ಚಂದ್ರಯಾನ-2 ಆಯುಷ್ಯ ಎರಡು ವರ್ಷಕ್ಕೆ ವಿಸ್ತರಣೆ ಸಂಭವ

ಬೆಂಗಳೂರು: ಚಂದ್ರಯಾನ-2 ಕಕ್ಷೆಗಾಮಿ ಎರಡು ವರ್ಷಗಳ ಕಾಲ ಚಂದ್ರನನ್ನು ಸುತ್ತುತ್ತಾ ಇರಲಿದೆ ಎಂದು ಇಸ್ರೋ ಹೇಳಿದೆ. ಕ್ಷೆಗಾಮಿಯ ಆಯುಷ್ಯ ಒಂದು ವರ್ಷ ಮಾತ್ರ ಎಂದು ಮೊದಲು ಅಂದಾಜಿಸಲಾಗಿತ್ತಾದರೂ, ಸದ್ಯದ ಅದರ ಕಾರ್ಯನಿರ್ವಹಣೆ ಮತ್ತು ಕ್ಷಮತೆ ಗಮನಿಸಿ ಎರಡು ವರ್ಷದ ಆಯುಷ್ಯ ಅಂದಾಜಿಸಲಾಗಿದೆ ಎಂದು ಮೂಲಗಳು ಹೇಳಿವೆ.

978 ಕೋಟಿ ರೂ ವೆಚ್ಚದ ಈ ಮಹತ್ವಾಕಾಂಕ್ಷಿ ಯೋಜನೆಯಲ್ಲಿ ನಿಕಟವಾಗಿ ಪಾಲ್ಗೊಂಡಿರುವ ಐದು ಮಂದಿ ಪ್ರಮುಖರು, ಚಂದ್ರಯಾನ-2 ಆಯುಷ್ಯ 2 ವರ್ಷಗಳಿಗೆ ಎಂದು ಹೆಚ್ಚಿದೆ ಟೈಮ್ಸ್ ಆಫ್‌ ಇಂಡಿಯಾಗೆ ತಿಳಿಸಿದ್ದಾರೆ.

ಚಂದ್ರಯಾನ-1ನ್ನು ಅದರ ನಿಗದಿತ ಆಯುಷ್ಯಕ್ಕಿಂತ ಹೆಚ್ಚು ಕಾಲ ಬಾಳುವಂತೆ ವಿನ್ಯಾಸ ಮಾಡಲಾಗಿತ್ತು. ಆದರೆ ವಿದ್ಯುತ್ ಪೂರೈಕೆ ವ್ಯವಸ್ಥೆಯಲ್ಲಿ ಉಂಟಾದ ದೋಷದಿಂದ ಅದರ ಆಯುಷ್ಯ ನಿಗದಿತ ಅವಧಿ ಮೀರಿ ಹೆಚ್ಚು ಕಾಲ ಮುಂದುವರಿಯಲಿಲ್ಲ. ಆದರೆ ಚಂದ್ರಯಾನ-2ರಲ್ಲಿ ಆ ದೋಷವನ್ನು ಸರಿಪಡಿಸಲಾಗಿದೆ. ಕಕ್ಷೆ ಬದಲಾವಣೆಯ ಎಲ್ಲ ಕಾರ್ಯಗಳ ಬಳಿಕವೂ ಚಂದ್ರಯಾನ-2 ರಲ್ಲಿ ಹೆಚ್ಚಿನ ಇಂಧನ ಉಳಿಯಲಿದ್ದು, ಇದು 2 ವರ್ಷದ ವರೆಗೂ ಕಾರ್ಯನಿರ್ವಹಣೆಗೆ ಸಾಕಾಗುವಷ್ಟಿರುತ್ತದೆ' ಎಂದು ಚಂದ್ರಯಾನ-2 ತಂಡದಲ್ಲಿ ಕೆಲಸ ಮಾಡಿದ ಮೂಲವೊಂದು ತಿಳಿಸಿದೆ.

ಉಡ್ಡಯನದ ವೇಳೆ 1,697 ಕೆ.ಜಿ ತೂಕದ ಇಂಧನವನ್ನು ಕಕ್ಷೆಗಾಮಿಯಲ್ಲಿ ತುಂಬಲಾಗಿತ್ತು. ಜೂನ್ 24 ಮತ್ತು 26ರಂದು ಇಸ್ರೋ ಕೈಗೊಂಡ 2 ಪಥ ಬದಲಾವಣೆ ಕಾರ್ಯಾಚರಣೆಯಲ್ಲಿ 130 ಕೆ.ಜಿ ಇಂಧನ ಬಳಕೆಯಾಗಿದೆ. ಜುಲೈ 27ರಂದು (ಶನಿವಾರ) ಆರ್ಬಿಟರ್‌ನಲ್ಲಿ 1,500 ಕೆ.ಜಿ ಇಂಧನ ಉಳಿದಿತ್ತು.

ಉಡ್ಡಯನ ಕಾರ್ಯಾಚರಣೆ ಅತ್ಯಂತ ನಿಖರವಾಗಿ ನಡೆದಿರುವುದರಿಂದ ಅಂದಾಜು 40 ಕೆ.ಜಿಯಷ್ಟು ಇಂಧನ ಉಳಿತಾಯವಾಗಿದೆ. ನಮ್ಮ ಆರಂಭಿಕ ಯೋಜನೆಯಂತೆ ತುರ್ತು ಸನ್ನಿವೇಶಗಳಿಗಾಗಿ ಸ್ವಲ್ಪ ಹೆಚ್ಚುವರಿ ಇಂಧನವನ್ನೇ ತುಂಬಲಾಗಿತ್ತು. ಆದರೆ ಈಗಿನ ಅಂದಾಜು ಮತ್ತು ಲೆಕ್ಕಾಚಾರದಂತೆ ಕಕ್ಷೆಗಾಮಿ ತನ್ನ ಕಕ್ಷೆಯಲ್ಲಿ ಒಂದು ವರ್ಷ ಕಾಲ ಸುತ್ತಲು ಅಗತ್ಯವಿರುವುದಕ್ಕಿಂತಲೂ ಹೆಚ್ಚು ಇಂಧನ ಹೊಂದಿದೆ' ಎಂದು ವಿಜ್ಞಾನಿಯೊಬ್ಬರು ಮಾಹಿತಿ ನೀಡಿದರು.

ಚಂದ್ರನ ಮೇಲೆ ಇಳಿಯಲಿರುವ ಲ್ಯಾಂಡರ್‌ 'ವಿಕ್ರಮ್' ಕಕ್ಷೆಗಾಮಿಯಿಂದ ಪ್ರತ್ಯೇಕಿಸುವ ಕಾರ್ಯಾಚರಣೆಗೆ ಹಲವು ಕೆ.ಜಿ ಇಂಧನ ಬಳಕೆಯಾಗಲಿದೆ. ಈ ಬೇರ್ಪಡೆಗೆ ಮುನ್ನ 9 ಬಾರಿ ಪಥ ಬದಲಾವಣೆ ಕಾರ್ಯಾಚರಣೆ ನಡೆಯಬೇಕಿದೆ ಎಂದು ಇಸ್ರೋ ಅಧ್ಯಕ್ಷ ಕೆ. ಶಿವನ್ ಈ ಮೊದಲು ಹೇಳಿದ್ದರು.

ಇಸ್ರೋದ ಈಗಿನ ಅಂದಾಜಿನ ಪ್ರಕಾರ, ಭೂಮಿಯ ಅಭಿಮುಖ ಕಾರ್ಯಾಚರಣೆ ಮತ್ತು ಚಂದ್ರನ ಅಭಿಮುಖ ಕಾರ್ಯಾಚರಣೆಗಳ ಬಳಿಕ ಕನಿಷ್ಠ 290.2 ಕೆ.ಜಿ ಇಂಧನ ಉಳಿಯಲಿದೆ. ಚಂದ್ರನ ಸುತ್ತ 100 ಕಿ.ಮೀ x 100 ಕಿಮೀ ಅಳತೆಯ ಕಕ್ಷೆಯಲ್ಲಿ ಚಂದ್ರಯಾನ-2 ಕಕ್ಷೆಗಾಮಿ ಸುತ್ತಲಿದೆ.

'ಚಂದ್ರನ ಸುತ್ತ ಎರಡು ವರ್ಷಕ್ಕೂ ಹೆಚ್ಚು ಕಾಲ ಸುತ್ತಲು ಈ ಇಂಧನ ಸಾಕಾಗುತ್ತದೆ' ಎಂದು ಮತ್ತೊಮ್ಮ ವಿಜ್ಞಾನಿ ತಿಳಿಸಿದರು.

'ಆದರೆ ಚಂದ್ರನ ಗುರುತ್ವಾಕರ್ಷಣೆ ಶಕ್ತಿ ಭೂಮಿಯಂತೆ ಏಕರೂಪವಾಗಿಲ್ಲ. ಹೀಗಾಗಿ ಕಕ್ಷೆಗಾಮಿಯ ಪಥವನ್ನು ನಿಯಮಿತವಾಗಿ ಸರಿಪಡಿಸಿಕೊಳ್ಳಲು ಹೆಚ್ಚಿನ ಇಂಧನ ಬೇಕಾಗುತ್ತದೆ' ಎಂದು ಅವರು ವಿವರಿಸಿದರು.

ಚಂದ್ರಯಾನ-2 ಅನ್ನು ಆಗಸ್ಟ್ 20ರಂದು ಚಂದ್ರನ ಕಕ್ಷೆಯಲ್ಲಿ ನೆಲೆಗೊಳಿಸಲಾಗುತ್ತದೆ ಎಂದು ಅವರು ತಿಳಿಸಿದರು.