾವಿದರು.