ಪ್ರಬಲವಾದ ಹಿಂಗಾರು: ಕರಾವಳಿಯಲ್ಲಿ ಭಾರಿ ಮಳೆ ಸಾಧ್ಯತೆ

ಬೆಂಗಳೂರು: ರಾಜ್ಯಕ್ಕೆ ಹಿಂಗಾರು ಪ್ರವೇಶವಾಗುತ್ತಿದ್ದಂತೆಯೇ ದಕ್ಷಿಣ ಒಳನಾಡು ಹಾಗೂ ಕರಾವಳಿಯಲ್ಲಿ ಭಾರಿ ಮಳೆ ಆರಂಭವಾಗಿದೆ. ದಕ್ಷಿಣ ಒಳನಾಡಿನಲ್ಲಿಮೇಲ್ಮೈ ಸುಳಿಗಾಳಿ ಹಾಗೂ ಅರಬ್ಬಿ ಸಮುದ್ರದಲ್ಲಿವಾಯುಭಾರ ಕುಸಿತವಾಗಿರುವುದರಿಂದ ಮುಂದಿನ ಮೂರು ದಿನಗಳ ಕಾಲ ಭಾರಿ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಅರಬ್ಬಿ ಸಮುದ್ರದ ಆಗ್ನೇಯ ಭಾಗದಲ್ಲಿವಾಯುಭಾರ ಕುಸಿತವಾಗಿದೆ.

ದಕ್ಷಿಣ ಒಳನಾಡಿನಿಂದ ತೆಲಂಗಾಣವರೆಗೆ ಮೇಲ್ಮೈ ಸುಳಿಗಾಳಿ ಕಾಣಿಸಿಕೊಂಡಿದೆ. ಈ ಬದಲಾದ ಹವಾಮಾನದಿಂದ ದಕ್ಷಿಣ ಒಳನಾಡು ಹಾಗೂ ಕರಾವಳಿಯಲ್ಲಿ ಮೂರು ದಿನ ಧಾರಾಕಾರ ಮಳೆ ಸುರಿಯುವ ಸಾಧ್ಯತೆ ಇದೆ. ಅ.18ರಿಂದ 22ರವರೆಗೆ ಕರಾವಳಿಯ ದಕ್ಷಿಣ ಕನ್ನಡ, ಉತ್ತರ ಕನ್ನಡ, ಉಡುಪಿ, ದಕ್ಷಿಣ ಒಳನಾಡಿನ ಬೆಂಗಳೂರು ಗ್ರಾಮಾಂತರ, ಚಾಮರಾಜನಗರ, ಹಾಸನ, ಚಿಕ್ಕಮಗಳೂರು, ಹಾಸನ, ಕೊಡಗು, ಶಿವಮೊಗ್ಗ ಜಿಲ್ಲೆಗಳಲ್ಲಿ ಚದುರಿದಂತೆ ಭಾರಿ ಮಳೆಯಾಗುವ ಸಾಧ್ಯತೆ ಇದೆ.

ಅ.19ರಿಂದ 21ರವರೆಗೆ ಬೆಳಗಾವಿ, ಬೀದರ್‌, ಧಾರವಾಡ, ಗದಗ, ಹಾವೇರಿ, ಕಲಬುರ್ಗಿ, ಕೊಪ್ಪಳ ಜಿಲ್ಲೆಗಳಲ್ಲಿ ಚದುರಿದಂತೆ ಭಾರಿ ಮಳೆ ಬರಲಿದೆ. ಆದರೂ ದಕ್ಷಿಣ ಒಳನಾಡಿಗೆ ಹೋಲಿಸಿದರೆ ಉತ್ತರ ಒಳನಾಡಿನ ಜಿಲ್ಲೆಗಳಲ್ಲಿ ಕಡಿಮೆ ಮಳೆಯಾಗಲಿದೆ. ಗುರುವಾರ, ಮಂಡ್ಯದ ನೆಲ್ಲಿಗೆರೆಯಲ್ಲಿ84 ಮಿ.ಮೀ., ಚಿಕ್ಕಬಳ್ಳಾಪುರದ ತಿಮ್ಮಂಪಲ್ಲಿಯಲ್ಲಿ58 ಮಿ.ಮೀ., ಕೂಡಿಗೆಯಲ್ಲಿ38 ಮಿ.ಮೀ., ಈಡುವಿನಲ್ಲಿ36 ಮಿ.ಮೀ., ಗೇರುಸೊಪ್ಪ, ಭಾಗಮಂಡಲದಲ್ಲಿ30 ಮಿ.ಮೀ., ಸೋಮವಾರಪೇಟೆ, ತಾಳಗುಪ್ಪ, ಹೊಸನಗರ, ಹುಂಚದಕಟ್ಟೆಯಲ್ಲಿ20 ಮಿ.ಮೀ., ಕುಂದಾಪುರ, ಅಂಕೋಲ, ಕಿರವಟ್ಟಿ, ಬೆಳಗಾವಿ, ಮಡಿಕೇರಿ, ಚಿಕ್ಕಮಗಳೂರು, ಪಿರಿಯಾಪಟ್ಟಣ, ಚಾಮರಾಜನಗರ, ಕೆ.ಆರ್‌.ಪೇಟೆ, ಬೆಳ್ಳೂರಿನಲ್ಲಿ 10 ಮಿ.ಮೀ. ಮಳೆ ಸುರಿದಿದೆ. ಬಾಕ್ಸ್‌ ಆರೆಂಜ್‌ ಅಲರ್ಟ್‌ ಕರಾವಳಿಗೆ ಅ.19 ಹಾಗೂ 20 ರಂದು ಆರೆಂಜ್‌ ಅಲರ್ಟ್‌ ನೀಡಲಾಗಿದೆ. ಈ ಅಲರ್ಟ್‌ ಪ್ರಕಾರ ಕರಾವಳಿಯ ಕೆಲವೆಡೆ 115-204 ಮಿ.ಮೀ. ಮಳೆ ಸುರಿಯುವ ಸಾಧ್ಯತೆ ಇದೆ.

ಅರಬ್ಬೀ ಸಮುದ್ರದಲ್ಲಿ ಗಂಟೆಗೆ 45-5 ವೇಗದಲ್ಲಿ ಗಾಳಿ ಬೀಸುತ್ತಿದ್ದು, 65 ಕಿ.ಮೀ.ಗೆ ತಲುಪುವ ಸಾಧ್ಯತೆ ಇದೆ. ಅಲೆಗಳಬ್ಬರ ಜೋರಾಗಿರುವುದರಿಂದ ಮೀನುಗಾರರು ಕಡಲಿಗಿಳಿಯಬಾರದೆಂದು ಹವಾಮಾನ ಇಲಾಖೆ ಎಚ್ಚರಿಸಿದೆ.