9 ವರ್ಷಗಳಲ್ಲಿಐಎಂಎ ಕಟ್ಟಿದ ಟಿಡಿಎಸ್‌ ಬರೀ 3.50 ಲಕ್ಷ ರೂ. !

ಬೆಂಗಳೂರು: ಐವತ್ತು ಸಾವಿರಕ್ಕೂ ಹೆಚ್ಚು ಜನರಿಗೆ ವಂಚಿಸಿರುವ ಐಎಂಎ ಸಮೂಹ ಕಂಪನಿಗಳು ಕಳೆದ 9 ವರ್ಷಗಳಲ್ಲಿ ತೆರಿಗೆ ಇಲಾಖೆಗೆ ಪಾವತಿಸಿರುವ 'ಟಿಡಿಎಸ್‌' ಕೇವಲ 3.50 ಲಕ್ಷ ರೂ.!!

ಐಎಂಎಯ ಹೂಡಿಕೆ ಕಂಪನಿ, ಜ್ಯುವೆಲ್ಸ್‌, ಮೆಡಿಕಲ್ಸ್‌, ಆಸ್ಪತ್ರೆ ಸೇರಿದಂತೆ ಇನ್ನಿತರ ಕಂಪನಿಗಳ ವ್ಯವಹಾರದ ಮೇಲೆ ಕಟ್ಟಿರುವ ಟಿಡಿಎಸ್‌ನ ವಿವರ ಒದಗಿಸುವಂತೆ ಸಕ್ಷಮ ಪ್ರಾಧಿಕಾರದಿಂದ ತೆರಿಗೆ ಇಲಾಖೆಗೆ ಪತ್ರ ಬರೆಯಲಾಗಿತ್ತು. ತೆರಿಗೆ ಇಲಾಖೆಯಿಂದ ಪ್ರಾಧಿಕಾರಕ್ಕೆ ಉತ್ತರ ಬಂದಿದ್ದು, 9 ವರ್ಷಗಳಲ್ಲಿಬರೀ 3.5 ಲಕ್ಷ ರೂ. ಕಟ್ಟಲಾಗಿದೆ ಎಂದು ತಿಳಿಸಲಾಗಿದೆ.

''ಸಾರ್ವಜನಿಕರು ಹೂಡಿಕೆ ಮಾಡಿದ ಹಣಕ್ಕೆ ರಿಟರ್ನ್‌ ಕೊಡುವ ವೇಳೆ ಐಎಂಎ ಕಂಪನಿಯು ಕಮ್ಮಿ ಹಣ ಕೊಡುತ್ತಿತ್ತು. ಈ ಕುರಿತು ಹೂಡಿಕೆದಾರರು ಕೇಳಿದಾಗ ಟಿಡಿಎಸ್‌ ಕಡಿತ ಮಾಡಿಕೊಳ್ಳಲಾಗುತ್ತಿದೆ ಎಂದು ಹೇಳುತ್ತಿದ್ದರು. ಹಲವರಿಗೆ ಟಿಡಿಎಸ್‌ ಮಾಹಿತಿಯೇ ಇರಲಿಲ್ಲ. ಅದನ್ನು ವರ್ಷಕ್ಕೊಮ್ಮೆ ಕ್ಲೇಮ್‌ ಮಾಡಿಕೊಳ್ಳಬೇಕು ಎಂಬ ಮಾಹಿತಿಯು ಇರಲಿಲ್ಲ,'' ಎಂದು ಹೈಕೋರ್ಟ್‌ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿರುವ ವಕೀಲ ಮೊಹಮ್ಮದ್‌ ತಾಹೀರ್‌ ತಿಳಿಸಿದರು.

''ಕಂಪನಿಯು ಹಲವು ವರ್ಷಗಳಿಂದ ಟಿಡಿಎಸ್‌ ಕಡಿತ ಮಾಡಿಕೊಳ್ಳುತ್ತಿತ್ತು. ಹೂಡಿಕೆದಾರರು ಆ ಹಣವನ್ನು ಕ್ಲೇಮ್‌ ಮಾಡಿಕೊಳ್ಳದ ಕಾರಣ ಐಟಿ ಇಲಾಖೆಗೆ ಕೋಟ್ಯಂತರ ರೂ. ಟಿಡಿಎಸ್‌ ಕಟ್ಟಿರಬಹುದು ಎಂದು ಭಾವಿಸಿದ್ದೆ. ಆದರೆ, ಸಕ್ಷಮ ಪ್ರಾಧಿಕಾರದವರು ಸಂಗ್ರಹಿಸಿದ ವರದಿಯನ್ನು ಹೈಕೋರ್ಟ್‌ಗೆ ಸಲ್ಲಿಸಿದ್ದಾರೆ. ಇದರಲ್ಲಿಕಂಪನಿ ವಂಚಿಸಿರುವುದು ಗೊತ್ತಾಯಿತು,'' ಎಂದಿದ್ದಾರೆ.

ಏನಿದು ಟಿಡಿಎಸ್‌

ಯಾವುದೇ ಕಂಪನಿಯು ಐಟಿ ಇಲಾಖೆ ನಿಯಮಗಳ ಅನುಸಾರ ನಿಗದಿಪಡಿಸಿದ ಮೊತ್ತಕ್ಕಿಂತ ಹೆಚ್ಚು ಹಣವನ್ನು ಪೇಮೆಂಟ್‌ ಮಾಡುತ್ತಿದ್ದಲ್ಲಿ, ಟಿಡಿಎಸ್‌ ಕಡಿತ ಮಾಡಿಕೊಳ್ಳಬೇಕು ಮತ್ತು ಅದನ್ನು ಐಟಿ ಇಲಾಖೆಗೆ ಜಮಾ ಮಾಡಬೇಕು. ಹಣ ಕಡಿತವಾಗಿದ್ದವರು ಐಟಿ ಇಲಾಖೆಗೆ ರಿಟರ್ನ್‌ ಸಲ್ಲಿಕೆ ಮೂಲಕ ಅದನ್ನು ಕ್ಲೇಮ್‌ ಮಾಡಿಕೊಳ್ಳಬಹುದು.

ಐಟಿ ಇಲಾಖೆ ನಿರ್ಲಕ್ಷ್ಯ?

ಕಂಪನಿಗಳು ನಡೆಸುವ ವಹಿವಾಟು ಮತ್ತು ಅಲ್ಲಿಕಡಿತ ಮಾಡಿಕೊಂಡಿರುವ ಟಿಡಿಎಸ್‌ ಅನ್ನು ಐಟಿ ಇಲಾಖೆಗೆ ಪಾವತಿಸುತ್ತಿರುವ ಬಗ್ಗೆ ಐಟಿ ಇಲಾಖೆ ಪರಿಶೀಲನೆ ನಡೆಸಬೇಕು. ಪಾವತಿ ಮಾಡದೇ ಇದ್ದರೆ ಈ ಕುರಿತು ಐಟಿ ಕಾಯಿದೆ ಅನ್ವಯ ಕ್ರಮ ಕೈಗೊಳ್ಳಬೇಕಾಗುತ್ತದೆ. ಆದರೆ, ಐಎಂಎ ಕಂಪನಿಯು ನಿಯಮ ಪಾಲಿಸದಿದ್ದರೂ ಕಣ್ಮುಚ್ಚಿಕೊಂಡು ಕುಳಿತಿರುವುದು ಏಕೆ,'' ಎಂದು ವಕೀಲ ತಾಹೀರ್‌ ಪ್ರಶ್ನಿಸಿದ್ದಾರೆ.