ಪರಿಷತ್ ಕೋಲಾಹಲ: ಶೀಘ್ರದಲ್ಲೇ ಮಧ್ಯಂತರ ವರದಿ, ಗುರುವಾರ ಸಮಿತಿಯಿಂದ ಕರಡು ಪರಿಶೀಲನಾ ಸಭೆ

ಬೆಂಗಳೂರು: ಸಭಾಪತಿ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡನೆ ವಿಚಾರವಾಗಿ ಡಿಸೆಂಬರ್ 15 ರಂದು ವಿಧಾನಪರಿಷತ್‌ನಲ್ಲಿ ನಡೆದ ಕೋಲಾಹಲ ವಿಚಾರವಾಗಿ ತನಿಖೆ ನಡೆಸಲು ರಚನೆಯಾಗಿರುವ ಸದನ ಸಮಿತಿ ಶೀಘ್ರದಲ್ಲೇ ಮಧ್ಯಂತರ ವರದಿ ನೀಡುವ ಸಾಧ್ಯತೆ ಇದೆ. ಈಗಾಗಲೇ ಎರಡು ಸುತ್ತಿನ ಸಭೆಗಳು ನಡೆದಿತ್ತು. ಗುರುವಾರ ಮಧ್ಯಂತರ ವರದಿಯ ಕರಡು ಪರಿಶೀಲನಾ ಸಭೆ ನಡೆಯಲಿದೆ.

ಡಿಸೆಂಬರ್ 15 ರಂದು ವಿಧಾನಪರಿಷತ್‌ನಲ್ಲಿ ಸಭಾಪತಿ ಪ್ರತಾಪಚಂದ್ರ ಶೆಟ್ಟಿ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡನೆಯ ವಿಚಾರವಾಗಿ ಗದ್ದಲ ಉಂಟಾಗಿತ್ತು. ಈ ಸಂದರ್ಭದಲ್ಲಿ ಸದನದ ಸಂಪ್ರದಾಯ ಮೀರಿ ಬೆಲ್‌ ಮುಕ್ತಾಯಗೊಳ್ಳುವ ಮೊದಲು ಉಪಸಭಾಪತಿಯಾಗಿದ್ದ ಧರ್ಮೇಗೌಡ ಅವರು ಸಭಾಪತಿ ಪೀಠದಲ್ಲಿ ಕುಳಿತುಕೊಂಡಿದ್ದರು.

ಶಾಕಿಂಗ್‌ ನ್ಯೂಸ್‌..! ವಿಧಾನ ಪರಿಷತ್‌ ಉಪಸಭಾಪತಿ ಎಸ್‌ಎಲ್‌ ಧರ್ಮೇಗೌಡ ರೈಲಿಗೆ ತಲೆಕೊಟ್ಟು ಆತ್ಮಹತ್ಯೆ..!

ಇದಕ್ಕೆ ವಿರೋಧ ವ್ಯಕ್ತಪಡಿಸಿದ ಕಾಂಗ್ರೆಸ್ ಸದಸ್ಯರು ಉಪಸಭಾಪತಿಯನ್ನು ಬಲವಂತದಿಂದ ಸಭಾಪತಿ ಪೀಠದಿಂದ ಎಬ್ಬಿಸಿದ್ದರು. ಈ ಸಂದರ್ಭದಲ್ಲಿ ಬಿಜೆಪಿ, ಕಾಂಗ್ರೆಸ್ ಹಾಗೂ ಜೆಡಿಎಸ್‌ ಸದಸ್ಯರ ನಡುವೆ ಜಟಾಪಟಿ ನಡೆದಿತ್ತು. ಸಭಾಪತಿಯ ಪೀಠಕ್ಕೂ ಹಾನಿ ಉಂಟು ಮಾಡಲಾಗಿತ್ತು.

ಪರಿಷತ್ ಗಲಭೆಗೆ ವ್ಯಾಪಕ ಟೀಕೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಸಭಾಪತಿ ಪ್ರತಾಪ ಚಂದ್ರ ಶೆಟ್ಟಿ ಅವರು ಘಟನೆಯ ತನಿಖೆ ನಡೆಸುವ ನಿಟ್ಟಿನಲ್ಲಿ ಪರಿಷತ್ ಸದಸ್ಯ ಮರಿತಿಬ್ಬೇಗೌಡ ಅಧ್ಯಕ್ಷತೆಯಲ್ಲಿ ಸದನ ಸಮಿತಿ ರಚನೆ ಮಾಡಿದ್ದರು.

ಈ ಸಮಿತಿಯಲ್ಲಿ ಬಿಕೆ ಹರಿಪ್ರಸಾದ್, ಹೆಚ್‌ ವಿಶ್ವನಾಥ್, ಆರ್‌.ಬಿ ತಿಮ್ಮಾಪೂರ, ಎಸ್‌ವಿ ಸಂಕನೂರ ಸದಸ್ಯರಿದ್ದರು. ಆದರೆ ಈ ಪೈಕಿ ಬಿಜೆಪಿ ಸದಸ್ಯರಾದ ಹೆಚ್‌.ವಿಶ್ವನಾಥ್ ಹಾಗೂ ಎಸ್‌ವಿ ಸಂಕನೂರ ರಾಜೀನಾಮೆ ನೀಡಿದ್ದಾರೆ. ಇದೀಗ ಇವರ ಅನುಪಸ್ಥಿತಿಯಲ್ಲಿ ಸಮಿತಿಯ ಮಧ್ಯಂತರ ವರದಿಯ ಕರಡು ಪರಿಶೀಲನೆ ಸಭೆ ಗುರುವಾರ ಶಾಸಕರ ಭವನದಲ್ಲಿ ನಡೆಯಲಿದೆ.