ಕೈಗಾರಿಕೆಗಳಿಗೆ ಭೂಮಿ : ವಿವರ ಕೇಳಿದ ಪಿಎಸಿ

ಬೆಂಗಳೂರು: ಉದ್ಯಮ ಸಂಸ್ಥೆಗಳಿಗೆ ಭೂಮಿ ಹಸ್ತಾಂತರ ಮಾಡಿರುವುದು ಮತ್ತು ಉದ್ಯೋಗ ಸೃಷ್ಟಿಯ ಮಾಹಿತಿಯನ್ನು 15 ದಿನದೊಳಗೆ ಒದಗಿಸುವಂತೆ ಕೈಗಾರಿಕೆ ಇಲಾಖೆಗೆ ಸಾರ್ವಜನಿಕ ಲೆಕ್ಕಪತ್ರ ಸಮಿತಿ (ಪಿಎಸಿ) ಸೂಚಿಸಿದೆ.

ಮಾಜಿ ಡಿಸಿಎಂ ಆರ್‌.ಅಶೋಕ್‌ ಅಧ್ಯಕ್ಷತೆಯ ಪಿಎಸಿ ಸಭೆ ವಿಧಾನಸೌಧದಲ್ಲಿ ಮಂಗಳವಾರ ನಡೆಯಿತು. ಜಿಂದಾಲ್‌ಗೆ ಭೂಮಿ ನೀಡುವ ಸಂಪುಟದ ನಿರ್ಣಯ ವಿವಾದಕ್ಕೆ ಗುರಿಯಾಗಿದ್ದರಿಂದ ಈ ಬಗ್ಗೆ ಪರಾಮರ್ಶೆ ನಡೆಸಲಾಯಿತು. ಜತೆಗೆ ಬೃಹತ್‌ ಮತ್ತು ಮಧ್ಯಮ ಕೈಗಾರಿಕೆ ಸಂಬಂಧ ಯಾವೆಲ್ಲ ಕಂಪನಿಗಳಿಗೆ ಸರಕಾರದಿಂದ ಭೂಮಿ ಒದಗಿಸಲಾಗಿದೆ ಎಂಬ ಸಮಗ್ರ ಮಾಹಿತಿ ನೀಡಬೇಕು. ಇಂಥ ಕೈಗಾರಿಕೆಗಳ ಪೈಕಿ ಕನ್ನಡಿಗರೇ ಸ್ಥಾಪಿಸಿದ ಸಂಸ್ಥೆಗಳೆಷ್ಟಿವೆ ಎಂಬ ವಿವರವೂ ಅಗತ್ಯ. ಕನ್ನಡಿಗರಿಗೆ ಉದ್ಯೋಗ ನೀಡಿದ್ದರ ಬಗ್ಗೆಯೂ ತಿಳಿಸಬೇಕು ಎಂಬ ನಿರ್ದೇಶನ ಕೊಡಲಾಗಿದೆ ಎಂದು ತಿಳಿದು ಬಂದಿದೆ.

500 ಕೋಟಿ ರಾಜಧನ ಬಾಕಿ

ಜಲ್ಲಿ ಕ್ರಷರ್‌ ಸಂಸ್ಥೆ ಮಾಲೀಕರು ಕಳೆದ 3 ವರ್ಷದಿಂದ 500 ಕೋಟಿ ರೂ. ರಾಜಧನ ಬಾಕಿ ಇರಿಸಿಕೊಂಡಿರುವುದನ್ನೂ ಪಿಎಸಿ ಗಂಭೀರವಾಗಿ ಪರಿಗಣಿಸಿದೆ. 3 ತಿಂಗಳ ಗಡುವು ವಿಧಿಸಿದ್ದರೂ ಬಾಕಿ ಮೊತ್ತ ಪಾವತಿಯಾಗಿಲ್ಲ. ಈ ಸಂಬಂಧವೂ 15 ದಿನದೊಳಗೆ ಕ್ರಮ ಕೈಗೊಂಡು ವರದಿ ಸಲ್ಲಿಸುವಂತೆ ಸಮಿತಿ ಸೂಚಿಸಿದೆ ಎಂದು ಗೊತ್ತಾಗಿದೆ.