ಜೋಗ್‌ಫಾಲ್ಸ್‌ ಛಾಯಾಚಿತ್ರ: ಟೆಂಡರ್‌ ಎತ್ತಿಹಿಡಿದ ಹೈಕೋರ್ಟ್‌

ಬೆಂಗಳೂರು : ಪ್ರವಾಸಿಗರ ಇಷ್ಟಕ್ಕೆ ತಕ್ಕಂತೆ ಜೋಗ ಜಲಪಾತದ ಚಿತ್ರ ತೆಗೆಸಿಕೊಳ್ಳಲು ಮೂರು ವರ್ಷದ ಅವಧಿಗೆ ಛಾಯಾಗ್ರಾಹಕರಿಗಾಗಿ ಕರೆದಿದ್ದ ಟೆಂಡರ್‌ ಅನ್ನು ಹೈಕೋರ್ಟ್‌ ಎತ್ತಿಹಿಡಿದಿದೆ.

ಜೋಗ್‌ಫಾಲ್ಸ್‌ ಛಾಯಾಗ್ರಹಕರ ಸಂಘ ಟೆಂಡರ್‌ ಪ್ರಶ್ನಿಸಿ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿರುವ ನ್ಯಾ.ಅಲೋಕ್‌ ಅರಾಧೆ ಅವರಿದ್ದ ಏಕಸದಸ್ಯಪೀಠ, ಸಾರ್ವಜನಿಕ ಹಿತದೃಷ್ಟಿಯಿಂದ ಜೋಗ ಜಲಪಾತ ಅಭಿವೃದ್ಧಿ ಪ್ರಾಧಿಕಾರ ಕೈಗೊಂಡಿರುವ ನಿರ್ಧಾರದಲ್ಲಿ ಯಾವುದೇ ತಪ್ಪಿಲ್ಲ ಎಂದು ಹೇಳಿದೆ.

2017ರ ಅ.28ರಂದು ಕರೆದಿದ್ದ ಟೆಂಡರ್‌ ಅನುಮೋದಿಸಿರುವ ಹೈಕೋರ್ಟ್‌, ಟೆಂಡರ್‌ನಲ್ಲಿ ಬೇಕಿದ್ದರೆ ಅರ್ಜಿದಾರರೂ ಭಾಗವಹಿಸಬಹುದು ಎಂದು ಹೇಳಿದೆ.

''ಜೋಗಕ್ಕೆ ಭೇಟಿ ನೀಡುವ ಪ್ರವಾಸಿಗರ ಮೇಲೆ ಛಾಯಾಗ್ರಾಹಕರು ಫೋಟೊ ತೆಗಿಸಿಕೊಳ್ಳುವಂತೆ ಒತ್ತಡ ಹೇರುತ್ತಿದ್ದಾರೆ, ಅಲ್ಲದೆ ಅವರ ಮೇಲೆ ದೌರ್ಜನ್ಯ ಎಸಗುತ್ತಿದ್ದಾರೆ. ಪ್ರವಾಸಿಗರಿಂದ ಹೆಚ್ಚಿನ ಹಣ ವಸೂಲು ಮಾಡುತ್ತಿರುವ ಬಗ್ಗೆ ವ್ಯಾಪಕ ದೂರುಗಳು ಬಂದ ಹಿನ್ನೆಲೆಯಲ್ಲಿ ಟೆಂಡರ್‌ ಕರೆದು ಅಧಿಕೃತವಾಗಿ ಯಾರು ಟೆಂಡರ್‌ ಪಡೆದಿರುತ್ತಾರೋ ಅಂತಹವರು ಮಾತ್ರ ಪ್ರವಾಸಿಗರ ಛಾಯಾಚಿತ್ರ ತೆಗೆಯಲು ಅವಕಾಶ ನೀಡಲಾಗುವುದು ''ಎಂದು ಪ್ರಾಧಿಕಾರ ಹೇಳಿತ್ತು. ಆ ವಾದವನ್ನು ನ್ಯಾಯಾಲಯ ಪುರಸ್ಕರಿಸಿದೆ.