‘ಹಳೆ ಕಾರನ್ನೇ ಕೊಡಿ’: ಸಚಿವರ ಜಪಾನ್‌ ಇಂಜಿನ್‌ ಮೋಹಕ್ಕೆ ಅಧಿಕಾರಿಗಳು ಸುಸ್ತು!

ಬೆಂಗಳೂರು: ನೂತನ ಸಚಿವ ಶ್ರೀಮಂತ ಪಾಟೀಲ್‌ ಎಲ್ಲರಂತಲ್ಲ. ಅವರಿಗೆ ಕಾರಿನ ವ್ಯವಸ್ಥೆ ಮಾಡುವುದಷ್ಟರಲ್ಲಿ ಆಡಳಿತ ಮತ್ತು ಸಿಬ್ಬಂದಿ ಇಲಾಖೆ (ಡಿಪಿಆರ್‌) ಅಧಿಕಾರಿಗಳು ಸುಸ್ತು ಹೊಡೆದಿದ್ದಾರೆ. ಏಕೆಂದರೆ ಸಚಿವರು ಕರ್ನಾಟಕದಲ್ಲಿದ್ರೂ ಅವರಿಗೆ ಜಪಾನ್‌ ಪ್ರೇಮ. ಹಳೆಯ ಕಾರಿನ ಮೇಲೆ ಮೋಹ!

ನೂತನ ಸಚಿವರು ಹೊಸ ಕಾರು ಬಯಸಿದ್ದರೆ, ಜವಳಿ ಮತ್ತು ಅಲ್ಪಸಂಖ್ಯಾತರ ಕಲ್ಯಾಣ ಸಚಿವ ಶ್ರೀಮಂತ ಪಾಟೀಲ್‌ ಹಳೆ ಮಾಡೆಲ್‌ ಇನ್ನೋವಾ ಕಾರಿಗೆ ಪಟ್ಟುಹಿಡಿದಿದ್ದರು. ಅವರಿಗೆ ಬೇಕಾದ ಕಾರನ್ನು ಕೊನೆಗೂ ಡಿಪಿಆರ್‌ ಸಿಬ್ಬಂದಿ ಹುಡುಕಿ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ.

2015ರ ಮಾಡೆಲ್‌ನ ಬಿಳಿ ಬಣ್ಣದ ಕೆಎ-51 ಜಿ-9333 ಸಂಖ್ಯೆಯ ಇನ್ನೋವಾ ಕಾರನ್ನು ಶ್ರೀಮಂತ ಪಾಟೀಲ್‌ ಅವರಿಗೆ ನೀಡಲಾಗಿತ್ತು. ಆದರೆ, ಅವರು ಹಠ ಹಿಡಿದು 2013ರ ಮಾಡೆಲ್‌ನ ಕೆಎ-05 ಜಿಎ-9 ಕಾರು ಪಡೆದುಕೊಂಡಿದ್ದಾರೆ.

ಶ್ರೀಮಂತ ಪಾಟೀಲ್‌ ಅವರ ಈ ಬೇಡಿಕೆಗೂ ಕಾರಣವಿದೆ. 2015ರ ಮಾಡೆಲ್‌ ಇನ್ನೋವಾದ್ದು ಎಂಜಿನ್‌ ಮೇಡ್‌ ಇನ್‌ ಇಂಡಿಯಾ. ಅದಕ್ಕೆ ಮುಂಚಿನ ಇನ್ನೋವಾ ಕಾರುಗಳಲ್ಲಿ ಮೇಡ್‌ ಇನ್‌ ಜಪಾನ್‌ ಎಂಜಿನ್‌ ಇರುತ್ತವೆ. ಶಬ್ದ ಕಡಿಮೆ, ಓಡಾಟ ಆರಾಮದಾಯಕ ಎಂಬುದು ಅವರ ಲೆಕ್ಕಾಚಾರ.

ಹಳೆಯದಾದರೂ ಪರವಾಗಿಲ್ಲ, ತಮಗೆ ಮೇಡ್‌ ಇನ್‌ ಜಪಾನ್‌ ಎಂಜಿನ್‌ನ ಇನ್ನೋವಾ ಬೇಕು ಎಂದು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯ ಶಿಷ್ಟಾಚಾರ ವಿಭಾಗದ ಅಧಿಕಾರಿಗಳ ಬೆನ್ನುಬಿದ್ದಿದ್ದರು. ಕೊನೆಗೂ ಸಚಿವರು ಬಯಸಿದ ಕಾರನ್ನು ಹುಡುಕಿ ಕೊಟ್ಟು ಅಧಿಕಾರಿಗಳು ನಿಟ್ಟುಸಿರು ಬಿಟ್ಟಿದ್ದಾರೆ.