* ಏನ್ರೀ, ಬಿಜೆಪಿ ಸಂಪರ್ಕ ಮಾಡಲು ಹೋಗಿದ್ರಾ ? : ಸಾರಾಮ, ಜಿಟಿಡಿ ವಿರುದ್ಧ ಸಿಎಂ ಗರಂ

ಬೆಂಗಳೂರು: ಸಂಪುಟದ ಸಹೋದ್ಯೋಗಿಗಳಾದ ಜಿ.ಟಿ.ದೇವೇಗೌಡ ಹಾಗೂ ಸಾ.ರಾ.ಮಹೇಶ್‌ ವಿರುದ್ಧ ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಸದನದಲ್ಲೆ ಗರಂ ಆದ ಘಟನೆ ನಡೆದಿದೆ.

ಸೋಮವಾರದ ಕಲಾಪಕ್ಕೆ ತೆರೆ ಬೀಳುತ್ತಿದ್ದಂತೆ ಜೆಡಿಎಸ್‌ ಸಚಿವರು ಸಿಎಂ ಅವರನ್ನು ಸುತ್ತುವರಿದರು. ಈ ಗುಂಪಿನಲ್ಲಿ ದೇವೇಗೌಡ, ಸಾ.ರಾ.ಮಹೇಶ್‌ ಅವರನ್ನು ಕಾಣುತ್ತಿದ್ದಂತೆ ಸಿಎಂ ರೇಗಿದರು ಎನ್ನಲಾಗಿದೆ.

ದೇವೇಗೌಡರಿಗೆ ಬಿಜೆಪಿಗೆ ಸ್ವಾಗತವೆಂಬ ಪೋಸ್ಟ್‌ರಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ. ಇದರ ಮಧ್ಯೆ ಜಿಟಿಡಿ ಅವರೂ ಪ್ರತಿಪಕ್ಷದ ಸಾಲಿನತ್ತ ತೆರಳಿ ಬಿಜೆಪಿ ಶಾಸಕರಿಗೆ ಹಸ್ತಲಾಘವ ಮಾಡಿದ್ದರು. ಕುಶಲ ಸಂಭಾಷಣೆ ನಡೆಸಿದ್ದರು. ಇದು ಸಿಎಂ ಕೋಪಕ್ಕೆ ಕಾರಣವಾಗಿತ್ತು. ಹಾಗೆಯೇ ಕುಮಾರಕೃಪಾ ಅತಿಥಿ ಗೃಹದಲ್ಲಿ ಬಿಜೆಪಿ ರಾಜ್ಯ ಉಸ್ತುವಾರಿ ಮುರಳೀಧರರಾವ್‌ ಅವರನ್ನು ಮಹೇಶ್‌ ಭೇಟಿಯಾಗಿದ್ದರಿಂದ ಸಿಎಂ ಅಸಹನೆಗೊಂಡಿದ್ದರು. ಹಾಗಾಗಿ ಇಬ್ಬರತ್ತಲೂ ಬೆರಳು ತೋರಿಸಿದ ಸಿಎಂ, ''ಏನ್ರೀ ಬಿಜೆಪಿ ಸಂಪರ್ಕ ಮಾಡಲು ಹೋಗಿದ್ರಾ,'' ಎಂದು ತರಾಟೆಗೆ ತೆಗೆದುಕೊಂಡರೆಂದು ತಿಳಿದು ಬಂದಿದೆ.