ಪತ್ತೆಯಾಗದ ಮನ್ಸೂರ್‌ ಖಾನ್‌ ಆಡಿಯೊ ಮೂಲ

ಬೆಂಗಳೂರು: ಐಎಂಎ ಕಂಪನಿ ಮಾಲೀಕ ಮನ್ಸೂರ್‌ ಖಾನ್‌ ದೇಶ ಬಿಟ್ಟು ಪರಾರಿ ಆಗಿ ಒಂದು ವಾರ ಕಳೆದಿದೆ. ಆದರೆ ಆತನ ಆಡಿಯೊ ಸಂದೇಶವನ್ನು ಯಾವ ನಂಬರಿನಿಂದ ಯಾರು ಕಳುಹಿಸಿದರು ಎನ್ನುವುದನ್ನು ಪತ್ತೆ ಹಚ್ಚಲು ಪೊಲೀಸರಿಗೆ ಸಾಧ್ಯವಾಗಿಲ್ಲ.

ಯಾವ ನಂಬರಿನಿಂದ? ಯಾವ ದೇಶದಿಂದ ?

ಸದ್ಯ ದೇಶ ಬಿಟ್ಟು ಪರಾರಿ ಆಗಿರುವ ಮನ್ಸೂರ್‌ ಖಾನ್‌ ಆಡಿಯೊದಲ್ಲಿ ಹೇಳಿದಂತೆ ಆತ್ಮಹತ್ಯೆ ಮಾಡಿಕೊಂಡಿಲ್ಲ. ಆತ ಬದುಕಿದ್ದಾನೆ ಎನ್ನುವುದು ತನಿಖಾ ತಂಡಕ್ಕೆ ಖಚಿತವಾಗಿದೆ. ಈ ಆಡಿಯೊವನ್ನು ನಗರ ಪೊಲೀಸ್‌ ಕಮಿಷನರ್‌ ಸುನಿಲ್‌ ಕುಮಾರ್‌ ಅವರಿಗೆ ಕಳುಹಿಸಿದ್ದಾಗಿ ಆತ ಹೇಳಿಕೊಂಡಿದ್ದ. ಈ ಆಡಿಯೊ ಹಾವು ಬಿಟ್ಟು ದೇಶ ತೊರೆದಿರುವ ಮನ್ಸೂರ್‌ ಯಾವ ದೇಶದಲ್ಲಿ ಇದ್ದಾನೆ ? ಯಾವ ಪಾಸ್‌ಪೋರ್ಟ್‌ನಿಂದ ಯಾವತ್ತು ದೇಶ ತೊರೆದ ಎನ್ನುವ ಮಾಹಿತಿಗಳು ಇದುವರೆಗೂ ತನಿಖಾ ತಂಡಕ್ಕೆ ಪತ್ತೆಯಾಗಿಲ್ಲ. ಆದರೆ ಇದುವರೆಗೂ ತನಿಖಾ ತಂಡಕ್ಕೆ ಆಡಿಯೊ ಮೂಲ ಪತ್ತೆಯಾಗದಿರುವುದು ತಲೆ ನೋವಿಗೆ ಕಾರಣವಾಗಿದೆ.

ಮನ್ಸೂರ್‌ ಫೋನ್‌ ಅಲ್ಲ :

ಇದುವರೆಗಿನ ಪೊಲೀಸ್‌ ತನಿಖೆಯ ಪ್ರಕಾರ ಮನ್ಸೂರ್‌ ಖಾನ್‌ ಮತ್ತು ಆತನ ಪತ್ನಿ ಮಕ್ಕಳು ನಿಯಮಿತವಾಗಿ ಬಳಸುತ್ತಿದ್ದ ಮೊಬೈಲ್‌ ಫೋನ್‌ಗಳು ಜೂ 6ಕ್ಕೆ ಬೆಂಗಳೂರಿನಲ್ಲೇ ಸ್ವಿಚ್‌ ಆಫ್‌ ಆಗಿದ್ದು ಮತ್ತೆ ಆನ್‌ ಆಗಿಯೇ ಇಲ್ಲ. ಹೀಗಾಗಿ ಆಡಿಯೊ ವೈರಲ್‌ ಆಗಿರುವುದು ಮನ್ಸೂರ್‌ನ ಮೊಬೈಲ್‌ನಿಂದ ಅಲ್ಲವೇ ಅಲ್ಲ ಎನ್ನುವುದು ತನಿಖಾ ತಂಡದಲ್ಲಿರುವ ಅಧಿಕಾರಿಗಳ ವಾದ.

ಕೊನೆ ಕರೆ ಪತ್ನಿಗೆ

ಮನ್ಸೂರ್‌ ಖಾನ್‌ ಬಳಸುತ್ತಿದ್ದ ಒಂದು ಪ್ರಮುಖ ಮೊಬೈಲ್‌ ನಂಬರಿನ ಕೊನೆ ಕರೆ ಆಧರಿಸಿ ಪೊಲೀಸರು ತನಿಖೆ ನಡೆಸುತ್ತಿದ್ದು, ಆತ ತನ್ನ ಪತ್ನಿಗೆ ಜೂ.6 ರಂದು ಕೊನೆಯ ಕರೆ ಮಾಡಿದ್ದಾನೆ. ಆ ನಂಬರ್‌ ಮುಂಬಯಿನಲ್ಲಿ ಚಾಲ್ತಿಯಲ್ಲಿದ್ದು, ಬಳಿಕ ಸ್ವಿಚ್‌ ಆಗಿದೆ. ಸಿಸಿಬಿ ಹೆಚ್ಚುವರಿ ಆಯುಕ್ತ ಅಲೋಕ್‌ಕುಮಾರ್‌ ಅವರ ಎದುರು ಜೂ.4 ರಂದು ಸತತ ನಾಲ್ಕು ಗಂಟೆಗಳ ವಿಚಾರಣೆ ಎದುರಿಸಿದ್ದ ಮನ್ಸೂರ್‌ ಖಾನ್‌ ಮುಂಬೈನಿಂದ ಮರಳಿದ್ದು ಜೂ.3 ಕ್ಕೆ. ಜೂನ್‌ 5 ರಂದು ರಂಜಾನ್‌ ಮುಗಿಸಿಕೊಂಡು ಜೂ 6 ಕ್ಕೆ ವಿಮಾನ ಹತ್ತಿದ್ದಾನೆ ಎನ್ನುತ್ತವೆ ಪೊಲೀಸ್‌ ಮೂಲಗಳು