ಸಿದ್ದರಾಮಯ್ಯರ ಅದೃಷ್ಟದ ನಿವಾಸಕ್ಕೆ ಬಿಎಸ್‌ವೈ, ಫೆ. 27 ರಂದು ಗೃಹ ಪ್ರವೇಶ?

ಬೆಂಗಳೂರು: ಮುಖ್ಯಮಂತ್ರಿ ಬಿಎಸ್‌ ಯಡಿಯೂರಪ್ಪ ತಮ್ಮ ವಾಸ್ತವ್ಯವನ್ನು ಧವಳಗಿರಿಯಿಂದ ಸರ್ಕಾರಿ ಅಧಿಕೃತ ನಿವಾಸ ಕಾವೇರಿಗೆ ಬದಲಾಯಿಸಲಿದ್ದಾರೆ. ಫೆಬ್ರವರಿ 27 ರಂದು ಬಿಎಸ್‌ವೈ 78ನೇ ಹುಟ್ಟುಹಬ್ಬವನ್ನು ಆಚರಿಸಲಿದ್ದು, ಆ ದಿನದಂದೇ ತಮ್ಮ ಧವಳಗಿರಿ ನಿವಾಸವನ್ನು ತೊರೆಯಲಿದ್ದಾರೆ.

ಮಾಜಿ ಸಿಎಂ ಹಾಗೂ ವಿರೋಧ ಪಕ್ಷದ ನಾಯಕರಾಗಿರುವ ಸಿದ್ದರಾಮಯ್ಯ ಕಾವೇರಿ ನಿವಾಸದಲ್ಲಿ ವಾಸ್ತವ್ಯ ಹೂಡಿದ್ದರು. ಸಿಎಂ ಆದ ದಿನದಿಂದ ಕಾವೇರಿ ಪ್ರವೇಶಿಸಿದ ಅವರು ಅದೃಷ್ಟದ ನಿವಾಸವನ್ನು ತೊರೆಯಲು ತಯಾರಿರಲಿಲ್ಲ.

ಸಿದ್ದರಾಮಯ್ಯಗೆ ಇನ್ನೂ ಸಿಕ್ಕಿಲ್ಲ ಸರ್ಕಾರಿ ಕಾರು, ಸಿಬ್ಬಂದಿ - ಪತ್ರ ಬರೆದರೂ ಉತ್ತರವಿಲ್ಲ!

ಕಾವೇರಿ ನಿವಾಸದಲ್ಲಿ ವಾಸ್ತವ್ಯ ಮುಂದುವರಿಸಲು ಅವಕಾಶ ನೀಡುವಂತೆ ಕೋರಿ ಸರ್ಕಾರಕ್ಕೆ ಪತ್ರವನ್ನೂ ಬರೆದಿದ್ದರು. ಕೊನೆಗೂ ಸರ್ಕಾರದ ಒತ್ತಡದಿಂದ ಅವರು ಈ ನಿವಾಸವನ್ನು ತೊರೆಯಬೇಕಾಯಿತು.

ಇದೀಗ ಸಿದ್ದರಾಮಯ್ಯ ಅದೃಷ್ಟದ ನಿವಾಸಕ್ಕೆ ಬಿಎಸ್‌ವೈ ತಮ್ಮ ವಾಸ್ತವ್ಯವನ್ನು ಬದಲಾಯಿಸಲಿದ್ದಾರೆ. ಸದ್ಯ ಡಾಲರ್ಸ್‌ ಕಾಲೊನಿಯ ಧವಳಗಿರಿ ನಿವಾಸದಲ್ಲಿ ಬಿಎಸ್‌ವೈ ಉಳಿದುಕೊಂಡಿದ್ದಾರೆ. ಗೃಹ ಕಚೇರಿ ಕೃಷ್ಣಾಗೆ ಧವಳಗಿರಿಯಿಂದ ತೆರಳಲು ದೂರವಾಗಿರುವ ಕಾರಣದಿಂದಾಗಿ ಕಾವೇರಿಗೆ ವಾಸ್ತವ್ಯವನ್ನು ಬದಲಾಯಿಸಲು ಬಿಎಸ್‌ವೈ ನಿರ್ಧರಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ಕಾವೇರಿ ನಿವಾಸದಲ್ಲಿ ಸ್ವಚ್ಛತಾ ಕಾರ್ಯಗಳು ನಡೆಯುತ್ತಿದ್ದು ಹುಟ್ಟುಹಬ್ಬದ ದಿನ (ಫೆ.27) ರಂದು ಕಾವೇರಿ ಗೃಹ ಪ್ರವೇಶ ಮಾಡಲು ನಿರ್ಧರಿಸಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ.