‘ನಾನು ಕಾನೂನಿನ ಪ್ರಕಾರವೇ ಜಮೀನು ಹಂಚಿಕೆ ಮಾಡಿದ್ದೆ’; ಮುರುಗೇಶ್ ನಿರಾಣಿ

ಬೆಂಗಳೂರು: ನಾನು ಯಾವುದೇ ಸರಕಾರಿ ಜಮೀನು ಹೊಡೆದಿಲ್ಲ. ಯಾವ ಸಂಬಂಧಿಕರಿಗೂ ಪ್ರಭಾವ ಬೀರಿ ಭೂಮಿ ಕೊಡಿಸಿಲ್ಲ. ಸರಕಾರದ ಬಳಿಯೇ ಜಮೀನು ಇರುವಾಗ ಇದರಲ್ಲಿ ಭ್ರಷ್ಟಾಚಾರ ನಡೆಯಲು ಹೇಗೆ ಸಾಧ್ಯ ಎಂದು ನೂತನ ಸಚಿವ ಮುರುಗೇಶ ನಿರಾಣಿ ಪ್ರಶ್ನಿಸಿದರು.

ರಾಜ್ಯ ಬಿಜೆಪಿ ಕಚೇರಿಗೆ ಭೇಟಿ ನೀಡಿದ ಬಳಿಕ ಸುದ್ದಿಗಾರರೊಂದಿಗೆ ಶುಕ್ರವಾರ ಮಾತನಾಡಿ, ಸಾಮಾಜಿಕ ಹೋರಾಟಗಾರ ಆಲಂ ಪಾಷ ಆರೋಪ ಹುರುಳಿಲ್ಲದ್ದು. ನಾನು ಕೈಗಾರಿಕೆ ಸಚಿವನಾಗಿದ್ದಾಗ ಆಲಂ ಪಾಷ ಅವರಿಗೆ ಜಮೀನು ಹಂಚಿಕೆ ಮಾಡಲಾಗಿದೆ. ಅವರಿಗೆ ಹಣ ಕಟ್ಟಲು ಸಮಯ ನೀಡಲಾಗಿತ್ತು. ನಿಗದಿತ ಸಮಯದಲ್ಲಿ ಹಣ ಕಟ್ಟಲು ಸಾಧ್ಯವಾಗಲಿಲ್ಲ. ಸಮಯ ವ್ಯರ್ಥ ಮಾಡಿ ಜಮೀನು ಹೊಡೆಯಲು ಯತ್ನಿಸಿದರು ಎಂದು ಆರೋಪಿಸಿದರು.

‘ಯಾರ ಹತ್ರ ಇರದಿದ್ರೂ ನಮ್ಮ ಸ್ನೇಹಿತ ವಿಶ್ವನಾಥ್ ಹತ್ರ ಸಿ.ಡಿ ಇದ್ದೇ ಇರುತ್ತೆ’; ಟಿಬಿ ಜಯಚಂದ್ರ
ಅಲ್ಲದೇ ಈಗಲೂ ಆ ಜಮೀನು ಕೆಐಎಡಿಬಿ ಅಧೀನದಲ್ಲಿದೆ. ಕಾನೂನು ಪ್ರಕಾರ ಹಣ ಕಟ್ಟಿದ್ದರೆ ಜಮೀನು ಕೊಡುತ್ತಿದ್ದೆವು. ನಿಗದಿತ ಸಮಯದಲ್ಲಿ ಹಣ ಕಟ್ಟಲಿಲ್ಲಎಂಬ ಕಾರಣಕ್ಕೆ ಜಮೀನು ಸಿಕ್ಕಿಲ್ಲ ಎಂದರು. ಇನ್ನು ಆಲಂ ಪಾಷ ಬ್ಲ್ಯಾಕ್‌ ಮೇಲ್‌ ಮಾಡುವುದರಲ್ಲಿಎತ್ತಿದ ಕೈ. ನಾನು ಕಾನೂನಿನ ಪ್ರಕಾರವೇ ಜಮೀನು ಹಂಚಿಕೆ ಮಾಡಿದ್ದೆ. ಇದರಲ್ಲಿ ಯಾವುದೇ ಕಾನೂನು ಉಲ್ಲಂಘನೆ ಪ್ರಶ್ನೆ ಬರುವುದೇ ಇಲ್ಲ. ಇಲ್ಲಿಯ ತನಕ ಏಕೆ ಸುಮ್ಮನಿರಬೇಕಿತ್ತು? ಈಗ ನಾನು ಸಚಿವನಾಗುತ್ತಿದ್ದಂತೆ ಈ ಪ್ರಕರಣವನ್ನು ಪಾಷ ಕೆದಕುತ್ತಿದ್ದಾರೆ. ಬ್ಲಾಕ್‌ ಮೇಲ್‌ ಮಾಡುವವರಿಗೆ ಬಗ್ಗುವುದಿಲ್ಲ ಎಂದು ಹೇಳಿದರು.