ರೇಸ್‌ನಲ್ಲಿ ನಾನಿಲ್ಲ: ಸಚಿವ ರೇವಣ್ಣ

ಬೆಂಗಳೂರು: ಕಾಂಗ್ರೆಸ್‌ ಶಾಸಕ ಡಾ. ಸುಧಾಕರ್‌ ಹೇಳಿಕೆಗೆ ಪ್ರತಿಕ್ರಿಯೆ ನೀಡುವಷ್ಟು ದೊಡ್ಡ ವ್ಯಕ್ತಿ ನಾನ್ನಲ್ಲ. ನಾನು ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ ಸೇರಿದಂತೆ ಯಾವುದೇ ಹುದ್ದೆಯ ಆಕಾಂಕ್ಷಿ ಅಲ್ಲ. ರೇಸ್‌ನಲ್ಲಿ ಇರುವುದಕ್ಕೆ ನನ್ನ ಬಳಿ ಕುದುರೆಯೇ ಇಲ್ಲ ಎಂದು ಸಚಿವ ಎಚ್‌.ಡಿ. ರೇವಣ್ಣ ವ್ಯಂಗ್ಯವಾಡಿದ್ದಾರೆ.

ಸುದ್ದಿಗಾರರ ಜತೆ ಮಾತನಾಡಿದ ಅವರು,''ಹಾಸನದಲ್ಲಿ ಎಚ್‌.ಡಿ.ರೇವಣ್ಣ ಮತದಾನ ಸಂದರ್ಭದಲ್ಲಿ ಅಕ್ರಮ ಎಸಗಿದ್ದಾರೆ ಎಂಬ ಆರೋಪ ಶುದ್ಧ ಸುಳ್ಳು. ಈ ಬಗ್ಗೆ ಯಾವುದೇ ತನಿಖೆ ನಡೆದರೂ ಎದುರಿಸುವುದಕ್ಕೆ ಸಿದ್ಧ. ಮತದಾನದ ದಿನ ದೇವೇಗೌಡರು ಸೇರಿದಂತೆ ನಮ್ಮ ಕುಟುಂಬದ 20 ಜನರು ಒಟ್ಟಿಗೆ ಮತ ಹಾಕುವುದಕ್ಕೆ ತೆರಳಿದ್ದೆವು. ಪ್ರತಿಯೊಬ್ಬರೂ ಸಾಲಿನಲ್ಲೇ ನಿಂತು ಮತ ಹಾಕಿದ್ದಾರೆ. ಹೀಗಾಗಿ ಮತಗಟ್ಟೆಯಿಂದ ಹೊರ ಬರುವುದಕ್ಕೆ 20 ನಿಮಿಷ ಆಗಿದೆ. ಆ ಕಾರಣಕ್ಕೆ ರೇವಣ್ಣ ಕಳ್ಳ ವೋಟು ಹಾಕಿಸಿದ್ದಾರೆ ಎಂದು ಆರೋಪಿಸಲಾಗುತ್ತಿದೆ. ನನ್ನ ಮಗ ಡಾ.ಸೂರಜ್‌ಗೆ ಮಕ್ಕಳಿಲ್ಲ. ಆದರೂ ರೇವಣ್ಣ ಮೊಮ್ಮಗ ಮತದಾನ ಮಾಡಿದ್ದಾರೆ ಎಂದು ಸುಳ್ಳು ಸುದ್ದಿ ಹಬ್ಬಿಸಿದ್ದಾರೆ . ಈ ಬಗ್ಗೆ ಆರೋಪ ಮಾಡಿದವರ ಹಿನ್ನೆಲೆ ಶೋಧಿಸಬೇಕು,'' ಎಂದು ಹೇಳಿದರು.

ಯಡಿಯೂರಪ್ಪ ಹೇಳಿದ ಎಂಜನಿಯರ್‌ ಕೊಟ್ಟಿದ್ದೇವೆ

ಯಡಿಯೂರಪ್ಪನವರು ನನ್ನ ಬಗ್ಗೆ ಮಾಡಿರುವ ಆರೋಪಕ್ಕೆ ಪ್ರತಿಕ್ರಿಯೆ ನೀಡುವುದಿಲ್ಲ. ಅವರು ಹಿರಿಯರು. ಪಾಪ ಅರಳು-ಮರಳು. ಶಿಕಾರಿಪುರ, ಶಿವಮೊಗ್ಗಕ್ಕೆ ಅವರು ಹೇಳಿದ ಎಕ್ಸಿಕ್ಯೂಟಿವ್‌ ಎಂಜಿನಿಯರ್‌ನ್ನೇ ಕೊಟ್ಟಿದ್ದೇವೆ. ಹುಬ್ಬಳ್ಳಿಯಲ್ಲಿ ಅವರ ಅಳಿಯನೇ ಎಕ್ಸಿಕ್ಯೂಟಿವ್‌ ಎಂಜಿನಿಯರ್‌ ಇದ್ದಾರೆ. ವರ್ಗಾವಣೆಯಲ್ಲಿ ಎಷ್ಟು ಲಂಚ ಕೊಟ್ಟಿದ್ದಾರೆ ಎಂದು ಅವರನ್ನೇ ಕೇಳಿ ಎಂದು ರೇವಣ್ಣ ವ್ಯಂಗ್ಯವಾಡಿದರು.

ಮ್ಯಾಜಿಕ್ಕೂ ಇಲ್ಲ, ಹುಣಸೆ ಕಾಯೂ ಇಲ್ಲ

ಬಿಡಿಎಯಲ್ಲಿ ರೇವಣ್ಣ ಮ್ಯಾಜಿಕ್ಕೂ ಇಲ್ಲ, ಹುಣಸೆ ಕಾಯೂ ಇಲ್ಲ ಎಂದು ಸಚಿವ ರೇವಣ್ಣ ತಿರುಗೇಟು ನೀಡಿದ್ದಾರೆ.

''ಬಿಡಿಎಗೆ ನನ್ನ ಶಿಫಾರಸಿನ ಮೇಲೆ ಮುಖ್ಯ ಎಂಜಿನಿಯರ್‌ ನೇಮಕ ಮಾಡಲಾಗಿದೆ ಎಂಬುದು ಸುಳ್ಳು. ನಾನು ಸಂಪೂರ್ಣವಾಗಿ ಚುನಾವಣೆಯಲ್ಲಿ ಮುಳುಗಿದ್ದೆ. ಆ ಮುಖ್ಯ ಎಂಜಿನಿಯರ್‌ ಮುಖವನ್ನೇ ನಾನು ನೋಡಿಲ್ಲ. ವರ್ಗಾವಣೆ ಡಿಪಿಎಆರ್‌ಗೆ ಸಂಬಂಧಪಟ್ಟ ವಿಚಾರ. ರೇವಣ್ಣ ಹೆಸರು ಹೇಳಿದರೆ ವರ್ಗಾವಣೆಯಾಗುವುದಿಲ್ಲ. ನನಗೂ ಇದಕ್ಕೂ ಸಂಬಂಧವಿಲ್ಲ ,''ಎಂದು ಹೇಳಿದರು.