Karnataka Crisis: ಸ್ಪೀಕರ್‌ ರಮೇಶ್‌ ಕುಮಾರ್‌ ವಾರ್ನಿಂಗ್‌: ನನ್ನ ಸುದ್ದಿಗೆ ಬರದಿರಿ....

ಬೆಂಗಳೂರು: ನನ್ನ ಚಾರಿತ್ರ್ಯ ವಧೆ ಮಾಡುವ ಮುನ್ನ ನಿಮ್ಮ ಹಿನ್ನೆಲೆ ನೋಡಿಕೊಳ್ಳಿ. ನಾನು ಇಲ್ಲಿ ಸುಮ್ಮನೆ ಕೂರಲು ಬಂದಿಲ್ಲ. ನನ್ನ ಸುದ್ದಿಗೆ ಬರುವ ಮುನ್ನ ಎಚ್ಚರ ವಹಿಸಿ ಎಂದು ಸ್ಪೀಕರ್‌ ರಮೇಶ್‌ ಕುಮಾರ್‌ ಖಡಕ್‌ ಸೂಚನೆ ನೀಡಿದ್ದಾರೆ.

ಎಚ್‌ಡಿ ಕುಮಾರಸ್ವಾಮಿ ವಿಶ್ವಾಸಮತ ಯಾಚನೆ ಚರ್ಚೆಯ ಸಂಬಂಧ ಏರ್ಪಟ್ಟಿರುವ ಬಿಕ್ಕಟ್ಟಿನ ಕುರಿತು ಕಲಾಪ ಆರಂಭವಾಗುತ್ತಿದ್ದಂತೆಯೇ ರಮೇಶ್‌ ಕುಮಾರ್‌ ತಮ್ಮ ಕಾರ್ಯವ್ಯಾಪ್ತಿ ಹಾಗೂ ತಮ್ಮ ನಿಲುವಿನ ಕುರಿತು ಸ್ಪಷ್ಟನೆ ನೀಡಿದರು.

ನಾನು ವಿಶ್ವಾಸಮತ ಯಾಚನೆಗೆ ವಿಳಂಬ ಮಾಡುತ್ತಿದ್ದೇನೆ ಎಂಬ ಮಾತುಗಳು ಕೇಳಿ ಬರುತ್ತಿದೆ. ನನಗೆ ನನ್ನ ನಿರ್ಧಾರ ತೆಗೆದುಕೊಳ್ಳಲು ಬರುತ್ತದೆ. ಅಷ್ಟೇ ಅಲ್ಲ ನಾನು ಯಾವುದೇ ಪಕ್ಷದ ಪರವಾಗಿ ಇಲ್ಲಿ ಕೆಲಸ ಮಾಡಲು ಬಂದಿಲ್ಲ. ನಿಯಮಗಳ ಅನುಸಾರ ಸರಿಯಾದ ನಿರ್ಧಾರ ತೆಗೆದುಕೊಳ್ಳುವ ಶಕ್ತಿ ನನಗಿದೆ. ಎಂದು ಭಾವೋದ್ವೇಗದ ಮಾತುಗಳನ್ನಾಡಿದರು.

ನಿಯಮ ಗಾಳಿಗೆ ತೂರಲು ನಾನು ಸಿದ್ಧನಿಲ್ಲ. ಪಕ್ಷಪಾತಮಾಡುವ ಇರಾದೆ ನನಗಿಲ್ಲ. ಒಂದು ದಿನದ ಕಲಾಪ ಮುಂದುಕ್ಕೆ ಹಾಕಿದರೆ 12 ಕೋಟಿ ರೂ. ನಷ್ಟವಾಗುತ್ತದೆ. ನನ್ನ ಬಳಿ ಸಾವಿರ ಕೋಟಿಗಳಿಲ್ಲ. ನನ್ನ ಕುಟುಂಬ ನೋಡಿದರೆ ನಿಮಗೆ ಗೊತ್ತಾಗುತ್ತದೆ. ನನ್ನ ತಂದೆ ತಾಯಿ ನನಗೆ ಸತ್ಯದ ಮಾರ್ಗದಲ್ಲಿ ನಡೆಯುವುದನ್ನು ಕಲಿಸಿದ್ದಾರೆ. ಜಾತಿ ಬಲ ಇಲ್ಲದೇ ಬಂದವನನು ನಾನು. ಹೀಗಾಗಿ ನನ್ನ ಚಾರಿತ್ರ್ಯವಧೆ ಮಾಡುವ ಕೆಲಸಕ್ಕೆ ಬರಬೇಡಿ ಎಂದು ಸ್ಪೀಕರ್‌ ರಮೇಶ್‌ ಕುಮಾರ್‌ ಖಡಕ್‌ ಎಚ್ಚರಿಕೆ ನೀಡಿದರು.


ಇದಕ್ಕೂ ಮುನ್ನ, ಕಲಾಪ ಆರಂಭವಾಗುತ್ತಿದ್ದಂತೆಯೇ ಮಾಜಿ ಸಿಎಂ ಸಿದ್ದರಾಮಯ್ಯ ಅವರ ಕ್ರಿಯಾಲೋಪಕ್ಕೆ ಸಂಬಂಧಿಸಿದಂತೆ ಅಡ್ವಕೇಟ್ ಜನರಲ್‌ ಅವರ ಸಲಹೆ ಪಡೆಯಲಾಗಿದೆ. ಇದರ ಬಗ್ಗೆ ಕೂಲಂಕುಷವಾಗಿ ನಾನು ನೋಡಬೇಕಿದ್ದು, ರೂಲಿಂಗ್‌ ಕಾಯ್ದಿರಿಸಿದ್ದೇನೆ ಎಂದು ತಿಳಿಸಿದರು.

ಸರಕಾರ ಉಳಿಸುವ ಪ್ರಯತ್ನ ನಾನು ಮಾಡುತ್ತಿದ್ದೇನೆ ಎಂದೆಲ್ಲ ಹೇಳಲಾಗುತ್ತಿದೆ. ನಾನು ಇಲ್ಲೇ ಕೂರಲು ಬಂದಿಲ್ಲ. ಇಲ್ಲಿ ಕುಳಿತು ಇತಿಹಾಸ ಮೆಚ್ಚುವ ರೂಲಿಂಗ್‌ ನೀಡಲು ಬಂದಿದ್ದೇನೆ. ಇಲ್ಲಿ ಕುಳಿತು ನಾನು ಯಾವುದೇ ಪಕ್ಷದ ಪರವಾಗಿ ನನ್ನ ನಿರ್ಧಾರ ಪ್ರಕಟಿಸುವುದಿಲ್ಲ. ಈ ಎಲ್ಲ ವಿಚಾರವನ್ನು ಗಮನದಲ್ಲಿರಿಸಿ. ಸೌಮ್ಯ ಶಬ್ಧಗಳಿಂದ ಹೇಳುತ್ತಿದ್ದೇನೆ, ನನ್ನ ತೇಜೋವಧೆ ಮಾಡುವ ಮುನ್ನ, ನಿಮ್ಮ ಹಿನ್ನೆಲೆಗಳನ್ನು ನೋಡಿಕೊಳ್ಳಿ. ನನ್ನ ಸುದ್ದಿಗೆ ಬರದಿರಿ ಎಂದು ಎಚ್ಚರಿಕೆ ನೀಡಿದರು.