ಶೀಘ್ರದಲ್ಲೇ ಮಧ್ಯಂತರ ಚುನಾವಣೆ - ಎಚ್.ಡಿ.ಕೆ ಭವಿಷ್ಯ

ಮೈಸೂರು: ರಾಜ್ಯ ವಿಧಾನಸಭೆಗೆ ಶೀಘ್ರದಲ್ಲಿ ಮಧ್ಯಂತರ ಚುನಾವಣೆ ನಡೆಯಲಿದೆ ಎಂದು ಮಾಜಿ ಮುಖ್ಯಮಂತ್ರಿ ಎಚ್.ಡಿ ಕುಮಾರಸ್ವಾಮಿ ಭವಿಷ್ಯ ನುಡಿದಿದ್ದಾರೆ. ಮೈಸೂರಿನಲ್ಲಿ ಮಾತನಾಡಿದ ಅವರು, ಬಿಜೆಪಿಯ ಹೈಕಮಾಂಡ್ ತೀರ್ಮಾನದಿಂದಲೇ ಮಧ್ಯಂತರ ಚುನಾವಣೆ ಎದುರಾಗಲಿದೆ ಎಂದಿದ್ದಾರೆ.

ಗುರುವಾರ ಮೈಸೂರಿನ ಖಾಸಗಿ ಹೋಟೆಲ್‌ನಲ್ಲಿ ನಗರ ಮಟ್ಟದ ಜೆಡಿಎಸ್ ಕಾರ್ಯಕರ್ತರ ಸಭೆ ನಂತರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಯಡಿಯೂರಪ್ಪ ಕಷ್ಟಪಟ್ಟು ಮುಖ್ಯಮಂತ್ರಿ ಆಗಿದ್ದಾರೆ. ಆದರೆ, ಬಿಜೆಪಿ ಹೈಕಮಾಂಡ್ ಮಧ್ಯಂತರ ಚುನಾವಣೆ ಕಡೆ ಹೊರಟಿವೆ ಎಂದರು.

ರಾಜ್ಯವು ನೆರೆ ಹಾವಳಿಯಿಂದ ತತ್ತರಿಸಿದೆ. ನೆರೆ ಪರಿಹಾರದ ಜನರ ನಿರೀಕ್ಷೆಗಳು ಕೈಗೂಡಲಿಲ್ಲ. ಲಕ್ಷಾಂತರ ಕುಟುಂಬಗಳು ಸಂಕಷ್ಟದಲ್ಲಿದ್ದರೂ ನೆರೆ ಸಂತ್ರಸ್ತರಿಗೆ ನೆರವಾಗಲು ಕೇಂದ್ರ ಸರಕಾರ ಸ್ಪಂದಿಸುತ್ತಿಲ್ಲ ಎಂದು ಆರೋಪಿಸಿದರು.

ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಬಿಜೆಪಿಯ ಮುಖ್ಯಮಂತ್ರಿಗಳೇ ಹೋಗಿ ಭೇಟಿ ಮಾಡಲು ಸಾಧ್ಯವಾಗುತ್ತಿಲ್ಲ. ಅವರನ್ನು ಭೇಟಿ ಮಾಡುವ ಧೈರ್ಯವೂ ಬಿಜೆಪಿ ಸಚಿವರಿಗೆ ಇಲ್ಲ. ಇನ್ನು ನಮಗೆ ಅವರನ್ನು ಭೇಟಿ ಮಾಡಲು ಸಮಯವನ್ನು ಕೊಡ್ತಾರಾ? ರಾಜ್ಯದ ಜನತೆಗೆ ಇದು ಅರ್ಥವಾಗಬೇಕಲ್ಲ ? ಹೀಗಾಗಿಯೇ ನಾವೂ ಪ್ರತಿಭಟನೆ ಮಾಡದೇ ಸುಮ್ಮನಿದ್ದೇನೆ. ಜನರಲ್ಲಿ ಹೋರಾಟದ ಭಾವನೆ ಬರದಿದ್ದರೆ ನಾವೇನು ಮಾಡಲು ಸಾಧ್ಯವಿಲ್ಲ ಎಂದಿದ್ದಾರೆ.

ಡಿಸಿಎಂ ಸಿಕ್ಕಿಲ್ಲ, ಬೆಂಗಳೂರು ಉಸ್ತುವಾರಿಯೂ ಸಿಗಲ್ವಾ ? ಆರ್. ಅಶೋಕ್‌ಗಿದು ಶಾಕಿಂಗ್ ನ್ಯೂಸ್ !

ಇದೇ ವೇಳೆ ಕಂದಾಯ ಸಚಿವ ಆರ್. ಅಶೋಕ್ ವಿರುದ್ಧವೂ ಹರಿಹಾಯ್ದ ಎಚ್.ಡಿ.ಕೆ ಆರ್.ಅಶೋಕ್ ನೆರೆ ಪೀಡಿತ ಪ್ರದೇಶಗಳಲ್ಲಿ ಪ್ರವಾಸ ಮಾಡುತ್ತಿಲ್ಲ. ಅವರಿಗೆ ಕೆಲಸ ಮಾಡುವ ಆಸಕ್ತಿ ಇದ್ದಂತಿಲ್ಲ ಎಂದಿದ್ದಾರೆ.