ಜಿಎಸ್‌ಟಿ ವಂಚಿಸಲು ಮೀನಿನ ಲಾರಿಯಲ್ಲಿ ಅಡಕೆ ಸಾಗಣೆ

ಬೆಂಗಳೂರು: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ವಂಚಿಸಲು ಮೀನಿನ ಲಾರಿಯಲ್ಲಿ ಅಡಕೆ ಸಾಗಣೆ ಮಾಡುತ್ತಿರುವುದನ್ನು ಪತ್ತೆ ಹಚ್ಚಿರುವ ರಾಜ್ಯ ವಾಣಿಜ್ಯ ತೆರಿಗೆ ಇಲಾಖೆ ಅಧಿಕಾರಿಗಳು 100 ಚೀಲ ಅಡಕೆ ಜಪ್ತಿ ಮಾಡಿದ್ದಾರೆ.

ಮಾ.23ರಂದು ಉಡುಪಿಯ ಹೆಜಮಾಡಿ ಎಂಬಲ್ಲಿ ಕರ್ತವ್ಯದಲ್ಲಿದ್ದ ಮಂಗಳೂರಿನ ಜಾರಿ ವಿಭಾಗದ ಅಧಿಕಾರಿಗಳ ತಂಡ, ಲಾರಿಯನ್ನು ತಡೆದು ನಿಲ್ಲಿಸಿ ಪರಿಶೀಲನೆ ನಡೆಸಿದ್ದಾರೆ. ಹೊರ ರಾಜ್ಯಗಳಿಗೆ ಮೀನು ಸಾಗಣೆಗಾಗಿ ಸಿದ್ಧಪಡಿಸಲಾಗಿದ್ದ ಲಾರಿಯಲ್ಲಿ 100 ಚೀಲ ಅಡಕೆಯನ್ನು ತುಂಬಲಾಗಿತ್ತು. ಚಾಲಕನ ಬಳಿ ಯಾವುದೇ ದಾಖಲೆ ಇರಲಿಲ್ಲ. ಈ ಹಿನ್ನೆಲೆಯಲ್ಲಿ ಲಾರಿ ಮತ್ತು ಅಡಕೆಯನ್ನು ಜಪ್ತಿ ಮಾಡಲಾಗಿದೆ.

ತೆರಿಗೆ ವಂಚನೆ ಉದ್ದೇಶದಿಂದ ಮೀನಿನ ಲಾರಿಯಲ್ಲಿ ಅಡಕೆ ಸಾಗಿಸುತ್ತಿರುವುದು ತನಿಖೆಯಲ್ಲಿ ಗೊತ್ತಾಗಿದೆ. ಕಾನೂನುಬಾಹಿರವಾಗಿ ಸರಕು ಸಾಗಿಸುತ್ತಿದ್ದವರಿಗೆ ದಂಡ ವಿಧಿಸುವುದರ ಜೊತೆಗೆ ಕೇಸ್‌ ದಾಖಲಿಸಿ ಕ್ರಮ ಕೈಗೊಳ್ಳುವುದಾಗಿ ವಾಣಿಜ್ಯ ತೆರಿಗೆ ಅಧಿಕಾರಿಗಳು ಎಚ್ಚರಿಸಿದ್ದಾರೆ.