ಸಮಯ ಸಾಧಿಸಿ ಗಾಯಬ್‌ ಆದ ಶಂಕರ್‌!

ಬೆಂಗಳೂರು : ಡಿಸಿಎಂ ನಿವಾಸದಲ್ಲಿ ಆಯೋಜನೆಯಾಗಿದ್ದ ಉಪಾಹಾರ ಕೂಟದಲ್ಲಿ ಭಾಗಿಯಾಗಿದ್ದ ಪಕ್ಷೇತರ ಶಾಸಕ ಆರ್‌.ಶಂಕರ್‌ ಸದ್ದಿಲ್ಲದೆ ಕೈಕೊಟ್ಟು ಗಾಯಬ್‌ ಆದ ಸ್ಟೋರಿ ಸ್ವಾರಸ್ಯಕರವಾಗಿದೆ.

ಸೋಮವಾರ ಬೆಳಗ್ಗೆ ಡಿಸಿಎಂ ನಿವಾಸದ ಬ್ರೇಕ್‌ಫಾಸ್ಟ್‌ ಮೀಟಿಂಗ್‌ನಲ್ಲಿ ಶಂಕರ್‌ ಲವಲವಿಕೆಯಿಂದ ಭಾಗವಹಿಸಿದ್ದರು. ಸಭೆಯಲ್ಲಿರುವಾಗಲೇ ಮತ್ತೊಬ್ಬ ಪಕ್ಷೇತರ ಶಾಸಕ ನಾಗೇಶ್‌ ಬಿಜೆಪಿ ಗಾಳಕ್ಕೆ ಬಿದ್ದು, ಮುಂಬಯಿಗೆ ಹಾರಲು ಸಜ್ಜಾಗಿದ್ದಾರೆ ಎಂಬ ಬ್ರೇಕಿಂಗ್‌ ನ್ಯೂಸ್‌ ಬಂತು.

ಈ ಸುದ್ದಿ ಬರುತ್ತಿದ್ದಂತೆ ಶಂಕರ್‌ ಮುಖ ಕಳೆಗುಂದತೊಡಗಿತು. ಅವರ ಫೋನ್‌ ಸಂಭಾಷಣೆ ಗಮನಿಸಿದ ಕಾಂಗ್ರೆಸ್‌ ನಾಯಕರು ಶಂಕರ್‌ ಮೇಲೆ ನಿಗಾ ಇಟ್ಟಿದ್ದರು. ಹಾಗಾಗಿ ಪಂಜರದೊಳಗೆ ಸಿಲುಕಿದ ಗಿಳಿಯಂತೆ ಶಂಕರ್‌ ಚಡಪಡಿಸತೊಡಗಿದ್ದರು. ಈ ನಡುವೆ ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಡಿಸಿಎಂ ನಿವಾಸಕ್ಕೆ ಆಗಮಿಸಿದರು. ಎಲ್ಲ ನಾಯಕರ ಗಮನ ಸಿಎಂ ಕಡೆಗೆ ಹೋಯಿತು. ಈ ಅವಕಾಶ ಬಳಸಿಕೊಂಡ ಶಂಕರ್‌ ಜನಜಂಗುಳಿಯಲ್ಲಿ ತೂರಿಕೊಂಡು ಅಲ್ಲಿಂದ ಎಸ್ಕೇಪ್‌ ಆದರು. ಅವರು ಗೇಟ್‌ ದಾಟುತ್ತಿರುವಾಗ ಕೈಕೊಡುತ್ತಿದ್ದಾರೆಂಬ ಸುಳಿವು ಸಿಕ್ಕಿ ಹಿಡಿದು ನಿಲ್ಲಿಸಬೇಕೆನ್ನುವಷ್ಟರಲ್ಲಿ ಅವರು ಕಾರು ಹತ್ತಿ ಹೊರಟಾಗಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.