ಕರಾವಳಿಯಲ್ಲಿ ಇನ್ನೂ ನಾಲ್ಕು ದಿನ ಭಾರಿ ಮಳೆ ಮುಂದುವರಿಕೆ - ಹವಾಮಾನ ಇಲಾಖೆ

ಬೆಂಗಳೂರು: ರಾಜ್ಯದ ಕರಾವಳಿ ಹಾಗೂ ಉತ್ತರ ಒಳನಾಡಿನಲ್ಲಿ ನೈಋುತ್ಯ ಮುಂಗಾರು ಸಕ್ರಿಯವಾಗಿದ್ದು, ದಕ್ಷಿಣ ಒಳನಾಡು ಪ್ರದೇಶದಲ್ಲಿ ಮಳೆಯ ತೀವ್ರತೆ ತುಸು ಕಡಿಮೆಯಾಗಿದೆ.

ಬುಧವಾರದಿಂದ ನಾಲ್ಕು ದಿನಗಳ ಕಾಲ ಕರಾವಳಿ ಜಿಲ್ಲೆಗಳಾದ ಉತ್ತರ ಕನ್ನಡ, ದಕ್ಷಿಣ ಕನ್ನಡ, ಉಡುಪಿಯಲ್ಲಿ ಭಾರಿ ಮಳೆ ಮುಂದುವರಿಯಲಿದೆ. ಮೊದಲೆರಡು ದಿನ ಯಲ್ಲೋ ಅಲರ್ಟ್‌, ನಂತರದ ಎರಡು ದಿನ ಆರೆಂಜ್‌ ಅಲರ್ಟ್‌ ಘೋಷಿಸಲಾಗಿದೆ. ಉತ್ತರ ಒಳನಾಡಿನ ಜಿಲ್ಲೆಗಳಾದ ಬೀದರ್‌, ಕಲಬುರಗಿ, ಯಾದಗಿರಿ ಹಾಗೂ ವಿಜಯಪುರದಲ್ಲಿಯೂ ಸಾಧಾರಣಾ ಮಳೆಯಾಗುವ ಸಾಧ್ಯತೆ ಇದ್ದು ಹವಾಮಾನ ಇಲಾಖೆ ಯಲ್ಲೋ ಅಲರ್ಟ್‌ ಘೋಷಿಸಿದೆ.

ಭಾರಿ ಮಳೆಗೆ ನಲುಗಿದ ಕಲಬುರಗಿ, ಸೋಯಾ ಬೆಳೆ ನೀರುಪಾಲು, ಮನೆ ಕುಸಿದು ಐವರಿಗೆ ಗಾಯ

ಕಮಲಾಪುರದಲ್ಲಿ ಅತಿ ಹೆಚ್ಚು ಮಳೆ

ಮಂಗಳವಾರ ಕಲಬುರಗಿ ಜಿಲ್ಲೆ ಕಮಲಾಪುರದಲ್ಲಿಅತಿ ಹೆಚ್ಚು (140 ಮಿ.ಮೀ.) ಮಳೆಯಾಗಿದೆ. ಶಾಂತಪುರ (ಬೀದರ್‌ ಜಿಲ್ಲೆ) 120, ಹುಮನಾಬಾದ್‌ 100, ಔರಾದ್‌ 60, ಕಲಬುರಗಿ, ಆಗುಂಬೆ ತಲಾ 50, ಚಿಂಚೋಳಿ, ಸೇಡಂ, ಬೀದರ್‌ ತಲಾ 30, ಕಾರವಾರ, ಕದ್ರ, ಮಂಕಿ, ಕುಂದಾಪುರ, ಪಣಂಬೂರು, ವಿಜಯಪುರ, ಕಮ್ಮರಡಿ ತಲಾ 20 ಮಿ.ಮೀ.ನಷ್ಟು ಮಳೆಯಾಗಿದೆ.