ರಾಜ್ಯದಲ್ಲಿ ಮತ್ತೆ ಇಬ್ಬರನ್ನು ಬಲಿ ಪಡೆದ ಎಚ್‌1ಎನ್‌1 ಮಹಾಮಾರಿ: 192 ಜನರಿಗೆ ಸೋಂಕು!

ಉಡುಪಿ: ಕೊರೊನಾ ಮಹಾಮಾರಿ ವಿಶ್ವಾದ್ಯಂತ ತಳಮಳ ಹುಟ್ಟಿಸಿರುವ ಸಂದರ್ಭದಲ್ಲೇ, ರಾಜ್ಯದಲ್ಲಿ ಎಚ್‌1ಎನ್1 ಸೋಂಕು ಮತ್ತೆ ಉಲ್ಬಣಗೊಂಡಿದೆ. ಹಂದಿಜ್ವರ ಎಂದೇ ಕರೆಯಲಾಗುವ ಈ ಸೋಂಕಿಗೆ ಕಳೆದ ಕೆಲ ದಿನಗಳಲ್ಲಿ ಇಬ್ಬರು ಬಲಿಯಾಗಿರುವುದು ಮತ್ತಷ್ಟು ಆತಂಕಕ್ಕೆ ಕಾರಣವಾಗಿದೆ.

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳ ನಿರ್ದೇಶನಾಲಯದ ಅಂಕಿ ಅಂಶಗಳಂತೆ ಫೆಬ್ರವರಿಯಲ್ಲಿ ಎಚ್‌1ಎನ್‌1ಗೆ ಇಬ್ಬರು (ದಾವಣಗೆರೆ ಮತ್ತು ತುಮಕೂರಿನಲ್ಲಿ ತಲಾ ಒಬ್ಬರು) ಬಲಿಯಾಗಿದ್ದಾರೆ. ಇದುವರೆಗೆ ರಾಜ್ಯಾದ್ಯಂತ ಒಟ್ಟು 192 ಜನರಿಗೆ ಎಚ್‌1ಎನ್‌1 ಸೋಂಕು ತಗುಲಿರುವುದು ಖಾತರಿಯಾಗಿದೆ.

ಎಚ್‌1ಎನ್‌1 ಸೋಂಕು ಖಾತರಿಯಾಗಿರುವ ಜಿಲ್ಲೆಗಳಲ್ಲಿ ಬೆಂಗಳೂರು ನಗರ ಮೊದಲ ಸ್ಥಾನದಲ್ಲಿದೆ. ಒಟ್ಟು 192 ಪ್ರಕರಣಗಳ ಪೈಕಿ ಬಿಬಿಎಂಪಿ ವ್ಯಾಪ್ತಿಯಲ್ಲಿಯೇ 74 ಪ್ರಕರಣಗಳು ದಾಖಲಾಗಿವೆ. ಉಡುಪಿಯಲ್ಲಿ 46 ಪ್ರಕರಣಗಳು ದಾಖಲಾಗಿವೆ. ಬೆಂಗಳೂರು ನಗರ ಜಿಲ್ಲೆಯಲ್ಲಿ (ಬಿಬಿಎಂಪಿ ವ್ಯಾಪ್ತಿ ಹೊರತುಪಡಿಸಿ) 22, ಬೆಂಗಳೂರು ಗ್ರಾಮಾಂತರ 7, ಬೆಳಗಾವಿ 1, ಬಳ್ಳಾರಿ 2, ಚಿತ್ರದುರ್ಗ 2, ದಕ್ಷಿಣ ಕನ್ನಡ 13, ದಾವಣಗೆರೆ 7, ಕೋಲಾರ 2, ಕೊಪ್ಪಳ 1, ಮೈಸೂರು 1, ಶಿವಮೊಗ್ಗದಲ್ಲಿ 7 ಪ್ರಕರಣಗಳು ಖಾತರಿಯಾಗಿವೆ.

ಏನಿದು ಹಂದಿ ಜ್ವರ, ಇದರ ಲಕ್ಷಣಗಳೇನು, ಇದರ ನಿಯಂತ್ರಣ ಹೇಗೆ?

2020ರಲ್ಲಿ ಇದುವರೆಗೂ 1823 ಜನರಿಗೆ ಎಚ್‌1ಎನ್‌1 ಪರೀಕ್ಷೆ ನಡೆಸಲಾಗಿದೆ. ಈ ಪೈಕಿ 192 ಪ್ರಕರಣಗಳು ಖಾತರಿಯಾಗಿವೆ. 2019ರಲ್ಲಿ ಒಟ್ಟು 15,140 ಜನರಿಗೆ ಎಚ್‌1ಎನ್‌1 ಪರೀಕ್ಷೆ ನಡೆಸಲಾಗಿತ್ತು ಈ ಪೈಕಿ 2,030 ಜನರಲ್ಲಿ ಎಚ್‌1ಎನ್‌1 ಖಾತರಿಯಾಗಿತ್ತು.

2010ರಿಂದ 2020ರವರೆಗೆ ಒಟ್ಟು 10 ವರ್ಷಗಳಲ್ಲಿ 85,266 ಜನರಿಗೆ ಎಚ್‌1ಎನ್‌1 ಪರೀಕ್ಷೆ ನಡೆಸಲಾಗಿದೆ. ಈ ಪೈಕಿ 14,853 ಪ್ರಕರಣಗಳು ಖಾತರಿಯಾಗಿವೆ.